Inshita ya Kusekelela mu Balkan

Cali ni mu mwaka wa 1922. Kwali ukulongana mu Innsbruck, ku Austria, ukwa Basambi ba Baibolo Abapimpa, ifyo Inte sha kwa Yehova baleitwa ilya nshita. Mwi bumba mwali Franz Brand, umulumendo uwafumine ku Apatin, mu Vojvodina, ku Serbia. Kalanda ashilumbula fye ishina lya kwa Lesa, Yehova, ibumba ilikalamba lyatendeke ukuwela, ica kuti afililwe no kutwalilila, no kulongana e po kwapwilile. Lelo, ifyo Franz aumfwile fyalimutemwine, kabili atendeke ukubila imbila nsuma iya Bufumu. Uku e kwali ukutendeka kwa kulunduluka kwa ku mupashi ukwa calo cimo ica mu Balkan.

ILYO abantu abengi lelo baumfwa ishiwi Yugoslavia, batontonkanya pa nkondo no kwipayaula. Batontonkanya pa kwipayaulwa kwabipisha ukubaletela ubulanda, imbutushi shapelelwa, amayanda yaonaulwa, na bana banshiiwa abalecula. Te kuti tulondolole ukukalipwa kwabipisha no bucushi bwalengelwe ne nkondo iyaonawile Icofi ca Balkan ukufuma mu 1991 ukufika ku 1995, ukupwisha isubilo lyonse ilya kuti ku ntanshi kukaba ukwikala bwino kabili mu mutende abantunse nga babombesha. Pa mulandu wa iyi nkondo, abantu ba mu calo icaleitwa kale Yugoslavia balecula ku kubulisha indalama na ku bupiina. *

Pa mulandu wa ubu bucushi, kuti cayafya umuntu ukwenekela ukusanga abantu ba nsansa muli iyi ncende. Lelo, nangu line ici kuti capapusha, abantu ba musango yo e ko baba. Na kuba, bakwete ubushiku bwa kusekelela kwaibela ku kupwa kwa mwanda wa myaka uwalenga 20. Bushe Franz Brand, umulumendo twacilandapo pa kubala, akumineko shani kuli uku kusekelela?

Ukulunduluka kwa ku Mupashi mu Balkan

Franz Brand alitemenwe sana pa cine asambilile kabili apingwilepo ukuti afwile ukusabankanya imbila nsuma. Asangile incito ya kubeya umushishi mu Maribor, umusumba wabela mu Slovenia mupepi no mupaka wa Austria, no kutendeka ukushimikila abaleisa mu kubeyesha umushishi, abo ilingi line baleikala no kukutika ilyo balebabeya. Pa mulandu wa kubombesha kwakwe, kwapangilwe ibumba linono ilya bakabila ba Bufumu mu  Maribor ku kupwa kwa ba1920. Amalyashi ya Baibolo yalelandwa mu cikuulwa bashitishishamo ifya kulya, kabili pa numa cainikwe Novi svet (Icalo Cipya) Seafood Restaurant.

Mu kuya kwa nshita, imbila nsuma yasalangene mu calo conse. Ukubomfya “Photo-Drama of Creation” (iyali kutambisha amafilimu, amasilaidi, na malyashi ya pa cilimba ca maseleti pa maawala 8) kwalyafwile sana muli uku kulunduluka. Lyene muli ba1930 ilyo Inte sha kwa Yehova bapakeswe icabipisha mu Germany, abali mu Bufumu bwa Yugoslavia balikoshiwe kuli bapainiya abena Germany abafulumwike ku mwabo. Balishile ifintu ifisuma no kubombesha ukufika mu ncende sha mutali isha ici calo ca mpili pa kuti bashimikile. Pa kubala, calemoneka kwati banono baleankulako ku bukombe bwabo. Ku kutendeka kwa ba 1940, bakasabakanya 150 epela e balebomba.

Mu 1941, ukupakasa kwabipisha kwalitendeke, ukwatwalilile ukufika mu 1952. We kusekelela kwaliko ilyo pa September 9, 1953, mu kuteka kwa kwa Mushika Tito, Inte sha kwa Yehova basukile balembeshiwa mwi funde! Ulya mwaka, kwali bakabila ba mbila nsuma 914, kabili balefula. Mu 1991, bakasabankanya balifulile ukufika kuli 7,420, kabili abantu 16,072 balisangilwe ku Cibukisho ulya mwaka.

Ukufuma pa August 16 ukufika ku 18, 1991, kwali ibungano lya pa kati ka nko ilya Nte sha kwa Yehova ilya kubalilapo muli ici calo ilyabelele ku Zagreb, ku Croatia. Abantu 14,684 e basangilweko ukufuma muli ici calo na ku fyalo fimbi. Ili ibungano lishakalabwe lyateyenye abantu ba kwa Yehova ku mesho ayali no kubeshila. Pali bamotoka balekeleshe ukupita apo balebebetela bamotoka pa kati ka Croatia na Serbia pali amabasi ayaletwala abasangilwe kwi bungano ku mwabo. Ilyo basi ya kulekelesha yapitile, baliseele umupaka wa calo kabili inkondo yalitendeke.

Abantu ba kwa Yehova Bafwile Ukusekelela

Imyaka kwali inkondo yali myaka ya kweshiwa kwabipisha ku Nte sha kwa Yehova mu Balkan. Lelo, balingile ukusekelela pantu Yehova alipaala abantu bakwe kulya ica kuti balifula nga nshi. Ukutula mu 1991, impendwa ya bakabila ba Bufumu mu ncende yali kale Yugoslavia yalifula na mapesenti 80. Mu mwaka wa mulimo uwa mu 2001 kwali bakasabankanya 13,472.

