Yehova Asakamana Imwe

“Amasakamika yenu yonse bikeni pali [Lesa], pa kuti asakamana imwe.”—1 PETRO 5:7.

1. Ni mu nshila nshi ikalamba umo Yehova na Satana bapusaninina?

YEHOVA na Satana balipusaninina. Onse uwaumfwa ukuti akulilwa kuli Yehova kuti atandulwa kuli Satana. Ubu bupusano bwalilandwapo mu citabo ca kuloshako icaishibikwa. Pa kulanda pa mibombele ya kwa Satana iyalondololwa mwi buuku lya mu Baibolo ilya kwa Yobo, icitabo ca Encyclopædia Britannica (1970) citila: ‘Umulimo wa kwa Satana wa kusabanta pe sonde no kufwaya imilimo imo nelyo abantu abo engabepesha ukucito bubi; kanshi umulimo wakwe wapusana no wa “menso ya kwa Shikulu,” ayabebeta mwi sonde yalekosha bonse abacito busuma ([2 Imilandu 16:9]). Satana alisuula ubusuma bwa bantunse ubwabula akaso kabili Lesa alisuminisha ukubwesha. Lelo alamusopa kabili alimupimina umwa kupelela.’ We bupusano we!—Yobo 1:6-12; 2:1-7.

2, 3. (a) Bushe ubupilibulo bwe shina “Kaseebanya” bulangwa shani bwino bwino ku cacitikile Yobo? (b) Bushe Baibolo ilanga shani ukuti Satana alitwalilila ukubepesha ababomfi ba kwa Yehova aba pe sonde?

² Ishiwi lya ciGriki ilyapilibulwa “Kaseebanya” lyafuma kwi shiwi lipilibula “uubepesha bambi,” “uwa bukwakwa.” Ibuuku lya kwa Yobo lisokolola ukuti Satana abepeshe umubomfi wa kwa Yehova Yobo ukuti alebombela Lesa ku mulandu wa bukaitemwe. Litila: “Bushe Yobo atiinina Lesa apa fye?” (Yobo 1:9) Ifyalembwa mwi buuku lya kwa Yobo filanga ukuti te mulandu ne fya kwesha fyakwe, Yobo apaleme sana kuli Yehova.  (Yobo 10:9, 12; 12:9, 10; 19:25; 27:5; 28:28) Pa numa ya fyamuponene, aebele Lesa ati: “Ku kuumfwa kwa kutwi nalimuumfwile, lelo nomba amenso yandi yamumona.”—Yobo 42:5.

³ Bushe Satana alileka ukubepesha ababomfi ba busumino aba kwa Lesa ukufuma mu nshita ya kwa Yobo? Iyo. Ibuuku lya Ukusokolola lilanga ukuti ino nshita ya ku mpela, Satana atwalilila ukubepesha bamunyina kwa Kristu abasubwa kabili ukwabula no kutwishika na bakabomba banabo aba busumino. (2 Timote 3:12; Ukusokolola 12:10, 17) Kanshi, kuli ukukabila kukalamba ukwa kuti ifwe bonse fwe Bena Kristu ba cine tulambe kuli Lesa wesu uusakamana, Yehova, ukumubombela ku kutemwa kwashika no kushinina ukuti ukutunga kwa kwa Satana kwa bufi. Nga tulecite fyo, tuli no kulengo mutima wa kwa Yehova ukusamwa.—Amapinda 27:11.

Yehova Afwaya Ukutwafwa

4, 5. (a) Finshi Yehova afwaya pe sonde, ukupusana na fintu Satana afwaya? (b) Nga tuli no kumona ububile bwa kwa Yehova, cinshi tulingile ukucita?

⁴ Kaseebanya asabanta pe sonde, ukufwaya uwa kubepesha no wa kulya. (Yobo 1:7, 9; 1 Petro 5:8) Lelo Yehova wena, afwaya ukwafwa abakabila ubukose bwakwe. Kasesema Hanani aebele Imfumu Asa ati: “Amenso ya kwa Yehova yalolo ku no ku yalabebeta mu calo conse ku kuilango kuti wa maka ku kwafwa ababa ne mitima ya mpomfu kuli wene.” (2 Imilandu 16:9) Mwandini paliba ubupusano pa kuceeceeta kwa kwa Satana ukwabamo ulupato no kusakamana kwabamo ukutemwa ukwa kwa Yehova!

