Ukusansamushiwa pa Kwishiba Lesa Bwino Bwino

KU BANTU bamo, ifyo Baibolo ilanda pa kutemwa kwa kwa Lesa na pa cikuku cakwe e filenga amepusho ya kupelenganya. Balepusha abati: Nga Lesa alafwaya ukufumyapo ububifi, nga alishiba ifya kucite co, na maka ya kucite co alikwata, mulandu nshi ububifi bulefulile fi? Icabafya, kwishiba ifyo ifi fishinka fitatu fyayampana: (1) Lesa wa maka yonse; (2) Lesa kutemwa kabili musuma; na (3) ifintu ifibi filetwalilila ukucitika. Bapelulula ukuti apo te ca kutwishika ukuti icishinka calenga butatu ca cine, ninshi cimo pali ifi fibili te kuti cibe ca cine. Kuli bene, Lesa teti aleshe ububifi nelyo tasakamana.

Inshiku ishingi pa numa ya konaulwa kwa fikuulwa fya World Trade Centre mu New York, shimapepo walumbuka mu United States atile: “Balinjipusha . . . imiku iingi ico Lesa asuminishisha amasanso no kucula. Kwena mfwile ukulanda icishinka ukuti na ine wine nshaishiba bwino icasuko.”

Mu kwankula kuli ifi fyebo, uwasoma sana ifya mipepele alembele ukuti alyumfwile bwino sana pa “fyebo fisuma” ifyo uyu shimapepo ashimikile. Kabili asuminishe ne fyo uwasoma umo alembele ati: “Icilenga ukukanaumfwikisha ico kwabela ukucula caba kukanaumfwikisha Lesa.” Lelo, bushe cine cine teti tumfwikishe umulandu Lesa asuminishisha ububifi?

Ukwafuma Ububifi

Baibolo tailanda nge fyo bashimapepo basosa, pantu taitila teti tumfwikishe umulandu Lesa asuminishisha ifyabipa ukucitika. Icacindama pa kumfwikisha umulandu kwabela ukucula kwishiba ukuti Yehova talengele icalo umwali ububifi. Alengele abantu ba kubalilapo babili abapwililika, ababula ulubembu. Yehova aloleshe pali conse ico abumbile no kusanga ukuti “naciwamisha.” (Ukutendeka 1:26, 31) Alefwaya Adamu na Efa ukukusha Paradise wa mu Edene ukufika pe sonde lyonse no kwisushamo abantu ba nsansa abacingililwa kuli bumulopwe bwakwe mu kutemwa.—Esaya 45:18.

Icibumbwa ca mupashi, e catendeke ububifi. Nangu line pa kubala cali cibumbwa ca cishinka kuli Lesa, pa numa cafwaishe ukupepwa. (Yakobo 1:14, 15) Ukupondoka kwa ciko kwalimoneke pe sonde ilyo casongele abantu ba kubalilapo babili ukupondokela Lesa pamo na cene. Ukucila ukunakila ku fyo Lesa abebele bwino bwino ukuti bekalya nelyo ukwikata ku cisabo ca muti wa kwishiba ubusuma no bubi, Adamu na Efa balisabile no kulyako. (Ukutendeka 3:1-6) Pa kucite fyo, tabaumfwilile Lesa kabili balangile ukuti tabalefwaya ukutungululwa na wene.

Kwaima Umulandu

Uku kupondoka kwacitike mu Edene kwaimishe umulandu, uwacindama mu bubumbo  bonse. Bacipondoka abantunse balitwishike nampo Yehova nga aleteka bwino ifibumbwa fyakwe. Bushe Kabumba alikwete insambu sha kuti abantunse balemunakila umupwilapo? Bushe abantu bali no kwikala bwino abalaitungulula?

Yehova ayankwile ku fyo ukuteka kwakwe kwatwishikwe mu nshila yalangile ifyo alinganya ukutemwa, ubupingushi, amano, na maka. Nga alibomfeshe amaka yakwe ku konaula bacipondoka palya pene fye. Ici nga camoneke icalinga, pantu alikwete insambu sha kucite fi. Lelo ukucite fi nga takwayaswike amepusho yaimineko. Cimbi na co, Lesa nga alisuulileko fye ku lubembu. Pali lelo, bambi kuti bamona ukucita ifi kwati kutemwa. Lelo, ukucita ifi na ko te kuti kwasuke ukutunga kwa kwa Satana ukwa kuti abantunse kuti bacita bwino nga baleiteka. Kabili, bushe ukucite fyo teti kukoseleshe fye na bambi ukufuma ku nshila ya kwa Yehova? Ici kuti caleta ukucula kwa mutatakuya.

