Ubumi Bwabo

Akapepala Akayalwile Ubumi Bwandi

NGA FINTU CASHIMIKWA NA BA IRENE HOCHSTENBACH

Cacitike pali cibili icungulo bushiku mu 1972. Nali ne myaka 16 kabili naile na bafyashi bandi ku mapepo mu Eindhoven, umusumba wa mu citungu ca Brabant, mu Netherlands. Naumfwile umwenso kabili nalefwaya ukuba kumbi. Lyene abakashana babili bampeele akapepala apali amashiwi ya kuti: “We mutemwikwa Irene, kuti twatemwa ukukwafwa.” Nshaishibe nakalya ifyo kalya kapepala kali no kwalula ubumi bwandi. Lelo ilyo nshilamulondolwela ifyakonkelepo, lekeni mwebe ifyo nakulile.

NAFYALILWE pa cishi ca Belitung, mu Indonesia. Ndebukisha ifiunda fimo ifya pali cilya cishi cakaba—ukupunga kwa tuncindu ku mwela, ukupooma kusuma ukwa mumana wa mupepi, ukuseka kwa baice baleangala pa lubansa lwa ng’anda yesu, ne ciunda ca nyimbo cikumene ing’anda yesu. Mu 1960, ilyo nali ne myaka ine, ulupwa lwesu lwalikuukile ukufuma ku Indonesia ukuya ku Netherlands. Twaendele mu ngalaba ulwendo lwalepa, kabili ndebukisha sana sana icongo ca co natemenwe ukwangasha ico nasendele—e kutila akalubi kali ne ng’oma. Ilyo nali ne myaka 7, nalekele ukuumfwa pa mulandu wa kulwala, kabili ukutule lyo nshaba na maka ya kuumfwa ifiunda ifili fyonse ifili apo ndi. Njibukisha fye ifyo naleumfwa.

Ukukula Nkomamatwi

Pa mulandu wa kusakamana kwa kutemwa ukwa bafyashi bandi, pa kubala nshaumfwikishe ifyo nali no kulamonwa pamo  nga nkomamatwi. Ku bwaice, natontonkenye ukuti ica kwaafwa ukuumfwa cikalamba cali ca musamwe fye, nangula tacangafwile sana. Pa kulanda na ine, abacaice abena mupalamano balelemba amalyashi yonse mu nshila na coko, kabili nalebaasuka, nangu ca kuti nshaleumfwa ishiwi lyandi line.

Ilyo nalekula, naishileishiba ukuti nalipuseneko na bantu nali nabo. Natendeke ukwishiba ukuti abantu bamo balenseka pa mulandu wa kuba nkomamatwi, e lyo bambi balensengauka. Natendeke ukuyumfwa uwatalalilwa ne citendwe. Natendeke ukumfwikisha ifyo bunkomamatwi bwaba, kabili lintu nalekulilako, e lyo naletiina sana abantu baleumfwa.

Pa kuti ningaba na maka ya kusangwa ku sukulu lyaibela ilya bankomamatwi, abafyashi bandi bakuushishe ulupwa lonse ukufuma mu mushi mu citungu ca Limburg ukuya ku musumba wa Eindhoven. Kulya, batata bafwaile incito, e lyo ndume yandi na bankashi nandi baile pa sukulu lipya. Ndabatasha pa kuteuluka konse bacitile pa mulandu wandi. Pa sukulu, nasambilishiwe ukwalula iciunda ce shiwi lyandi no kushikimika pa kulanda. Kabili nangu ca kuti bakafundisha tabalebomfya ululimi lwa fishibilo, abo twali nabo mu kalasi bansambilishe ukulanga ifishibilo.