⁵ Yehova tatulengula pa kuti atusangilishe mu cilubo cimo. Kemba wa malumbo alembele ati: “Amampuulu nga mwayamwensekesha, mwe Yehova, mwe Shikulu, nani uwingeminina?” (Amalumbo 130:3) Icasuko kuti caba ca kuti: tapali. (Lukala Milandu 7:20) Nga twapalama kuli Yehova ne mitima ya mpomfu, amenso yakwe yakaba pali ifwe, te ku kutupeela umulandu iyo, lelo ku kumona imilimo yesu no kwasuka amapepo ayo tupepela ukwafwa no kulekelelwa imembu. Umutumwa Petro alembele ati: “Amenso ya kwa Shikulu yalola pa balungami, na matwi yakwe yomfwo kupaapaata kwabo; lelo icinso ca kwa Shikulu calukila abacite fibi.”—1 Petro 3:12.

6. Bushe umulandu wa kwa Davidi utusansamusha shani e lyo no kutusoka?

⁶ Davidi aali uushapwililika kabili alibembwike icabipisha. (2 Samwele 12:7-9) Lelo alipongolwele ifya mu mutima wakwe kuli Yehova no kupalama kuli wene mwi pepo lya kufuma ku mutima. (Amalumbo 51:1-12, amashiwi ya pa muulu) Yehova alyumfwile ipepo lyakwe no kumulekelela, nangula Davidi aliponenwe na mafya yafumine mu lubembu lwakwe. (2 Samwele 12:10-14) Ici cifwile ukutusansamusha no kutusoka. Ca kusansamusha ukwishiba ukuti Yehova alaitemenwa ukulekelela imembu shesu nga cine cine natulapila, lelo cintu cakakala ukwishiba ukuti imembu shilafumamo ifintu fyabipa. (Abena Galatia 6:7-9) Nga tulefwaya ukupalama kuli Yehova, tulingile ukutaluka nga nshi ku cili conse icingabipa mu menso yakwe.—Amalumbo 97:10.

Yehova Alakula Abantu Bakwe Ukuya Kuli Wene

7. Bantu ba musango nshi Yehova alolekesha, kabili abakulila shani ku mwine?

⁷ Davidi alembele muli lumo ulwa sha malumbo yakwe ati: “Yehova alisansabala, lelo alolesha abasokopala, na batakalala abeshibilo kutali.” (Amalumbo 138:6) Ulwa malumbo na lumbi lulanda ifyapalako ati: “Nani uwaba nga Yehova Lesa wesu, uwasansama ku kwikala mu myulu, alolesha apatali pa myulu na pe sonde? Emyo mulanda mu lukungu, no kusumbulo mubusu ukufuma pa cishala.” (Amalumbo 113:5-7) Cine cine, Kabumba wa maka yonse uwabumbile ububumbo bonse alaibwesha pa nshi ku kulolesha pe sonde, na menso yakwe yamona “abasokopala,” “ababusu,” abantu “abateta no kulila pa fya muselu fyonse ifilecitwa.” (Esekiele 9:4) Alakula aba musango yo ukuya kuli wene ukubomfya Umwana wakwe. Ilyo Yesu aali pe sonde, atile: “Takuli uwingesa kuli ine, kano Tata uwantumine amukula . . . Takuli uwingesa kuli ine, kano apeelwa fye kuli Tata.”—Yohane 6:44, 65.

8, 9. (a) Mulandu nshi bonse tukabila ukwisa kuli Yesu? (b) Cinshi caba icapulamo sana pa kuteyanya kwa cilubula?

 ⁸ Abantunse bonse balingile ukwisa kuli Yesu no kutetekela ilambo lya cilubula pantu bafyelwe ababembu, abanunuka kuli Lesa. (Yohane 3:36) Bakabila ukuwikishiwa kuli Lesa. (2 Abena Korinti 5:20) Lesa tapembelele ukuti ababembu bamupaapaate pa kuti apekanye inshila ya kuti babe pa mutende na wene. Umutumwa Paulo alembele ati: “Lesa asokololo kututemwa kwakwe kwine, pa kuti ilyo twali tucili ababembu Kristu alitufwilile. Pantu nga twaba abawikishishiwa kuli Lesa pa mulandu wa mfwa ya Mwana wakwe ilyo twali abalwani, pali bufi apo twawikishiwa tukapusukila mu mweo wakwe.”—Abena Roma 5:8, 10.

