Cinshi Cingatwafwa Ukulungika Bwino Icebo Ca Cine?

UULINGULULA ifyangalo uwa nyunshipepala imo inshita imo aile mu kutamba icangalo. Tacitemenwe sana kabili pa numa alembele ati: “Nga mulefwaya ifya cabe cabe, kabiyeni mukutamba ici cangalo.” Pa numa, abatungilile ici cangalo basabankenye icishibisho umo bayambwile ifyalandile uyu uulingulula. Amashiwi bayambwile yali ya kuti: “Kabiyeni mukatamba ici cangalo”! Ifi basabankenye ku kupanga icishibisho fyayambwile bwino bwino amashiwi ya kwa ulya uulingulula, lelo baalwile ifyebo alelandapo no kulosha fye mumbi ifyo alelandapo.

Ico ica kumwenako cilangilila ifyo cacindama ukuumfwila ifintu umo mwine bafiloseshe. Ukuumfwila ifintu umo bashifiloseshe kuti kwayalula ubupilibulo bwa fiko, nga fintu fye Satana aloseshe mumbi ubupilibulo bwa Malembo ilyo aeseshe ukulufya Yesu. (Mateo 4:1-11) Lelo ukubebeta ifyebo filelandwapo mu lyashi kulatwafwa ukumfwikisha bwino umo filolele. Pali uyu mulandu, ilyo tulesambilila icikomo ca mu Baibolo, caliwama lyonse ukufwaya ukwishiba ifyo cali, pa kuti tumfwikishe bwino ico kalemba alelandapo.

Lungikeni Bwino Icebo

Dikishonari imo ilondolola ifyebo filelandwapo ukuti “fyaba fyebo filembelwe nelyo ifilelandwa ifitangilile nelyo ukukonka pe shiwi limo nelyo ifyebo fimo, ilingi ifikuma umulolele ifyebo nelyo ukulanga ifyo fingabomfiwa.” Ifi fyebo na kabili kuti fyaba “mibele yaliko nelyo ifishinka ifikumine ku ca kucitika cimo, na fimbipo.” Muli ubu bupilibulo bwalekeleshako, ishiwi limbi ilipilibula ifyebo filelandwapo kuti lyaba “ifyo cali.” Ukubebeta ifyebo filelandwapo ne fyo cali pa kuti filembwe kwalicindama apakalamba ukulingana ne co umutumwa Paulo alembeele Timote ukuti: “Uibikilisheko ukuipeela kuli Lesa ngo wasuminishiwa, umubomfi uushingaba na ca kukwatilapo insoni,  uulungika bwino icebo ca cine.” (2 Timote 2:15) Pa kulungika bwino Icebo ca kwa Lesa, tulekabila ukucumfwikisha lyene no kucilondolwela bambi mu bufumacumi kabili mu kulungama. Ukucindika Yehova, Katendeka wa Baibolo, kukatulenga ukwesha ukucite co, kabili ukubebeta ifyo cali pa kuti ifyebo filembwe cikatwafwa sana.

Ifyo Cali pa Kuti Ifyalandwapo Muli Timote wa Cibili Filembwe

Ku ca kumwenako, lekeni tubebete ibuuku lya mu Baibolo ilya kwa Timote wa Cibili. * Pa kutendeka ukubebeta kwesu, kuti twaipusha ifyo cali pa kuti ifyebo fyalandwapo muli ili buuku filembwe. Nani walembele Timote wa Cibili? Ni lilali? Mibele nshi alembeelemo? Kabinge kuti twaipusha ukuti, Bushe ifintu fyali shani kuli “Timote” uo ishina lyakwe lyaba e shina lye buuku? Mulandu nshi alekabila ifyebo fyaba mwi buuku? Amasuko kuli aya mepusho yalanonsha sana ukutesekesha kwesu ukwe buuku no kutwafwa ukumona ifyo ifwe ilelo twingamwenamo.

Ifikomo fya kubalilapo ifya kwa Timote wa Cibili filangilila ukuti ibuuku ni kalata umutumwa Paulo alembeele Timote. Ifikomo fimbi filondolola ukuti lintu Paulo alilembele, ali mu minyololo pa mulandu wa mbila nsuma. Apo abengi balimufutwike, Paulo ayumfwile ukuti ali mupepi no kufwa. (2 Timote 1:15, 16; 2:8-10; 4:6-8) E ico, nalimo alembele ili buuku pa nshita akakilwe pa muku walenga ibili mu Roma, nalimo mu 65 C.E. Tapakokwele sana, cimoneka kwati Nero amupingwilile ukwipaiwa.

Ifi e fyo cali pa kuti ifyalandwapo muli Timote wa Cibili filembwe. Lelo, nacicindama ukwishiba ukuti Paulo talembele Timote pa kuti ailishanye pa lwa mafya yakwe. Lelo, asokele pa lwa inshita shayafya isho Timote ali no kukwata no kukoselesha cibusa wakwe ukukana ifingamupumbula, ukutwalilila ‘ukukosa,’ no kwebako bambi ukufunda kwa kwa Paulo. Aba nabo baali no kufikapo bwino bwino ku kusambilisha bambi. (2 Timote 2:1-7) Mwandini ca kumwenako cisuma ica kwangwa bambi ukwabula bukaitemwe nangu ni mu nshita shayafya! Kabili mwandini kufunda kusuma kuli ifwe ilelo!