Ukwikala nga Nkomamatwi

Ilyo nalekula, abafyashi bandi baleesha nga nshi ukulalanda na ine, lelo kwali ifintu ifingi ifyo nshaleumfwa. Ku ca kumwenako, nshaishibe ukuti abafyashi bandi balesambilila Baibolo ne Nte sha kwa Yehova. Lelo ndebukisha ukuti bushiku bumo ulupwa lwaile ku cifulo ukwali abantu abengi nabekala pa mipando. Bonse balelolesha ku ntanshi, inshita shimo baletoota, kabili limo limo baleimininako–lelo nshaishibe mulandu aba bantu balecitila ifyo fyonse. Pabe napapita imyaka, naishilesanga ukuti nali pe bungano lya Nte sha kwa Yehova. Abafyashi bandi balensenda na ku cikuulwa cinono mu musumba wa Eindhoven. Nayumfwile ukuti kulya kwali bwino pantu uuli onse ali ne cikuuku kabili ulupwa lwandi lwalemoneka ulwa nsansa, lelo nshaishibe ico lyonse twaleilako. Pali lelo nalishiba ukuti cilya cikuulwa cinono cali ni Ng’anda ya Bufumu iya Nte sha kwa Yehova.

Ku ca bulanda, takwali nelyo umo uwalesangwa pali uku kulongana uwa kumpilibwilako ifyalelandwa. Ndakai nalishiba ukuti abalesangwako balefwaya ukunjafwa lelo tabaishibe ifya kucita apo nali nkomamatwi. Pali uku kulongana, nayumfwile uwalekeleshiwa kabili naletontonkanya ukuti, ‘Kanshi nga naciba ku sukulu ukucila ukuba kuno.’ Lelo ilyo nali ncili ndetontonkanya pali ci, abakashana babili balembele fimo pe pepala no kumpeela. Aka e kapepala numbwile pa kutendeka. Nshaishibe ukuti aka kapepala kali no kuba e ntendekelo ya bucibusa busuma ubwali no kundubula ku kutalalilwa.

Ukulundulula Bucibusa Bwawamisha

Colette na Hermine, abampeele ako kapepala, bali mu myaka ya mu kubangilila iya ba 20. Pa numa, naishibe ukuti baishile ku cilonganino ca Nte sha kwa Yehova uko nalesangwa ku kubomba nga bapainiya ba nshita yonse, nelyo abatumikishi ba nshita yonse. Nangula ca kuti Colette na Hermine tabaishibe ululimi lwa fishibilo, naleiluka ifyo balesosa pa kulolesha imilomo yabo ilyo balelanda na ine, kabili muli iyi nshila twalelanshanya bwino.

Abafyashi bandi balisekelele ilyo Colette na Hermine baipwishe pa lwa kulasambilila Baibolo na ine, lelo aba bakashana balicitile ne fyacilapo pali ci. Balyeseshe nga nshi ukumpilibwila ifyalelandwa pa kulongana pa Ng’anda ya Bufumu no kumbikamo mu kubishanya na  bambi mu cilonganino. Balensambilisha ifya kuyalanda pali Baibolo mu mulimo wa kushimikila, kabili balenjafwa no kupekanya amalyashi ya busambi mwi Sukulu lya Butumikishi Ilya Bulesa. Taleni elenganyeni, ino nshita nalishipile ukulanda ilyashi pa ntanshi ye bumba lya bantu abomfwa!

Kabinge, Colette na Hermine banengele ukuyumfwa ukuti kuti nabacetekela. Bali abatekanya kabili balenkutika. Nangula ilingi line twaleseka pa lwa filubo fyandi, tabatalile abampumya; nelyo tabaleyumfwa insoni ku kubapo kwandi. Baleesha ukumfwikisha ifyo naleyumfwa kabili balemona ine nga bene. Aba bakashana ba cikuuku bampeele ica bupe cisuma—ukutemwa kwabo na bucibusa.

