“Mwende Bwino mu Bena Fyalo”
“Mwende Bwino mu Bena Fyalo”
“Cindikeni abantu bonse. Temweni aba bwananyina.”—1 PETRO 2:17.
1, 2. (a) Finshi kalemba wa nyunshipepala umo alandile pa Nte sha kwa Yehova? (b) Mulandu nshi Inte sha kwa Yehova besesha na maka ukuba ne mibele ya pa muulu iisuma?
IMYAKA iingi iyapita, kalemba wa nyunshipepala mu Amarillo, ku Texas, mu U.S.A., aile ku macalici yapusanapusana no kulemba ifyo afwailishe. Ibumba limo lyalimupeseshe amano. Atile: “Pa myaka itatu, nalesangwa ku kubungana kwa pa mwaka ukwa Nte sha kwa Yehova pa Amarillo Civic Center. Ilyo naleba mu kati kabo, nshatalilemona uuli onse ukusonteka umushanga wa fwaka, ukunwa ubwalwa, nelyo ukuponta. E bantu ba busaka sana, abaicindika sana, abafwala mucinshi mucinshi, ukucila bonse abo namonapo.” Ifyebo fyapale fi ilingi line filalembwa pa lwa Nte sha kwa Yehova. Mulandu nshi Inte babatashisha libili libili ku bantu abo bashipepa na bo?
2 Ilingi, icilenga abantu ba kwa Lesa ukutashiwa myendele yabo iisuma. Ilintu imibele mu cinkumbawile ilebwelela pa nshi, Inte sha kwa Yehova shimona ukuti shifwile fye ukuba ne mibele ya pa muulu mu myendele, shimona ici ngo lubali lwa kupepa kwabo. Balishiba ukuti ifyo bacita filenga abantu ukutontonkanyapo fimo pali Yehova na pali bamunyinabo ba Bwina Kristu no kuti imyendele yabo isuma ilanga ukuti icine basambilisha cisuma. (Yohane 15:8; Tito 2:7, 8) Natumone kanshi, ifyo twingalaenda bwino no kutwalilila ukutungilila ishina lisuma ilya kwa Yehova ne Nte shakwe ne fyo twingamwenamo mu kucite fyo.
Mu Lupwa lwa Bwina Kristu
3. Ni kuli finshi indupwa sha Bwina Kristu shilingile ukucingililwa?
3 Tontonkanyeni pa myendele yesu mu lupwa. Icitabo citila Die Neuen Inquisitoren: Religionsfreiheit und Glaubensneid (Aba Kufwailisha Bapya: Amaipepele no Kukumbwa Imipepele), ica kwa Gerhard Besier na Erwin K. Scheuch, cilondolola ati: “Ku [Nte sha kwa Yehova] ulupwa lulingile ukucingililwa sana.” Ico cebo ca cine, kabili lelo kwaba ifya busanso ifingi ifyo indupwa shilingile ukucingililwako. Kwaba abana “aba bucintomfwa ku bafyashi” na bakalamba “abaumalala” nelyo “ababulo kuiteka.” (2 Timote 3:2, 3) Mu lupwa mulaba ukupuma abena mwabo, abafyashi balaponta, ukupuma, nelyo ukucenda abana atemwa ukubalekelesha, kabili abana balapondoka, balabomfya imiti ikola no kuitumpa muli bucisenene, nelyo ukubutuka pa ng’anda. Icalenga ifi fyonse caba ‘mupashi wa calo cino’ uonaula. (Abena Efese 2:1, 2) Tulingile ukucingilila indupwa shesu kuli uyo mupashi. Kuti twashicingilila shani? Pa kumfwila ukufunda kwa kwa Yehova no butungulushi bwakwe ku ba mu lupwa.