Amaofeshi ya mu Zagred na Belgrade (Serbia) e yaleangalila umulimo wa Nte sha kwa Yehova mu Yugoslavia monse. Pa mulandu wa kufula no kwaluka mu mitekele, kwalekabila ukupanga amaofeshi yapya mu Ljubjlana (Slovenia), na mu Skopje (Macedonia), pamo no kukuula amaofeshi ayapya mu Belgrade na mu Zagreb. Abantu nalimo 140 e balebombela muli aya maofeshi. Abengi bacaice abapimpa kabili abatemwa Yehova. Abengi pali bene balapilibula impapulo sha kwaafwa ukusambilila Baibolo mu ciCroatian, iciMacedonian, iciSebian, ne ciSlovenian. Ala lipaalo ukuti bamagazini abengi ne mpapulo sha Nte sha kwa Yehova muli ishi ndimi shilesabankanishiwa pa nshita imo ine ne sha ciNgeleshi! Ishi mpapulo shilaafwa abantu abengi ukusanga icisansamushi ne subilo.

Cimbi ica kulenga ukusekelela kwafwilisha ukwabula bukaitemwe ukucitwa na babomfi  ba kuitemenwa ukufuma ku fyalo fimbi. Amayanda ya Bufumu ayasuma yalikuulwa mu myaka inono iyapita, na cimbi icilenga ifilonganino ukusekelela. Lelo, kwali no kuba ukusekelela na kumbi. Bushe kwali no kufuma kwi?

Umulimo Waibela

Bakasabankanya abengi balelanguluka abati, ‘Bushe tukatala atukwata Baibolo wa New World Translation mu lulimi lwesu?’ Cila mwaka, baleenekela nga nshi ukuumfwa ukubilisha kwa pe bungano lya citungu ilya kuti uyu Baibolo napilibulwa. Lelo, bushe umulimo ukalamba nge fi kuti wabombwa shani, pantu ukupilibula muli ishi ndimi kwatendeke fye imyaka inono iyapita kabili kwali fye bakapilibula banono?

Pa numa ya kubebeta, Ibumba Litungulula lyasuminishe umulimo wa kubombela pamo umo bakapilibula ba ciCroatian, iciMacedonian, ne ciSebian bali no kubombela pamo pa kuti bengafwana mu milimo yabo ne mitubululo. Bakapilibula ba ciCroatian e bali no kutungulula.

Ubushiku bwa Kusekelela

Inte sha kwa Yehova mu Balkan tabakabale abalaba ubushiku bwa July 23, 1999. Amabungano ya Citungu aya “Icebo ca Kusesema ica kwa Lesa” yali no kucitwa pa nshita imo ine mu Belgrade, Sarajevo (Bosnia-Herzegovina), Skopje, na Zagreb. Kwali ukutwishika nampo nga ibungano lyali no kubako mu Belgrade pantu ilyo kwali ukupuusha amabomba ukwa ba NATO, takwali ukulongana kwa cintubwingi ukwalesuminishiwa. Kwena bamunyinefwe balitemenwe pa kwenekela ukubishanya pa numa ya myeshi iingi iya kutwishika! Lelo, ifyacitike fyacilile nga nshi ifyo baenekele.

Pali Cisano icungulo ukubilisha kwaibela kwalicitilwe mu misumba yonse ine umwali amabungano. Abantu 13,497 abasangilweko baleenekela mu mutalalila icali no kucitika. Ilyo kalanda asukile akakula New World Translation of the Christian Greek Scriptures mu ciCroatian ne ciSerbian no kwebe bumba ukuti bakapilibula ba ciMacedonian na bo balecita bwino, awe mukwai abasangilwe kwi bungano batemenwe icine cine. Ukutoota kwalengele kalanda ukufilwa ukupwisha ukubilisha. Pe bungano lyali mu Sarajevo, ibumba lyatalele fye tondolo, pantu balisungwike. Lyene balitootele pa nshita ntali. Abengi balelila pa mulandu wa kusansamuka mu Belgrade, kabili kalanda aleiminina ilyo alebilisha pa mulandu wa kuti abantu baletoota libili libili. Ala bonse batemenwe icine cine!

Ici ca bupe cali icacindama kabili pa mulandu wa kuti Inte sha kwa Yehova balipeelwe insambu sha kupulinta Baibolo mu ciCroatian ne ciSerbian. E ico, mu ciCroatian na mu ciSerbian, babikile pamo New World Translation of the Christian Greek Scriptures na Malembo ya ciHebere aya lulimi lumo lwine kabili Baibolo ya ciSerbian yalipulintilwe mu filembo fya ciRoma ne fya ciCyrillic.

Apo balatasha pali aya mapaalo yonse bapokelela no butungulushi, abantu ba kwa Yehova mu calo Balkan balasuminisha amashiwi ya kwa Davidi ayatila: “Kabili ilyo nyenda mu mupokapoka wa kufiita kwa mfwa, nshitiina bubi; pantu imwe [mwe Yehova] muli pamo na ine.” Te mulandu na mafya yonse ayabaponena, bapampamine pa kulenga ‘ukusekelela kwa kwa Yehova kube e maka yabo.’—Amalumbo 23:4; Nehemia 8:10.

[Futunoti]

[Icikope pe bula 20]

Ibumba lya kubalilapo ilya bakasabankanya mu Maribor, ku Slovenia, baleshimikila ku cifulo caba ukutali