Ifipusho Ukufuma ku Babelenga

Bushe ku fyalembwa pa Ukusokolola 20:8, kuti twatila kukaba impendwa ikalamba nga nshi iya bantu abakalufiwa na Satana pa kweshiwa kwa kupelako?

Ukusokolola 20:8 kulondolola ukusansa kwa kupelako ukwa kwa Satana pa bantu bakaba pe sonde pa mpela ya kuteka kwa myaka 1,000 ukwa Bufumu bwa buMesia. Icikomo cilanda pali Satana ukuti: “[Akafuma] ku kuyalufye nko sha mu fifutu fine fya pe sonde, Goge na Magoge, ku kushilonganisha ku kulwa. Impendwa yabo [ikaba] ngo musensenga wa pali bemba.”

Te mulandu no kulunduluka mu fya sayansi na mu fya kupangapanga, “umusensenga wa pali bemba” na nomba tawaishibikwa ubwingi nelyo impendwa. Kanshi, kuti casoswa ukuti iyi nsoselo imininako impendwa ishaishibikwa, iishapampamikwa. Lelo bushe yaba ni impendwa ikalamba nga nshi iishingapendwa, nelyo bushe ni mpendwa fye iishaishibikwa lelo iingapendwa?

Mu Baibolo, insoselo ya kuti “ngo musensenga wa pali bemba” ibomfiwa mu nshila ishingi. Ku ca kumwenako, pa Ukutendeka 41:49, tubelenga ati: “Yosefe atuntumike ingano ngo musensenga wa pali bemba, ukufushe cibi, asuka aleko kupenda; ico takwali mpendwa.” Pano icilekomailwapo ni mpendwa ishingapendwa. Yehova na o atile: “Ifyo umulalo wa mu muulu ushingapendwa, no musensenga wa pali bemba ushingalingwa, e fyo nkafusho bufyashi bwa kwa Dabidi umubomfi wandi.” Na cine nga fintu cine cine intanda sha mu muulu no musensenga wa pali bemba fishingapendwa, e fyo na Yehova cine cine akafishapo icilayo cakwe kuli Davidi.—Yeremia 33:22.

Ilingi line insoselo ya kuti “umusensenga wa pali bemba” ilosha ku mpendwa iikalamba. Abena Israele pa Gilgali balisakamikwe cibi ku milalo ya bulwi iya baPelishiti iyalongene pa Mikmashi, iyali “ngo musensenga uuli pa mbali ya bemba ku bwingi.” (1 Samwele 13:5, 6; Abapingushi 7:12) Kabili “Lesa apeele Solomone amano no mucetekanya uwafulisha, no kwishiba kwa mutima ukwine kwine, ngo musensenga uuli pa mbali ya bemba.” (1 Ishamfumu 4:29) Nangula ifyalelandwapo muli fi fya kucitika fyali impendwa iikalamba, fyali ne cipimo capampamikwa.

“Umusensenga uuli pa mbali ya bemba” na kabili kuti waimininako impendwa ishishibikwe, ukwabula ukulondolola ubwingi bwa uko. Yehova aebele Abrahamu ukuti: “Ukupaala nkakupaala, kabili ukufusha nkafusho bufyashi bobe nge ntanda sha mu muulu, kabili ngo musensenga uuli pa nembenembe ya bemba.” (Ukutendeka 22:17) Pa kubwekeshapo ici cilayo ku mwishikulu wa kwa Abrahamu Yakobo, Yehova abomfeshe amashiwi aya kuti “ulukungu lwa pano isonde,” ayo mashiwi eyo Yakobo abwekeshepo ukulanda ati ngo “musensenga uwa pali bemba.” (Ukutendeka 28:14; 32:12) Caishileba ukuti, ukufumyako Yesu Kristu, impendwa ya “lubuto” lwa kwa Abrahamu yaba 144,000, iyo Yesu aitile “umukuni unono.”—Luka 12:32; Abena Galatia 3: 16, 29; Ukusokolola 7:4; 14: 1, 3.

Finshi twasambilila kuli fi fya kumwenako? Twasambilila ukuti insoselo ya kuti “ngo musensenga uwa pali bemba” te lyonse ipilibula impendwa iishapimwa nelyo iikalamba; kabili te lyonse ibomfiwa ku kulondolola ubukulu bwa cintu nelyo icipimo cakulisha. Ilingi ipilibula impendwa ishishibikwe lelo iyapimwa. E ico, ca mano ukusumina ukuti ibumba lya bacipondoka abakaba ku lubali lwa kwa Satana mu kusansa kwakwe kwa kapeleko pa bantu ba kwa Lesa talyakabe impendwa iyakulisha nga nshi, lelo ikaba iyapimwa kabili iikalamba iya kulinga ukutiinya. Kwena, impendwa icili tailaishibikwa pali nomba.