4. Milimo nshi aba mu lupwa lwa Bwina Kristu bakwata kuli umo no munankwe?
4 Abena Kristu baupana balishiba ukuti bafwile ukusakamanana mu nkuntu, lwa ku mupashi, na mu fya ku mubili. (1 Abena Korinti 7:3-5; Abena Efese 5:21-23; 1 Petro 3:7) Abafyashi Abena Kristu balikwata umulimo ukalamba ku bufyashi bwabo. (Amapinda 22:6; 2 Abena Korinti 12:14; Abena Efese 6:4) Kabili ilyo abana mu ndupwa sha Bwina Kristu baleya balekula, basambilila ukuti na bo balikwata imilimo. (Amapinda 1:8, 9; 23:22; Abena Efese 6:1; 1 Timote 5:3, 4, 8) Pa kufishapo imilimo ya mu lupwa kano kuli ukubombesha, umupampamina, no kutemwa pamo no kuipeelesha. Lelo, nga ca kuti aba mu lupwa bonse bafishapo imilimo yabo iyapeelwa na Lesa, e lyo bengaba ifibombelo mu bene na bene na ku cilonganino. Ne cacilapo ca kuti, bacindika Katendeka wa lupwa, Yehova Lesa.—Ukutendeka 1:27, 28; Abena Efese 3:15.
Bumunyina bwa Bwina Kristu
5. Tumwenamo shani mu kubishanya na Bena Kristu banensu?
5 Apo tuli Bena Kristu, na ifwe twalikwata imilimo ya kubombela abasumina banensu mu cilonganino, na kuli pele pele, kuli bonse aba ‘bamunyinefwe ba pano isonde.’ (1 Petro 5:9) Ukubishanya kwesu ne cilonganino kwalicindama nga tuli no kuba abatuntulu lwa ku mupashi. Ilyo tulebishanya na basumina banensu, tulaipakisha bucibusa bwa kutukosha pamo ne filyo fisuma ifya ku mupashi ukufuma ku “musha wa cishinka kabili uwashilimuka.” (Mateo 24:45-47) Nga twaba na mafya, kuti twaya kuli bamunyinefwe ukuti batupandeko amano yasuma ayashimpwa pa fishinte fya mu Malembo. (Amapinda 17:17; Lukala Milandu 4:9; Yakobo 5:13-18) Ilyo twabulwa bamunyinefwe tabatulekelesha. Mwandi caba lipaalo ukuba mu kuteyanya kwa kwa Lesa!
6. Bushe Paulo alangile shani ukuti twalikwata umulimo ku Bena Kristu banensu?
6 Lelo, tatwaba mu cilonganino ku kupokelela fye; na ifwe tufwile ukupeela. Na kuba, Yesu atile: “Ukupeela ce shuko ukucilo kupokelela.” (Imilimo 20:35) Umutumwa Paulo akomaile pa kuitemenwa ukupeela ilyo alembele ati: “Twikatishe ukulumbula kwa kucetekela kwesu no kukanaungwaungwa (pantu wa cishinka uwalaile); kabili twetetule umwa kucincimushanisha ku kutemwa kabili ku kubombe milimo isuma; twiba abaleko kulongana, ifyo wabo musango wa bamo, lelo tukonkomeshanye, pali bufi apo mulemono Bushiku bulya bulepalama.”—AbaHebere 10:23-25.
7, 8. Tulanga shani ukuti twaliitemenwa ukupeela mu cilonganino na ku Bena Kristu mu fyalo fimbi?
7 Mu cilonganino, ‘tulumbula ukucetekela kwesu’ ilyo tuleasuka pa kulongana no kuisansha muli programu mu nshila shimbi. Uko kubombesha cine cine kulakosha bamunyinefwe. Tubakoselesha no kupitila mu kulanshanya pa ntanshi na pa numa ya kulongana. Iyo e nshita twingakosha abanaka, ukusansamusha abatompoke mitima, no kusansamusha abalwala. (1 Abena Tesalonika 5:14) Abena Kristu bafumaluka balapeelesha ifya musango yo, ne co e cilenga abengi nga nshi abasangwa ku kulongana kwesu pa muku wa kubalilapo ukutemwa nga nshi ku kutemwa bamona pa kati kesu.—Amalumbo 37:21; Yohane 15:12; 1 Abena Korinti 14:25.
