Ifipusho Ukufuma ku Babelenga

Bushe kuti caba kukumbinkanya ifisumino ukushita icikuulwa ku ba mipepele imbi no kucisangula Ing’anda ya Bufumu?

Kwena, Inte sha kwa Yehova besha ukukanabombela pamo na ba mipepele imbi mu fya musango yu. Na lyo line, ukushita icikuulwa ku ba mipepele imbi te kuti kube kukumbinkanya ifisumino. Kuti kwamonwa nge cintu ca nshita fye imo. Ico cilonganino ca Nte sha kwa Yehova tacilebombela pamo ne mipepele imbi ukukuula icikuulwa ca kuti iyi mipepele ibili ilepepelamo.

Bushe ni pi Yehova amwena ukuti uku e kusakanya ifisumino? Moneni ifyo umutumwa Paulo alandile: “Mwiba aba kwi koli limo na bashatetekela; pantu ubulungami no bupulumushi kuti fyayampana shani? napamo ulubuuto ne mfifi kuti fyakwate senge shani? Kabili kuli ukuumfwana nshi kuli Kristu na Beliali? napamo ukulingana nshi ku watetekela no ushatetekela? Kabili kuli ukusuminishanya nshi kwi tempele lya kwa Lesa no tulubi? . . . ‘E ico fumeni mwi bumba lyabo, mupaatukeko, e fyo asosa Shikulu, kabili mwiikatako ku cishasanguluka na ine nkamusekelela.” (2 Abena Korinti 6:14-17) Paulo aloseshe mwi pa kulanda ati ‘ukwampana’ ne “senge”?

Ukwampana Paulo alandapo kusanshamo ukupepela pamo na bapepo tulubi na bashatetekela no kucitila pamo na bo ifya ku mupashi. Asokele abena Korinti ukuti tabafwile ‘ukuliila pe tebulo lya fiwa.’ (1 Abena Korinti 10:20, 21) E ico, ukusakanya ifisumino kupepela pamo ne mipepele imbi. (Ukufuma 20:5; 23:13; 34:12) Ilyo icikuulwa ico aba mu mipepele imbi balepepelamo cashitwa, ciba kushita fye icikuulwa icingalulwa ukuba Ing’anda ya Bufumu. Ilyo cishilasangulwa ukuba Ing’anda ya Bufumu, fyonse ifikumine imipepele ya bufi filafumishiwamo. Ilyo cawamishiwa, cipeelwa kuli Yehova ku bufwayo bwa bwa kumupepelamo epela. Takuli isenge nelyo ukwampana pali bakapepa ba cine na ba bufi.

Ilyo kuli ukulanshanya pa lwa kushita icikuulwa ca musango yu, takufwile kwaba ukulalanshanya libili libili na baleshitisha kabili ukulanshanya kufwile fye kwaba pa fya mishitile ya ico cikuulwa. Aba mu cilonganino ca Bwina Kristu bafwile ukulaibukisha ukusoka kwa kwa Paulo ukwa kukanaba “aba kwi koli limo na bashatetekela.” Nangu ca kuti tatuyumfwa ukuti twalicila aba mipepele imbi, tulataluka ku kubishanya na bene nelyo ukuwila mu kupepa kwabo. *

Ni shani ulwa cilonganino icilesonkela icikuulwa ca mipepele imbi? Ilingi nga kuli ukusonkela icikuulwa kulaba ukulanshanya libili libili na bene ba ico cikuulwa, icintu ico tufwile ukutalukako. Nangu fye kusonkela icikuulwa ca musango yu umuku fye umo, ibumba lya baeluda lifwile ukumona ifyakonkapo: Bushe kukaba ifimpashanya ne fishibilo fya mipepele mu kati nelyo pa nse ya cikuulwa? Abantu mu bwikashi bakamona shani lintu twabomfya ici cikuulwa? Bushe kuli aba mu cilonganino abengapunushiwa lintu twabomfya ici cikuulwa? (Mateo 18:6; 1 Abena Korinti 8:7-13) Baeluda balapimununa ifi no kusala icilingile. Kufwile kwaba ukutontonkanya na pali kampingu wabo no wa cilonganino ilyo balemona nga ca kuti kuti kwaba ukushita icikuulwa ca musango yo no kucisangula Ing’anda ya Bufumu.

[Futunoti]

[Icikope pe bula 27]

Ici cikuulwa, icali lisunagoge, calishitilwe no kusangulwa Ing’anda ya Bufumu