Ukulya pe Tebulo lya Mukalamba wa Ngalaba
Ukulya pe Tebulo lya Mukalamba wa Ngalaba
UKULIILA pamo na bantu ba bucibusa, ifya kulya ifisuma no kulanshanya kusuma, filenga ica kulya pe tebulo lya mukalamba wa ngalaba ukuwama nga nshi. Lelo ukulanshanya kwali pe tebulo lya mukalamba wa ngalaba ya kampani ka White Star Line, ba Robert G. Smith, kwabalengele ukwishiba ifya kulya fya ku mupashi.—Esaya 25:6.
Mu 1894, ilyo bali ne myaka 24, ba Robert e bali abakalamba ba ngalaba ya Kinclune of Dundee ilyo baleya pa bulendo bwabo ubwa kubalilapo ubwa kushinguluke calo. Mu kuya kwa nshita, baishileba abakalamba ba ngalaba sha kampani ka White Star Line pamo nga Cedric, Cevic, na Runic. * Ilyo baleyabuka bemba wa Atlantic ukufuma ku New York ukuya ku Liverpool, ku England, mu ngalaba imo pali shilya twalumbula, ba Robert bapokelele umweni pe tebulo lyabo ilya mukalamba wa ngalaba, uyo mweni ali ni ba Charles Taze Russell. Ukulanshanya na ba Russell, kwalengele ba Robert ukutemwa ubukombe bwa mu Baibolo, kabili pa kuti beshibilepo na fimbi, balipokeleko ututabo twa Studies in the Scriptures ukufuma kuli ba Russell.
Ba Russell balitwalilile ukulembeshanya bakalata na ba Robert, kabili ba Robert balikonkenyepo ukufwaya ukwishiba na fimbi ifya mu Baibolo. Ba Robert bashimikileko abakashi ifipya ifyo balesambilila. Tapakokwele sana, ba Robert na bakashi babo bali Basambi ba Baibolo abacincila, nge fyo Inte sha kwa Yehova baleitwa lilya. Ba Robert basukile batendeka no kulandako amalyashi ya Baibolo. Ku ca kumwenako, ku Australia, mwi tauni lya Brisbane, balandile ilyashi pali “Balsamu wa mu Gileadi” kabili balandile ati muli Baibolo e mwaba “umuti wa malanda yonse aya pano isonde.” Ku mwabo, ku England, abakashi babo na bana baletambisha ubunkolanya bwa “Photo Drama of Creation,” ukulisha amashiwi yalandile ba Russell uku ninshi baletambisha ifikope.
Ba Robert bashiilile abana ubupyani bwa cine ca Bufumu ubo basambilile. Pali lelo, pa numa ya nkulo shisano, abantu 18 aba mu lupwa lwa ba Robert baba abacincila ukushimikila imbila nsuma kuli bambi, ukutasha pali filya fya kulya fyali pe tebulo lya mukalamba wa ngalaba.
Mu mpapulo balemba na mu masambililo yabo aya Baibolo, Inte sha kwa Yehova mwi sonde lyonse baleafwa abantu ukusambilila ubukombe bwa mu Baibolo ubo ba Smith, Abakalamba ba ngalaba baumfwile bwino. Na imwe kuti mwasambililako fimo ifyaweme nga nshi pe tebulo lya mukalamba wa ngalaba.
[Futunoti]
^ para. 3 Ingalaba yapalene ne shi yali ni Titanic, uwali umukalamba wa iyi ngalaba ilyo yaile pa bulendo bwa iko ubwa kubalilapo ilyo yabundile aali ni E. J. Smith (umbi fye na o).
[Icikope pe bula 8]
Ba Robert G. Smith
[Icikope pe bula 8]
Ba Charles T. Russell