8 Na lyo line, ukutemwa kwesu te kwa kutemwa aba mu cilonganino cesu epela. Kusanshamo aba bwananyina bonse pano isonde. E mulandu wine, ku ca kumwenako, kwabela akabokoshi mu Ng’anda ya Bufumu imo na imo aka kupoosamo imisangulo ya Ndalama sha Ng’anda ya Bufumu. Napamo Ing’anda yesu iya Bufumu yaba fye bwino, lelo twalishiba ukuti kwaba Abena Kristu banensu mu fyalo fimbi abashakwata ukwa kulonganino kusuma. Ilyo twasangula imisangulo ya Ndalama sha Ng’anda ya Bufumu, tulanga ukuti twalitemwa aba musango yo nangula tatwabeshiba pa lwesu.
9. Mulandu nshi ukalamba Inte sha kwa Yehova batemwanina?
9 Mulandu nshi Inte sha kwa Yehova batemwanina? E fyo Yesu abebele ukucita. (Yohane 15:17) Kabili ukutemwa batemwana bwaba bushininkisho bwa kuti umupashi wa kwa Lesa ulebomba pali bene umo umo na pali bonse bene nge bumba. Ukutemwa kwaba mu “fisabo fya Mupashi.” (Abena Galatia 5:22, 23) Ilyo Inte sha kwa Yehova balesambilila Baibolo, ukusangwa ku kulongana kwa Bwina Kristu, ukupepa lyonse kuli Lesa, ukutemwa kuba fye ngo kwa cifyalilwa te mulandu no kwikala mu calo umo ‘ukutemwa kwa bengi kwashibantukila.’—Mateo 24:12.
Ifya Kucita mwi Sonde Twikala
10. Mulimo nshi twakwata kwi sonde twikalamo?
10 “Ukulumbula kwa kucetekela kwesu” uko Paulo alandilepo kutucinkulako ulwa mulimo na umbi. Uku kulumbula kwa kucetekela kusanshamo umulimo wa kushimikila imbila nsuma ku bashilaba bamunyinefwe ba Bwina Kristu. (Mateo 24:14; 28:19, 20; Abena Roma 10:9, 10, 13-15) Uku kushimikila na ko kwaba kupeela. Ififwaikwa pa kubombako uyu mulimo ni nshita, amaka, ukupekanya, ukukanshiwa, no kubomfya ifintu fyesu. Lelo, Paulo alembele no kuti: “Ku bena Hela na batuutu pamo, ku ba mano na bapelwa amano pamo, ndi wa misha. Ifyo fine ndi no mutima uwasantuka ukubile mbila nsuma na kuli imwe, mwe ba mu Roma.” (Abena Roma 1:14, 15) Na ifwe ukupala Paulo, twilaba na butani ilyo tulebwesha iyi “misha.”
11. Fishinte nshi fibili ifya mu Malembo ifitwafwa ukukuma ku kwampana kwesu ne sonde, nangu ni fyo finshi twaishiba?
11 Bushe kwaba imilimo imbi twakwata ku bashilaba abasumina banensu? Cine cine. Kwena, twalishiba ukuti “pano isonde ponse palaala mu maka ya Mubifi.” (1 Yohane 5:19) Twalishiba ukuti Yesu alandile ulwa basambi bakwe ati: “Tabali ba pano isonde, ifyo na ine nshili wa pano isonde.” Na lyo line, twikala mwi sonde, e mo tubomba pa kuti tusange umwa kuliila, kabili aba pano isonde balatubombela na fimo. (Yohane 17:11, 15, 16) E ico twalikwata imilimo ukukuma kuli lino isonde. Milimo nshi? Umutumwa Petro alyaswike ilyo lipusho. Ilyo kwashele imyaka inono pa kuti Yerusalemu onaulwe, alembeele Abena Kristu ba mu Asia Minor kalata, kabili ifyebo fimo muli ulya kalata filatwafwa ukwishiba umwa kupelela pa kubomba na lino isonde.