⁹ Umutumwa Yohane aikeshe ici cishinka capulamo ica kuti Lesa awikisha abantunse ku mwine ilyo alembele ati: “Muli ici e mwasokolwelwo kutemwa kwa kwa Lesa muli ifwe, mu kuti Lesa natuma Mwane uwafyalwa eka ukuti ese pano isonde, ukuti tube no mweo muli wene. E muli ukutemwa, te mu kuti ifwe twatemenwe Lesa, lelo mu kuti wene atemenwe ifwe, no kutuma Mwane icikonsolwelo ca pa membu shesu.” (1 Yohane 4:9, 10) Lesa e waitendekele, te muntunse iyo. Bushe ico tacimulenga ukuyumfwa abakulilwa kuli Lesa uwatemenwe “ababembu,” kabili abali “abalwani”?—Yohane 3:16.

Tulekabila Ukufwaya Yehova

10, 11. (a) Cinshi tufwile ukucita pa kufwaya Yehova? (b) Bushe tufwile ukumona shani ubwikashi bwa kwa Satana?

¹⁰ Nga fintu twaishiba, Yehova tatupatikisha ukuya kuli wene. Tufwile ukumufwaya, ‘ukupampanta no kumusanga.’ Lelo na cine taba kutali kuli ifwe bonse. (Imilimo 17:27) Tufwile ukwishiba ukuti Yehova alikwata insambu ya kutweba ukuti tulemunakila. Umusambi Yakobo alembele ati: “E ico lambeni [“nakileni,” NW] kuli Lesa; lelo kaaneni Kaseebanya, na o akafulumuka kuli imwe. Palameni kuli Lesa, na o alapalama kuli imwe. Sangululeni iminwe yenu, mwe babembu; sangululeni imitima yenu, mwe ba mitima ibili.” (Yakobo 4:7, 8) Tatufwile ukushingashinga ukulwisha Kaseebanya no kushangila ku lubali lwa kwa Yehova.

¹¹ Ici cipilibula ukuti tufwile ukuitalusha ku bwikashi bubifi ubwa kwa Satana. Yakobo alembele no kuti: “Bushe tamwaishibo kuti ukuba na bucibusa ne calo bulwani kuli Lesa? E ico uyo afwayo kuba bucibusa ne calo aicito mulwani kuli Lesa.” (Yakobo 4:4) Lelo, nga tulefwaya ukuba ifibusa fya kwa Yehova, tufwile ukwenekela ukuti icalo ca kwa Satana cili no kutupata.—Yohane 15:19; 1 Yohane 3:13.

12. (a) Mashiwi nshi aya kusansamusha Davidi alembele? (b) Kusoka nshi Yehova asokele ukubomfya kasesema Asaria?

¹² Ilyo icalo ca kwa Satana catulwisha mu nshila imo, tulekabila sana ukupalama kuli Yehova mwi pepo, ukulomba ukuti atwafwe. Davidi, uwapusushiwepo kuli Yehova imiku ne miku, alembele ifya kutusansamusha ati: “Yehova ali mupepi kuli bonse abalilila kuli wene, kuli bonse abalilila kuli wene mu cishinka; ukufwaya kwa bamutiina, wene alakucita, ne nkuuta yabo ayumfwa, no kubapususha; Yehova abaka bonse abamutemwa, lelo ababifi bonse alabafita.” (Amalumbo 145:18-20) Ulu ulwa malumbo lulanga ukuti Yehova kuti atupususha  ilyo twaeshiwa pa lwesu no kuti akapokolola abantu bakwe nge bumba mu nshita ya “bucushi bukalamba.” (Ukusokolola 7:14) Yehova akapalama kuli ifwe nga twapalama kuli wene. Kasesema Asaria pa kutungululwa no “mupashi wa kwa Lesa” alandile ico twingamona nge cine icikuma fyonse ati: “Yehova ali kuli imwe ilyo imwe muli kuli wene; nga mwamufwaya, kuti asangwa kuli imwe; lelo, nga mwamusuula kuti asuula na imwe.”—2 Imilandu 15:1, 2.

Yehova Afwile Ukuba Uwa Cine Cine Kuli Ifwe

13. Kuti twalanga shani ukuti Yehova wa cine cine kuli ifwe?

¹³ Umutumwa Paulo alembele ulwa kwa Mose ati “akoselele ngo umone Mfumu iishimoneka.” (AbaHebere 11:27) Twalipwa no kwishiba ukuti Mose tamwene Yehova icine cine. (Ukufuma 33:20) Lelo Yehova aali uwa cine cine kuli wene ica kuti cali kwati Alemumona. E fyo cali na kuli Yobo, pa numa ya fya kwesha fyakwe, ku citetekelo amwene Yehova bwino bwino, ukuti ni Lesa uuleka ababomfi bakwe aba busumino ukuponenwa ne fya kwesha lelo uushibalekelesha. (Yobo 42:5) Pa lwa kwa Enoke na Noa casoselwe aciti ‘baleenda na Lesa.’ Balecite fi ukupitila mu kufwaya ukutemuna Lesa no kumumfwila. (Ukutendeka 5:22-24; 6:9, 22; AbaHebere 11:5, 7) Nga ca kuti Yehova aba uwa cine cine kuli ifwe nga fintu aali kuli Enoke, Noa, Yobo, na Mose, tuli no ‘kumwishiba’ konse uko twenda, na o “akatambalike nshila [shesu].”—Amapinda 3:5, 6.

