Ifipusho Ukufuma ku Babelenga

Bushe tulakakililwako inshita yonse ku milapo tulapa kuli Lesa?

Mu malembo, umulapo waba bulayo kuli Lesa ubwa kucita icintu, ukupeela umutuulo, ukutendeka umulimo waibela, nelyo ukutaluka ku fintu fimo ifishitoba ne funde. Baibolo yakwata amalyashi ya milapo yaleshintilila pali fimo mu kuti yalesanshamo icipangano ca kucita icintu cimo nga ca kuti Lesa abala acita cimo. Ku ca kumwenako, Hana, nyina kwa kasesema Samwele, ‘alapile no mulapo no kutila Mwe Yehova wa milalo, . . . nga tamwakalabe cishiko wenu, kabili mwapeela cishiko wenu umwana mwaume, e lyo nkamupeela kuli Yehova inshiku shonse sha mweo wakwe; kabili icibeyo tacakabeye ku mutwe wakwe.’ (1 Samwele 1:11) Baibolo ilondolola no kuti imilapo icitwa mu kuitemenwa. Bushe ukukakililwako ku milapo ya mu Malembo kufika pi?

Imfumu Solomone iya mu Israele wa pa kale yatile, “Ilyo walaye cilayo kuli Lesa, wishimba ku kucifisha.” Yasosa no kuti: “Ico walaya, fisha; cisuma ukukanalaya, ukucilo kulaya no kukanafisha.” (Lukala Milandu 5:4, 5) Ifunde lyapeelwe kuli Israele muli Mose litila: “Ilyo mukalapo mulapo kuli Yehova Lesa wenu, mwikashingashinga kufiishapo; pantu Yehova Lesa wenu ukulubulwisha akamulubulwishako; ukushingashinga kuti kwabo lubembu kuli imwe.” (Amalango 23:21) Caumfwika ukuti ukulapa umulapo kuli Lesa cintu icikalamba. Umuntu afwile ukulapa umulapo pa mulandu uusuma, kabili uulelapa uyo mulapo tafwile ukutwishika amaka yakwe aya kufishapo ifyo alaya. Nakana nga te ifyo, cawama ukukanalapa umulapo. Lelo, ilyo mwalapa imilapo, bushe kulaba ukukakililwako kuli iyo milapo yonse?

Ni shani nga ca kuti umulapo walengele umo ukucita icintu cimo e lyo pa numa aisaishiba ukuti tacumfwana no kufwaya kwa kwa Lesa? Tutile wali mulapo uyo mu nshila imo wampanya bucisenene no kupepa kwa cine? (Amalango 23:18) Kwena, umuntu te kuti akakililwe ku mulapo wa musango yu. Na kabili, mu Malango ya kwa Mose, umulapo umwanakashi alelapa kuti wafuutwa kuli wishi nelyo wiba.—Impendwa 30:3-15.

Tutile umuntu alapa umulapo kuli Lesa uwa kuba umushimbe lelo asanga ukuti ubushimbe bwayafya. Umulapo wakwe wamulenga aba mu mibele ya kuti ukuufishapo kuti kwasuka kwamulenga atoba ifipimo fya kwa Lesa ifya mibele isuma. Bushe afwile ukutwalilila ukutukuta ukufishapo umulapo wakwe? Bushe tacingawama ukuicingilila ku kucita bucisenene ukupitila mu kukanafishapo umulapo wakwe e lyo no kulomba inkumbu sha kwa Lesa no bwelelo? Umwine e wingaisalila ica kucita. Takuli umuntu umbi uwingamusalila.

Ni shani nga ca kuti umuntu alapa umulapo e lyo aisakutuluka ukuti alisuswa? Bushe afwile ukutwalilila ukutukuta ukufishapo uyo mulapo? Tacayangwike kuli Yefta ukufishapo umulapo alapile kuli Lesa, lelo alicitile co. (Abapingushi 11:30-40) Umuntu nga afilwa ukufishapo  umulapo kuti alenga Lesa ‘akalipa’ no kulenga ifyo uyo muntu apwishishisha fyaya fye mu menshi. (Lukala Milandu 5:6) Ukukanayangwa ukufishapo imilapo kuti kwalenga Lesa aleka ukusenamina uyo muntu.

Yesu Kristu atile: “Lelo leka icebo cobe cibe Ee, ee, napamo Iyo, iyo; icacila pali ifi ca mu Mbifi.” (Mateo 5:37) Umwina Kristu afwile ukwangwa ukufishapo imilapo kuli Lesa no kuba uwa cishinka mu cebo cakwe—kuli Lesa na ku bantu. Ni shani nga ca kuti aisanga mu bwafya bwa kupangana icipingo no muntu umbi, icipingo icalemoneka bwino pa kubala lelo pa numa ya kucibebeta asanga ukuti tamuli mano? Tafwile ukwangusha iyi milandu. Lelo pa mulandu wa kulanshanya bwino, ulya muntu umbi kuti asala ukumulubula ku co ashingemwe.—Amalumbo 15:4; Amapinda 6:2, 3.

Ulwa milapo ne fintu fimbi fyonse, cinshi tufwile ukwangwa sana? Lyonse natuletukuta ukutwalilila ukuba ifibusa fisuma ifya kwa Yehova Lesa.

[Ifikope pe bula 30, 31]

Hana tashingashingile ukufishapo umulapo wakwe

[Ifikope pe bula 30, 31]

Nangu ca kuti ukucite co kwalikosele, Yefta afishishepo umulapo wakwe