Imilimo Iilundulula Ifipimo fya Mibele Isuma

Ku mpela ya mwaka wa 2001, abalekutika ku mulabasa wa calo uwa Radio Mozambique baumfwile uku kubilisha:

“Kateka wa Calo atandalile amaofeshi ya Nte sha kwa Yehova ku Maputo. Akoseleshe ici cilonganino ca mipepele ukulundako imilimo yabo iya kulundulula ifipimo fya mibele isuma mu ndupwa na mu kusambilisha abakalamba mu maprogramu yabo aya masukulu ya shibukeni. Abantu nalimo 10,000 balinonkelamo kale kale muli aya maprogramu. Ukulingana na Kateka Chissano, amaprogramu nga aya yafwile ukutashiwa, pantu yalafwa sana ubwikashi mu kupwisha amafya ya kusambilisha ayacili muli cino calo.”

Ukubilisha kwakonkeshepo ifyebo fyakopelwe mu lyashi lya kwa kateka ifya kuti: “Tulakoseleshiwa sana ukumona ifyo abantu abengi bapoosa amano ku kwishiba ukubelenga no kulemba. Cilanga ukuti abekala calo bali no kutwafwa ukwingilishako impendwa ya baishiba ukubelenga no kulemba. E co, kuti natemwa ukukoselesha Inte sha kwa Yehova ukulundako ku maprogramu yabo aya kusambilisha ukubelenga no kulemba, mu lulimi ululi lonse. Icacindama sana ca kuti kuli abantu abaishiba ukubelenga no kulemba no kuti abantu kuti baumfwana bwino kabili na ku ntanshi babombako mu mulimo wa kusambilisha.”

Inte sha kwa Yehova mu Mozambique bakwata amakalasi ya kusambilisha ukubelenga no kulemba mu ncende 850 mu calo pa kuti abantu baleibelengela Icebo ca kwa Lesa. Na kabili, batungulula amasambililo ya Baibolo ayabula ukulipila nalimo 50,000 cila mulungu. Ifi fyonse fyaba lubali lwa programu wa mwi sonde lyonse uwa kusambilisha Baibolo mu fyalo 235 nomba. (Mateo 24:14) Na imwe kuti mwanonkelamo muli iyi programu. Kuti mwamona Inte sha kwa Yehova ku ncende mwabela.