14. Bushe ‘ukulambatila’ kuli Yehova e kutila shani?

¹⁴ Ilyo abena Israele bali mupepi no kwingila mu Calo Calaiwe, Mose abafundile ati: “Yehova Lesa wenu e o mukalekonka, kabili wene e o mukaletiina, kabili amafunde yakwe e yo mukalebaka, ne shiwi lyakwe e lyo mukaleumfwa,  kabili e o mukalebombela, na kuli wene e ko mukalelambatila.” (Amalango 13:4) Bali no kukonka Yehova, ukumutiina, ukumumfwila, no kulambatila kuli wene. Pa lwe shiwi lyapilibulwa pano ati ‘ukulambatila,’ uwasoma ifya Baibolo umo alondolola ukuti “ululimi [lwabomfiwa pano] lulangilila bucibusa bwa pa mutima kabili ubwe senge.” Kemba wa malumbo atile: “Isenge lya kwa Yehova lili ku bamutiina.” (Amalumbo 25:14) Kuti twaba no bu bucibusa bwawamisha, ubwa pa mutima na Yehova nga ca kuti aba uwa cine cine kuli ifwe kabili nga twamutemwa nga nshi ica kuti twalatiina ukumufulwisha mu nshila iili yonse.—Amalumbo 19:9-14.

Bushe Mwalibukila Ukusakamana kwa kwa Yehova?

15, 16. (a) Bushe Amalumbo 34 yalanga shani ukuti Yehova alatusakamana? (b) Kuti twacita shani nga catukosela ukwibukisha ubusuma bumo Yehova atucitiile?

¹⁵ Umo uwa micenjelo ya kwa Satana waba wa kwesha ukutulafya ku cishinka ca kuti Lesa wesu, Yehova, lyonse asakamana ababomfi bakwe aba busumino. Imfumu Davidi iya mu Israele yalishibe bwino ifyo Yehova acingilila na pa nshita yakwete sana amafya. Ilyo apatikishiwe ukuifungushanya nge shilu pa ntanshi ya Mfumu Akishi iya Gati, ashikile ulwimbo lwa malumbo ulusuma, ulwalimo aya mashiwi ya kulanga icitetekelo aya kuti: “Aleni na ine tutashe Yehova, no kutondela pamo ishina lyakwe. Nafwaile Yehova, na o alinjaswike, na mu fya kunengo munsokwe fyonse alimpokolwele. Malaika wa kwa Yehova acite nkambi ukushinguluka pa bamutiina, no kubapokolola. Sondeni no kumono kuti aliwama Yehova; alishuko muntu uuba muli wene. Yehova aba mupepi na ku baputuke misana, kabili abafunshike mitima alabapususha; ifibi ifiponeno walungama fingi, lelo kuli ifyo fyonse Yehova alamupokolola.”—Amalumbo 34:3, 4, 7, 8, 18, 19; 1 Samwele 21:10-15.

¹⁶ Bushe mwalishininwa ulwa maka ya kwa Yehova aya kupususha? Bushe mwalibukila ulwa bucingo bwakwe ukubomfya bamalaika? Bushe pa lwenu mwalisonda no kumono kuti  aliwama Yehova? Ni lilali mwalekeleshe ukwibukila ukuti Yehova alimucitile ifisuma? Esheni ukwibukisha. Bushe cali ni pa ng’anda ya kulekelesha mwaile mu butumikishi, ilyo fye mwalefwaya ukwinuka? Napamo ilyo mwaile pali yo ng’anda mwalilanshenye bwino sana na mwine ng’anda. Bushe mwalibukishe ukutasha Yehova pa kumupa amaka na yambi ayalekabilwa na pa kumupaala? (2 Abena Korinti 4:7) Lubali lumbi, napamo kuti camukosela ukwibukisha ubusuma bumo ubo Yehova amucitiile. Napamo kuti mwapituluka mu mulungu umo, umweshi, nelyo umwaka umo, nelyo iingi. Nga ni fyo, mulandu nshi te ti mubombeseshe ukupalama kuli Yehova no kwesha ukumona ifyo amutungulula? Umutumwa Petro akonkomeshe Abena Kristu ati: “Ipetamikeni mwi samba lya kuboko kwa maka kwa kwa Lesa . . . amasakamika yenu yonse bikeni pali wene, pa kuti asakamana imwe.” (1 Petro 5:6, 7) Cine cine, muli no kupapa ukumona ifyo amusakamana!—Amalumbo 73:28.