Ne cacindamisha, Colette na Hermine bansambilishe ukuti nalingile ukwishiba Lesa wesu, Yehova, nga cibusa uwingacetekelwa. Banondolwelele ukuti Yehova alemona ninjikala mu Ng’anda ya Bufumu kabili alishibe amafya nalekwata apo nine nkomamatwi. Ndatasha ukuti ukutemwa bonse twatemenwe Yehova kwalitwikatenye capamo batatu nge fibusa! Ukusakamana kwa kwa Yehova kwalinsansamwishe, kabili pa kulanga ifyo namutemwa, nalangile ukuipeela kwandi kuli wene pa kubatishiwa mu menshi mu July 1975.

Ukubomba na Cibusa Waibela

Imyaka yakonkelepo, naishibene na bamunyina na bankashi Abena Kristu abengi. Munyina umo abele cibusa wandi uwaibela nga nshi, kabili twalyupene mu 1980. Tapakokwele ukufuma apo, natendeke ukubomba nga painiya, kabili mu 1994 umulume wandi Harry na ine batutumine ku kubomba nga bapainiya baibela mwi bala lya Lulimi lwa Fishibilo ulwa ciDutch. Umwaka wakonkelepo, napeelwe umulimo uwayafya. Nali no ku labomba no mulume wandi, uumfwa, ilyo aletandalila ifilonganino fyapusanapusana pamo nga kangalila wa muputule uwa kwikatilila.

Ubu bwafya mbupwishe fi. Ilyo twatandalila icilonganino pa muku wa kubalilapo, bwangu bwangu ndaya apali bamunyina na bankashi abengi no kuilondolola. Mbeba nati ndi nkomamatwi no kubeba ukulandolesha ilyo balelanda panono panono na ine. Ndeesha no kwasukapo lilya line pa kulongana kwa cilonganino. Na kabili ndepusha nga umo kuti aitemenwa ukuba kapilibula wandi pa kulongana kwa ulya mulungu no mulimo wa mwi bala.

Uku kuitendekelako kulabomba bwino ica kuti inshita shimo, bamunyina na bankashi balalaba ukuti teti ng’umfwe, icilenga twatendeka ukuseka. Ku ca kumwenako, balanjeba ukuti ilyo bamona ndeenda mu tauni, pa kumposha  balalisha amauta ya myotoka shabo, lelo kwena nshankulako. Inshita shimo shimo ndalaba na ine ukuti nalipelebela pa kulanda—pamo nga ilyo ndeesha ukutepelesha umulume wandi mu matwi ifya nkama. Ilyo namona ayumfwe nsoni apo pene fye, ndeshiba ukuti ifyo “namutepelesha” fyaciba pa muulu.

Abaice balanjafwa mu nshila nshileenekela. Mu cilonganino cimo ico twatandalile pa muku wa kubalilapo, kalume uwali ne myaka 9 amwene ukuti bamo mu Ng’anda ya Bufumu baleshimunuka panono ukulanda na ine, lelo apingwilepo ukucitapo cimo pali ci. Aishile kuli ine, anjikete pa kuboko, antwele pa kati ka Ng’anda ya Bufumu, no kubilikisha mwi shiwi lya pa muulu ukuti, “Mukwai aba ni baIrene—ni bankomamatwi!” Abalipo baishile kuli ine no kuishibisha.

Ilyo nja no mulume wandi mu mulimo wa muputule, ifibusa filafulilako. Ubumi bwandi bwalipusana ilelo ukufuma ku myaka nayumfwile uwalekeleshiwa kabili uwatalalilwa! Ukutula cilya cungulo bushiku ilyo Colette na Hermine bamfumbatike kalya kapepala, naliimwena amaka ya bucibusa kabili nalikumanya abantu abaishileba abaibela nga nshi kuli ine. Ne cacilapo ca kuti, nalishiba Yehova, Cibusa wawamisha pali bonse. (Abena Roma 8:38, 39) Mwandini kalya kapepala kayalwile ubumi bwandi!

[Icikope pe bula 24]

Ndebukisha icongo ca co natemenwe ukwangasha

[Ifikope pe bula 25]

Mu butumikishi no mulume wandi, Harry