12. Ni mu nshila nshi Abena Kristu baba “abeni kabili abalebeshi,” kabili apo babe fyo, finshi bafwile ukutalukako?
12 Pa kubala, Petro atile: “Mwe batemwikwa, ndemupaapaata, pa kuti muli beni kabili abalebeshi, mutalukeko ku fya lunkumbwa lwa mubili, ifilwa no [mweo, NW].” (1 Petro 2:11) Abena Kristu ba cine, lwa ku mupashi, baba “beni kabili abalebeshi” pantu ico batontapo sana mu bumi bwabo caba lisubilo lya mweo wa muyayaya—ku basubwa mu muulu, e lyo ku “impaanga shimbi” muli paradise wa pe sonde ku ntanshi. (Yohane 10:16; Abena Filipi 3:20, 21; AbaHebere 11:13; Ukusokolola 7:9, 14-17) Lelo, bushe ifya lunkumbwa lwa mubili e finshi? Ifi fyaba fintu pamo nga ukukumbwa ukuba ne cuma, ukukumbwa ukulumbuka, ukukumbwa bucisenene, no lunkumbwa lwalondololwa nga “akalumwa.”—Abena Kolose 3:5; 1 Timote 6:4, 9; 1 Yohane 2:15, 16.
13. Ni mu nshila nshi ifya lunkumbwa fya mubili ‘filwa no mweo wesu’?
13 Ulunkumbwa lwa musango yo kwena ‘lulwa no mweo wesu.’ Filonaula bucibusa bwesu na Lesa ne co cilenga isubilo lyesu ilya Bwina Kristu (e kutila “umweo” wesu) waba mu busanso. Ku ca kumwenako, nga ca kuti twatemwisha ifya bucisenene, kuti twaituula shani “bulilambo bwa mweo, ubwa mushilo, ubwa kutemuna Lesa”? Nga ca kuti twaikatwa mu citeyo ca kutemwa ifyuma, bushe ninshi ‘tulebala ukufwaya ubufumu’? (Abena Roma 12:1, 2; Mateo 6:33; 1 Timote 6:17-19) Inshila isuma yaba kukonka ica kumwenako ca kwa Mose, ukufutatila ifya kubeleleka fye sonde, no kutangishako umulimo wa kwa Yehova mu bumi bwesu. (Mateo 6:19, 20; AbaHebere 11:24-26) Ico cintu cacindama sana mu kuba na bucibusa bwalinga na lino isonde.
‘Endeni Bwino’
14. Mulandu nshi Abena Kristu besesha na maka ukwenda bwino?
14 Cimbi ica kututungulula cacindama cisangwa mu mashiwi Petro akonkeshepo aya kuti: “Mwende bwino mu Bena fyalo; ukuti, umo bamupontelela kwati muli ncitatubi, bacindike Lesa mu bushiku bwa cipempu pa kuloleshe milimo yenu isuma.” (1 Petro 2:12) Apo tuli Bena Kristu, tuleesha na maka ukuba ifya kumwenako. Ku sukulu tulapoosako amano. Uko tubomba, tulapikintika no kuba abafumacumi—nangula abatwingishe ncito bantu bayafya ukutemuna. Ababa mu mayanda ya kuti umwina mwabo untu ushasumina, abalume nelyo abakashi balabombesha na maka sana ukukonka ifishinte fya Bwina Kristu. Tacayanguka lyonse, lelo twalishiba ukuti imyendele yesu isuma ilatemuna Yehova kabili ilingi ilatemuna abashili Nte.—1 Petro 2:18-20; 3:1.