Twalilileni Ukufwaya Yehova

17. Cinshi cifwaikwa nga tuli no kutwalilila ukufwaya Yehova?

¹⁷ Ukusungilila bucibusa bwesu na Yehova cintu cifwile ukutwalilila. Mwi pepo kuli Wishi, Yesu atile: “Awe uyu e mweo wa muyayaya, ukuti bamwishibe, mwe Lesa wine wine mweka, no yo mwatumine, ni Yesu Kristu.” (Yohane 17:3) Pa kusambilila ulwa kwa Yehova no Mwana wakwe kano twabombesha. Tukabila ubwafwilisho bwe pepo no mupashi wa mushilo ku kumfwikisha “ifyashika fya kwa Lesa.” (1 Abena Korinti 2:10; Luka 11:13) Na kabili tukabila ubutungulushi bwa “musha wa cishinka kabili uwashilimuka” pa kuliisha amatontonkanyo yesu ica kulya ca ku mupashi icipeelwa “mu nshita iyene.” (Mateo 24:45) Ukupitila muli ulya musha, Yehova alitweba ukulabelenga Icebo cakwe cila bushiku, ukusangwa ku kulongana kwa Bwina Kristu lyonse, no kubombako no mukoosha umulimo wa kushimikila “mbila nsuma iyi ya bufumu.” (Mateo 24:14) Nga tulecite fyo, tukatwalilila ukufwaya Lesa wesu uusakamana, Yehova.

18, 19. (a) Cinshi tulingile ukupampamina ukucita? (b) Bushe nga twashangila ku kulwisha Kaseebanya no kutwalilila ukufwaya Yehova, tukapaalwa shani?

¹⁸ Satana alebombesha na maka yakwe yonse ukuletela abantu ba kwa Yehova ukupakasa, ukukaanya, na mafya ukufuma konse konse. Aleesha ukupumfyanya umutende wesu no konaula ukwiminina kwesu ukusuma pa cinso ca kwa Lesa. Tafwaya ukuti tutwalilile umulimo wesu uwa kusanga aba mitima ya bufumacumi no kubafwa ukwisa ku lubali lwa kwa Yehova muli ifi fikansa fya bumulopwe bwa mu kubumbwa konse. Lelo tufwile ukupampamina pa kuba aba cishinka kuli Yehova, ukumucetekela ukuti akatupokolola ku mubifi. Nga twaleka Icebo ca kwa Lesa ukututungulula no kutwalilila ukulabomba mu kuteyanya kwakwe ukumoneka, teti tutwishike no kutwishika ukuti lyonse akalatutungilila.—Esaya 41:8-13.

¹⁹ Kanshi, shi ifwe bonse natube abashangila mu kukaana Kaseebanya ne micenjelo yakwe, lyonse tulefwaya Lesa wesu uo twatemwa, Yehova, uushakafilwe ‘ukutwikasha, no kutukosha.’ (1 Petro 5:8-11) Nga tulecite fyo, tuli no ‘kuibakila mu kutemwa kwa kwa Lesa, no kulolelo luse lwa kwa Shikulwifwe Yesu Kristu ulwalola ku mweo wa muyayaya.’—Yuda 21.

Bushe Kuti Mwayasuka Shani?

• Bushe ishiwi lya ciGriki ilyapilibulwa “Kaseebanya” lyalola mwi, kabili bushe Kaseebanya acita shani umwabele shina lyakwe?

• Bushe Yehova apusaninina shani na Kaseebanya pa fyo Abebeta abekashi ba pe sonde?

• Mulandu nshi umuntu afwile ukupokelela icilubula pa kupalama kuli Yehova?

• Bushe ‘ukulambatila’ kuli Yehova e kutila shani, kabili kuti twatwalilila shani ukumufwaya?

[Amepusho]

[Icikope pe bula 15]

Yobo atesekeshe ukuti Yehova alemusakamana te mulandu ne fya kwesha fyamuponene

[Ifikope pe bula 16, 17]

Ukubelenga Baibolo cila bushiku, ukusangwa ku kulongana kwa Bwina Kristu lyonse, no kubombako umulimo wa kushimikila no kupimpa filatucinkulako ukuti Yehova alatusakamana