Ilyashi lya Bakabilisha ba Bufumu

Ing’anda ya Bufumu Yapeelwa Imendulo

ICIPANI ca buteko icilolekesha pa filengwa na Lesa mu Finland catile 2000 “Mwaka wa Kuyemfya Imansa.” Umo pa bateyenye ici cacitike atile “uno mwaka tusalile umutwe wa kuti ukuyemfya imansa, pa kuti tucinkulweko ifyo imansa shayemfiwa ku fimenwa shilenga imikalile yesu ukuwama.”

Pa January 12, 2001 kalata ukufuma ku kabungwe ka Finnish Association of Landscape Industries yaishile ku maofeshi ya Nte sha kwa Yehova ku Finland. Kalata yatile, Ing’anda ya Bufumu iya Nte sha kwa Yehova iya mu Tikkurila naipeelwa imo iya mendulo sha mwaka wa kuyemfya imansa pantu ulubansa lumoneka ulwaibela kabili lwaliyemfiwa bwino ne fimenwa. Yasosele no kuti “ulubansa lwaliyemba kabili lulamoneka bwino sana, nampo nga ni mu lusuba nelyo mu mpepo.”

Iyi mendulo yapeelwe ku Nte sha kwa Yehova mwi hotela lya Rosendahl Hotel mu Tampere, ku Finland. Pali ici cacitike pali abasoma na bashimakwebo 400. Akabungwe ka Finnish Association of Landscape Industries kalisabankenye ili lyashi na mu manyunshipepala ilyaleti: “Mu ncende shalekanalekana muno calo, Amayanda ya Bufumu aya Nte sha kwa Yehova, ilingi yalapekanishiwa bwino. Ifyo basakamana ulubansa filenga mupepi fye na onse umupita nshila ukucebushiwa. Ing’anda ya Bufumu iyabela mu Tikkurila yaba pa mayanda ya Bufumu ayakwata imansa ishayemba sana konse konse. Icikulwa pamo no lubansa fyonse capamo filangililo fya mutende no kushikatala.”

Mu Finland mwaba Amayanda ya Bufumu 233, ayengi yashingulukwa ne fimenwa fyayemba sana. Lelo, icilenga ifi fifulo ukuyemba icine cine, ni co fyaba fifulo fya kupepa kwa cine na masambililo ya Baibolo. Ku Nte sha kwa Yehova abacila amamilioni 6 mwi sonde lyonse, Ing’anda ya Bufumu, nampo nga yalikuulwa bwino nelyo yaba fye iyalinga, iba cifulo icatemwikwa sana. E mulandu wine bafwaila sana ukuisakamana no kutemwa. Onse mu bwikashi uwingatemwa ukuyako ku ng’anda ya Bufumu akapokelelwa!