15. Twaishiba shani ukuti abantu abengi sana balishiba imibele yawamisha iya Nte sha kwa Yehova?
15 Uko cimonekela ukuti Inte sha kwa Yehova abengi baba ne mibele isuma ni ku fyalandilwe pali bene imyaka iingi iyapitapo. Ku ca kumwenako, inyunshipepala ya Il Tempo iya ku Italy yashimike ukuti: “Abantu ababomba ne Nte sha kwa Yehova batila bafumacumi, balishininwa ulwa fisumino fyabo ica kuti kuti bamoneka nga baobelwa kuli fyene; lelo, bafwile ukucindikwa pa mibele yabo isuma.” Inyunshipepala ya Herald iya ku Buenos Aires, ku Argentina, yatile: “Inte sha kwa Yehova balishininkisha mu kupita kwa myaka ukuti bekashi babombesha, aba mushiye, abashonaula fintu, kabili abatiina Lesa.” Umwina Russia wasoma Sergei Ivanenko atile: “Inte sha kwa Yehova baishibikwa mu calo conse ukuti balomfwila amafunde umupwilapo kabili baishibikwa ukucilisha ku kupoosesha amano ku kusonka imisonko.” Umukalamba wa cifulo cimo ico Inte sha kwa Yehova babomfeshe ku kulonganinamo ibungano mu Zimbabwe atile: “Ndamona Inte baletoola amapepala no kuwamya ifimbusu. Icibansa cilashala ica busaka ukucila ifyo cali. Abacaice benu baliicindika. Pano calo apaba fye Inte sha kwa Yehova nga caliwama.”
Ukunakila kwa Bwina Kristu
16. Bushe imibele yesu kuli bakateka ba ku calo yaba shani, kabili mulandu nshi?
16 Petro alanda na pa mibele yesu kuli bakateka ba ku calo. Atila: “Lambeni ku cipope conse ca buntunse pa mulandu wa kwa Shikulu; nangu ni kuli mulopwe e wapulamo, nangu ni kuli bakateka, pa kuti batumwa ukufuma kuli mulopwe ku kukanda abacito bubi no kutasha abacite cisuma. Pa kuti e fyo kwaba ukufwaya kwa kwa Lesa, ukuti mutalalike ukukanaishiba kwa bantu batumpa.” (1 Petro 2:13-15) Tulatasha pa fisuma tupokelela ku mabuteko ayabomba busaka busaka, kabili pa kutungululwa na mashiwi ya kwa Petro, tulanakila amafunde no kulipila imisonko. Nangula twalishiba ukuti amabuteko yalikwata insambu shapeelwa na Lesa isha kukanda bampulamafunde, icikalamba cilenga tunakile bakateka ba ku calo “mulandu wa kwa Shikulu.” Kufwaya kwa kwa Lesa. Kabinge, tatufwaya ukuseebanya ishina lya kwa Yehova ukupitila mu kukandwa nge ncitatubi.—Abena Roma 13:1, 4-7; Tito 3:1; 1 Petro 3:17.
17. Ilyo “abantu batumpa” batulwisha, cinshi tushakatwishike no kutwishika?
17 Ku ca bulanda, “abantu batumpa” bamo aba mu bateka balatupakasa nelyo ukutukaanya mu nshila shimbi—pamo ngo kupitila mu kukubanya ubufi pali ifwe. Na lyo line, mu nshita ya kwa Yehova umwine, ubufi bwabo lyonse bulasansalikwa, kabili ukulanda kwabo ukwa “kukanaishiba” ‘kulatalalikwa’ umupwilapo. Imyendele yesu ukufuma kale na kale yaba bunte bwa kulanga abalande cine. E mulandu wine abalashi ba bufumacumi aba mu buteko ilingi batutashisha pa kucito busuma.—Abena Roma 13:3; Tito 2:7, 8.
Abasha ba kwa Lesa
18. Pamo nga Bena Kristu, ni mu nshila nshi twingasengaukila ukubomfya bubi bubi ubuntungwa bwesu?
18 Nomba Petro asoka ati: “Ikaleni nga bantungwa, lelo te kukwato buntungwa nga kabepesho ka kucitilamo ububi, lelo mwikale nga basha ba kwa Lesa.” (1 Petro 2:16; Abena Galatia 5:13) Ilelo, ukwishiba twaishiba icine ca mu Baibolo kulatulubula ku fisambilisho fya kupepa kwa bufi. (Yohane 8:32) Kabinge, tulaisalila, kabili kuti twasala ifyo tulefwaya. Na lyo line, tatubomfya bubi bubi ubuntungwa bwesu. Ilyo tulesala ifibusa, ifya kufwala, imisakwile, ifya kusekesha—nangu fye ifya kulya ne fya kunwa—tulebukisha ukuti Abena Kristu ba cine basha ba kwa Lesa, tabaitemuna abene. Tusalapo ukubombela Yehova ukucila ukuba abasha ba fya lunkumbwa lwa mubili nelyo amafashoni atemwa imibele ya cino calo.—Abena Galatia 5:24; 2 Timote 2:22; Tito 2:11, 12.
