Inshita Yawamisha Iya Kuba no Mweo

NGA mwaponenwa na mafya, bushe mulafuluka inshiku shisuma isha kale? Lyene langulukeni pa mashiwi ya Mfumu ya mano Solomone aya kuti: “Witila, Cinshi ico inshiku sha ntanshi shabela ishisuma ukucila shino? pantu te cintu ca mano ukwipushe fi.”—Lukala Milandu 7:10.

Mulandu nshi Solomone apandile aya mano? Pantu alishibe ukuti ukumona ifyapita mu nshila ya cine cine kwalicindama ku kupikulula amafya tulekwata ndakai. Abo abafuluka inshiku shisuma isha kale nakalimo kuti balaba ukuti isho nshiku na sho shali na mafya na masakamika kabili ubumi tabwawaminine. Ifintu fimo ifyapita napamo fyaliko eyefilya, lelo ifingi tafyali bwino. Nge fyo Solomone asosele, te ca mano ukwikalila fye ukulaelenganya ifyapita, pantu cine cine teti tubweshe ifyalecitika.

Bushe calilubana ukufuluka ifyapita? Ee, nga ca kuti ico cilelenga twafilwa ukubelesha no kuiteulwila ku mikalile ya ndakai nelyo nga ciletulesha ukutesekesha inshita tuleikalamo no kutulafya kwi subilo twingakwata.

Ukuba kwena, nomba e nshita yawamisha iya kuba no mweo te mulandu na mafya yalefulilako mu calo. Mulandu nshi? Pantu natupalama ku kufikilishiwa kwa cilayo ca kwa Lesa kwi sonde na mapaalo ya kuteka kwa mutende ukwa Bufumu bwakwe. Baibolo ilaya ukuti: “Akafuuta ifilamba fyonse ku menso yabo, ne mfwa tayakabeko kabili iyo, nangu kuloosha nangu kukuuta nangu kukalipwa tafyakabeko kabili iyo. Ifya ntanshi nafiya.” (Ukusokolola 21:4) Lyene, apo ifintu fikawama nga nshi, takwakabe uukalafuluka “inshiku shisuma isha kale.”