Icisansamushi mu Nshita sha Mafya

ILYASHI muno nshiku talisansamusha nangu panono. Umuntu umo alembele ati: “Ifilecitika ndakai fyalibipa nga nshi ica kutila ilingi tulafilwa no kupingulapo nampo nga tufwile ukukutika ku lyashi lilandwa pa 6:00 hrs.” Mu calo mwaisula inkondo, ukusansa kwa fipondo, ubucushi, imisoka, na malwele, ifintu fyabipa ifingatuponena na ifwe nga tafilati fituponene.

Baibolo yasobele bwino bwino ifi fintu. Ilyo Yesu alelondolola ifyo ifintu fyali no kuba mu nshita yesu, atile kwali no kuba inkondo shikalamba, ifikuko, ifipowe, ne finkukuma. (Luka 21:10, 11) Umutumwa Paulo na o alembele pa lwa “nshita shayafya,” ilyo abantu bakaba abankalwe, abatemwa indalama, kabili abashatemwa busuma. Aitile iyo nshita ati “inshiku sha kulekelesha.”—2 Timote 3:1-5.

E ico, ifilandwa mu malyashi pa filecitika mu calo, filapalana ne fyo Baibolo yasobele. Lelo ni muli ifi fine fye e mo fipalana. Baibolo ilalondolola ifyo ilyashi lishilondolola. Ukubomfya Icebo capuutwamo ica kwa Lesa, kuti twaumfwikisha umulandu ububifi bufulile fi ne fyo cikaba ku ntanshi.

Ifyo Lesa Amona Ububifi

Baibolo ilalondolola ifyo Lesa amona imikalile yabipa iya mu nshiku shesu. Nangu  ca kuti alimwenene kabela amafya ya ndakai, tabekelwamo kabili tafwaya ukuyaleka ukutwalilila umuyayaya. Umutumwa Yohane alembele ati: “Lesa kutemwa.” (1 Yohane 4:8) Yehova alasakamana sana abantu bakwe kabili apata ububi bonse. Kanshi kuti calinga ukuya kuli Lesa ku kusansamushiwa, pantu musuma kabili wa nkumbu kabili aba na maka ya kufumya ububifi pe sonde e lyo afwaya ukucite co. Kemba wa malumbo alembele ati: “[Imfumu yasontwa iya kwa Lesa iya mu muulu] ipokololo mubusu uwakuuta, no mulanda, no ushikwete wa kumwafwa, ilililo bulanda umulanda no mubusu, ne myeo ya babusu ilapususha; ilubule myeo yabo mu kunyanyantilwa na mu kufyengwa, no mulopa wabo walifinisha mu menso ya iko.”—Amalumbo 72:12-14.

Bushe mulomfwila abalecula uluse? Kwena mufwile mulomfwa. Ukulangulukila, mibele Yehova abikile muli ifwe, pantu twabumbilwe mu cipasho cakwe. (Ukutendeka 1:26, 27) Kanshi kuti twacetekela ukuti Yehova tasuulako ku kucula kwa bantunse. Yesu, uwaishibe sana Yehova ukucila bonse, asambilishe ukuti Yehova alyangwa sana kuli ifwe kabili wa cikuku.—Mateo 10:29, 31.

Ububumbo bulanga ukuti Lesa alasakamana abantunse. Yesu atile Lesa “alenga akasuba kakwe ukutulila ababifi na basuma, no kuleke mfula ilokele abalungama na bashalungama.” (Mateo 5:45) Ku bantu ba mu musumba wa Lustra, umutumwa Paulo atile: “[Lesa] tailekele fye ukwabulo bunte ubwa kuti e Kabomba wa fisuma, uumupeele mfula ya mu muulu ne myaka ya kulobolole fisabo, no kwisushamo imitima yenu ifilyo no kusangalala.”—Imilimo 14:17.

Nani Walenga?

Moneni ukuti Paulo asosele ku bantu ba mu Lustra na kabili ati: “Mu nkulo ishapita, [Lesa] alekele inko shonse ukuya mu mibele ya shiko.” E ico, inko, nelyo abantu bene, e balenga amafya ayengi ayabaponena. Lesa te ufwile ukupeelwa umulandu.—Imilimo 14:16.

Mulandu nshi Yehova asuminishisha ifintu ifyabipa ukucitika? Bushe akabala acitapo icili conse? Icasuko kuli aya mepusho kuti casangwa fye mu Cebo ca kwa Lesa pantu icasuko calyampana sana no muntu umbi uwa mupashi e lyo no mulandu aimishe mu bwikalo bwa mipashi.

[Ifikope pe bula 4]

Abantunse balalangulukilana. Bushe Lesa wena e ushingalangulukila abantu mu kucula kwabo?

 [Abatumtuminishe Ukubofya Ifikope Fili pe bula 2]

COVER: Tank: UN PHOTO 158181/J. Isaac; earthquake: San Hong R-C Picture Company

[Abatusuminishe Ukubomfya Icikope pe bula 3]

Ku kuso pa muulu, Croatia: ICIKOPE ca ba UN 159208/S. Whitehouse; umwana alecula ku nsala: ICIKOPE ca ba UN 146150 UWAKOPELE ni O. MONSEN