Bushe Mufwile Ukuba Abashisakamana?

ABANTU abengi pambi kuti bayumfwa ukuti balebatasha nga ca kuti bambi batila baba abashisakamana, abashikatala, abatalalila, abashishimisha. Lelo kwaliba ulubali na lumbi ulwa kubela abashisakamana. Baibolo itila: “No muleketela wa bawelewele ukabalofya.” (Amapinda 1:32) Bushe ico cipilibula nshi?

AmaBaibolo yambi yapilibula ili shiwi lya ciHebere pamo nga “ukukanaibikilishako” (American Standard Version), “ukwikushiwa” (The New American Bible), no “kukanasakamana.” (The New English Bible) E co, ukukanasakamana kwayampana na bumbokoya no kukanaangwa ifintu na muli fyo no buwelewele.

Mu mwanda wa myaka uwa kubalilapo, Abena Kristu mu cilonganino ca Laodikea tabasakamene ifyo babulishe lwa ku mupashi. Baleitakisha ati ‘tabalekabila kantu nangu kamo.’ Yesu Kristu alibalungike, ukuti babukulule ukupimpa kwabo ukwa Bwina Kristu.—Ukusokolola 3:14-19.

Ukukanasakamana kwali e mibele abantu ba mu nshiku sha kwa Noa na bo bakwete. Bali abaobelwa ne fya mu calo, ‘ukulya no kunwa, ukuupa no kuupwa, kabili tabaishibe lyasukile lyeshi lyaisa no kusenda bonse.’ Lyene Yesu alundilepo ukuti: “E fyo kukaba no [kubapo, NW] kwa Mwana wa muntu.”—Mateo 24:37-39.

Ukufishiwapo kwa kusesema kwa mu Baibolo kulelanga ukuti tuleikala mu nshita ya “kubapo kwa Mwana wa muntu,” Yesu Kristu. E co twiba aba muleketela, abashisakamana, abaikushiwa.—Luka 21:29-36.