Yehova abomfeshe amano yakwe no kusuminisha abantunse ukuiteka pa nshita inono. Nangu ca kuti ici calenga asuminisha ububifi ukubako pa nshita inono, abantunse balikwata inshita ya kulanga nampo nga kuti baiteka bwino ukwabula ukwafwiwa na Lesa, ukwikala umwabele fipimo fyabo ifya calungama ne cilubo. Bushe cinshi cafumamo? Ukutula fye ku kale, umuntunse alitwalilila ukutebelelwa ku nkondo, ulufyengo, ulumanimani, no kucula. Kuli pele pele ukukanatunguluka kwa bapondokela Yehova kukapwisha imilandu yaimine mu Edene ku ciyayaya.

Lelo, Lesa alanga ukutemwa kwakwe pa kupeela Umwana wakwe, Yesu Kristu, uwapeele umweo wakwe nge lambo lya cilubula. Ici calengele abantunse ukulubulwa ku lubembu ne mfwa ifyafumine mu kubulwa icumfwila kwa kwa Adamu. Icilubula calenga ukuti bonse abatetekela Yesu bakabe no mweo wa muyayaya.—Yohane 3:16.

Ubulayo Yehova atulaya ubwa kuti ukucula kwa bantunse kwa nshita fye inono  bulatusansamusha. Kemba wa malumbo alembele ati: “Pashala panono, ilyo umubifi takabepo; awe ukalolekesha apo ali, no kusanga tabapo: lelo abalanda bakapyaninine calo, no kuilemeno bwingi bwa mutende.”—Amalumbo 37:10, 11.

Inshita ya ku Ntanshi iya Mutelelwe ne Nsansa

Ukufishiwapo kwa masesemo ya mu Baibolo kulanga ukuti inshita ya kwa Lesa iya kupwisha ukulwala, ubulanda, ne mfwa naipalama. Moneni icintu ubusuma ico umutumwa Yohane amwenene kabela mu cimonwa. Alembele ati: “Namwene umuulu upya ne calo cipya, pantu nafiya umuulu wa ntanshi ne calo ca ntanshi, na bemba talipo kabili iyo. . . . Na Lesa umwine akaba pamo na [bantunse]: kabili akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.” Mu mashiwi yakomaila pa kuti aya malayo ya cine, Yohane aebelwe ati: “Lemba: pantu ifyebo ifi fya cishinka kabili fya cine.”—Ukusokolola 21:1-5.

Bushe cikaba shani ku minshipendwa ya bantu ba kaele abafwa ukutula pa kupondoka kwaliko mu Edene? Yehova alaya ukuti akabuusha abantu abalaala mu mfwa nomba. Umutumwa Paulo atile: “Pa kukwate citetekelo kuli Lesa . . . ica kuti kukabo kwima ku bafwa kwa balungama na bashalungama.” (Imilimo 24:15) Aba bakaba ne subilo lya kwikala mu calo “umwaikalo bulungami.”—2 Petro 3:13.

Nga filya wishi wa kutemwa engasuminisha umwana wakwe ukulepulwa nga naishiba ukuti cikatwalilila ukumuwamina, e fyo na Yehova asuminisha abantunse ukucula inshita inono pe sonde. Lelo, kukaba amapaalo ya muyayaya kuli bonse abafwaya ukucita ukufwaya kwa kwa Lesa. Paulo alondolwele ati: “Ifibumbwa fyalengelwe ukulamba ku kuicusha fye, te kuti kuitemenwa iyo, lelo pa mulandu wa wafilamfishe, pa kucetekelo kwa kuti ifibumbwa na fyo fikalubulwa ku busha bwa kubola no kutwalwa mu buntungwa bwa bukata bwa bana ba kwa Lesa.”—Abena Roma 8:20, 21.

Cine cine iyi ni mbila, te mbila tumona pa TV nelyo ukubelenga mu nyunshipepala, lelo ni mbila nsuma. Ni mbila yawamisha ukufuma kuli “Lesa wa cisansamushi conse,” uutusakamana icine cine.—2 Abena Korinti 1:3.

[Ifikope pe bula 6]

Ifyacitika pa nshita ntali fyalanga ukuti abantunse teti baiteke bwino ukwabula ukwafwilishiwa na Lesa

[Abatusuminishe]

Ulupwa lwa ku Somali: ICIKOPE ca ba UN 159849/M. GRANT; ibomba lya atomiki: icikope ca ba USAF; inkambi ya kucushiwilwamo: icikope ca ba U.S. National Archives