19-21. (a) Tumona shani abalashi ba ku calo? (b) Bushe bamo balanga shani ukuti ‘balitemwa aba bwananyina’? (c) Mulimo nshi uwacindamisha twakwata?
19 Petro akonkanyapo ati: “Cindikeni abantu bonse. Temweni aba bwananyina. Tiineni Lesa. Cindikeni imfumu.” (1 Petro 2:17) Apo Yehova Lesa alisuminisha abantunse ukuba ne fifulo fyalekanalekana ifya maka, na ifwe tulapeela abo bantu umucinshi wabalinga. Tulabapepela no kubapepela, pa kuti tukwate ubuntungwa bwa kutwalilila no butumikishi bwesu mu mutende kabili na bukapepa. (1 Timote 2:1-4) Lelo, no kutemwa ‘twalitemwa aba bwananyina.’ Lyonse tucita ifya kuti bamunyinefwe ba Bwina Kristu bamwenemo, te fya kubalenga ukubipilwa.
20 Ku ca kumwenako, ilyo mu calo cimo ica muno Afrika mwaimine intulubundi pa kati ka mikowa, imyendele ya Bwina Kristu iya Nte sha kwa Yehova yali iyapusanako. Inyunshipepala ya Reformierte Presse iya ku Switzerland yashimike ukuti: “Mu 1995, akabungwe [kalolekesha pa nsambu sha bantunse] aka African Rights . . . kalisangile ubushininkisho bwa kuti amacalici yonse yaliiposelemo [muli ishi ntulubundi] ukufumyako fye Inte sha kwa Yehova.” Ilyo imbila ya ifi fintu fya bulanda yafikile ku fyalo fimbi, Inte sha kwa Yehova ku Bulaya bwangu bwangu batumine ifya kulya ne miti ifya kwafwilisha bamunyinabo na bantu bambi muli cilya calo. (Abena Galatia 6:10) Baumfwilile amashiwi ya pa Amapinda 3:27 apatila: “Witana busuma ku munobe, ilyo cili mu maka ya kuboko kobe ukubucita.”
21 Lelo, kwaba umulimo wacilapo ukucindama ukucila umucinshi tufwile ukupeela bakateka ba ku calo kabili no kutemwa ukwacila pa kutemwa tufwile ukutemwa bamunyinefwe. Mulimo nshi uyo? Petro atile: “Tiineni Lesa.” Ifyo tufwile ukucita kuli Yehova fyacila ifyo tufwile ukucita ku muntunse onse. Kuti caba shani ifyo? Kabili kuti twacita shani pa kulinganya bwino ifyo tufwile ukucitila Lesa ne fyo tufwile ukucita kuli bakateka ba ku calo? Aya mepusho yali no kwasukwa mu cipande cikonkelepo.
Bushe Muleibukisha?
• Milimo nshi Abena Kristu bakwata mu lupwa?
• Bushe kuti twalanga shani ukuti tulaitemenwa ukupeela mu cilonganino?
• Milimo nshi twakwata ukukuma kwi sonde twikalamo?
• Busuma nshi bumo ubufuma mu kuba ne myendele yawamisha?
[Amepusho]
[Icikope pe bula 9]
Bushe ulupwa lwa Bwina Kristu kuti lwaba shani intulo ya kusekelela kukalamba?
[Ifikope pe bula 10]
Mulandu nshi Inte sha kwa Yehova batemwanina?
[Ifikope pe bula 10]
Bushe kuti twatemwa bamunyinefwe nangula tatwabeshiba?