“Aba Mano Batatu”—Bali ni Bani?

Ilingi line nga balelanga ukufyalwa kwa kwa Yesu balanga abaume batatu mu mingila iitali ne ngamali shabo, bafika pe tanga apali akanya ka Yesu ako balalike mu mulimba. Aba batandashi bafwele ifya kufwala ifisuma abengi babeta ati aba mano batatu. Cinshi Baibolo isosa pali aba?

Ukulingana na Baibolo, abetwa ukuti aba mano bafumine “ku kabanga,” kabili kulya kwine e ko baishibile ulwa kufyalwa kwa kwa Yesu. (Mateo 2:1, 2, 9) Aba baume bafwile balyendele inshita iitali ukuya ku Yudea. Ilyo basangile Yesu, tali kanya mu mulimba. Lelo, basangile Maria na ‘kana’ mu ng’anda.—Mateo 2:11.

Baibolo ita aba bantu ukuti bamagi, nelyo “abapendula intanda,” kabili tayalumbula impendwa yabo. Icitabo ca The Oxford Companion to the Bible calondolola ukuti: “Ukwampana kwaba pa kucite cimpa no kupendula intanda kumonekela mu fyo abatandashi bayangilwe sana ku lutanda lwa batungulwile ku Betlehemu.” Baibolo yalikanya imisango yonse iya cimpa kabili yalikanya no musango onse uwa cina Babele uwakwesha ukusanga ifyebo ukubomfya intanda.—Amalango 18:10-12; Esaya 47:13.

Icebo aba baume baebelwe tacaletele busuma nelyo bumo. Calengele Imfumu ya bubifi Herode ukukalipa sana pa mulandu wa kalumwa. Kabili ici calengele Yosefe, Maria na Yesu ukufulumukila ku Egupti kabili calengele abana baume bonse “aba myaka ibili na bashilafikako” ukwipaiwa mu Betlehemu. Amashiwi Herode bamwebele ku bapendula intanda e yalengele ukuti eshibe bwino bwino inshita iyo Yesu afyalilwepo. (Mateo 2:16) Apo amacushi yonse ayacitike yacitike pa mulandu wa kutandala kwabo, cilimo amano ukusondwelela ukuti ulutanda bamwene no bukombe bwalelanda pa ‘wafyelwe Imfumu ya baYuda’ fyafumine ku mulwani wa kwa Lesa, Satana Kaseebanya, uwalefwaya ukwipaya Yesu.—Mateo 2:1, 2.