Paulo aita Timote ‘umwana wakwe uwatemwikwa.’ (2 Timote 1:2) Uyu mulumendo alilumbulwa libili libili mu Malembo ya ciGriki aya Bwina Kristu pamo nga kabomba munankwe uwa cishinka uwa kwa Paulo. (Imilimo 16:1-5; Abena Roma 16:21; 1 Abena Korinti 4:17) Ilyo Paulo amulembele uyu kalata, cimoneka kwati Timote ali mu myaka ya muli ba 30—ali acili alemonwa ngo mwaice. (1 Timote 4:12) Lelo, kale kale aleshimikwa bwino pa busumino, ‘ukucucutika na Paulo’ pa myaka nalimo 14. (Abena Filipi 2:19-22) Nangu aali umwaice, Paulo amupeele umulimo wa kufunda baeluda bambi “ukukanakansanina amashiwi” kano ukwangwa imilandu yacindama, pamo nga icitetekelo no kushipikisha. (2 Timote 2:14) Timote ali ne nsambu sha kusonta bakangalila ba filonganino na babomfi batumikila. (1 Timote 5:22) Na lyo line, napamo taicetekele sana pa lwa kubomfya ubulashi bwakwe.—2 Timote 1:6, 7.

Eluda wacaice aali na mafya yamo ayabipisha. Ubwafya bumo bwafumine ku bantu babili, Humenai na Filete, “balewisha icitetekelo ca bamo,” pa kusambilisha ukuti “ukubuuka kwa bafwa kwalicitika kale.” (2 Timote 2:17, 18) Bafwile basumine ukuti ukubuuka kweka kwali kwa bumupashi no kuti kwalicitike kale kale ku Bena Kristu. Nakalimo balelosha mumbi ifyebo fyalandwapo mu mashiwi ya kwa Paulo ukuti Abena Kristu balifwile ku membu shabo lelo baishileba no mweo ukupitila mu mupashi wa kwa Lesa. (Abena Efese 2:1-6) Paulo asokele ukuti uko kusonga kwa busangu kwali no kufula. Alembele ukuti: “Pantu ikese nshita ilyo bakaleka ukukonka isambilisho ilituntulu, . . . kabili bakatalusha amatwi yabo ku cine, no kuyalwila ku malyashi ya bufi.” (2 Timote 4:3, 4) Ukusokela libela ukwa kwa Paulo kwalangilile  ukuti calipamfishe kuli Timote ukwangwa ukufunda kwa mutumwa.

Ubunonshi bwe Buuku Ilelo

Kuli fi twalandapo, twamona ukuti Paulo alembeele Timote wa Cibili napamo pa milandu iyi: (1) Alishibe ukuti impela yakwe yali mupepi, kabili afwaile ukupekanishisha Timote ku nshita ilyo takabepo ku kumwafwilisha. (2) Afwaile ukupangasha Timote ukucingilila ifilonganino ifyo aleyangalila ukufuma ku busangu no kusonga kumbi ukwabipa. (3) Alefwaya ukucincisha Timote ukuswangaana mu mulimo wa kwa Yehova no kushintilila pa kwishiba kwalungama ukwa Malembo yapuutwamo ilyo aleshangila ku kulwisha ifisambilisho fya bufi.

Ukumfwikisha ifyo ifintu fyali kulenga Timote wa Cibili ukubamo ubupilibulo kuli ifwe. Na lelo, kwaliba abasangu abapala Humenai na Filete abatungilila amano yabo kabili kuti batemwa ukuwisha icitetekelo cesu. Kabinge, twaba mu “nshita shaibela ishayafya” isho Paulo asesemepo. Abengi baliimwena bucine bwa kusoka kwa kwa Paulo ukutila: “Bonse abafwaisha ukwikala umwabela ukuipeelesha kuli bukapepa muli Kristu Yesu bakapakaswa.” (2 Timote 3:1, 12) Ni shani fintu twingeminina abashangila? Ukupala Timote, tulekabila ukwangwa ukufunda ukwa abo ababombela Yehova pa myaka iingi. Na kabili nga tulecita isambililo lya pa lwesu, tulepepa, no kubishanya kwa Bwina Kristu, kuti ‘twakosa’ ukupitila ku cikuuku ca kwa Yehova ica pa fye. Ukucetekela amaka ya kwishiba kwine kwine na ko kuti kwatwafwa ukwaangwa ukukonkomesha kwa kwa Paulo ukutila: “Uleikatisha icipasho ca fyebo ifituntulu.”—2 Timote 1:13.

“Icipasho ca Fyebo Ifituntulu”

Bushe “ifyebo ifituntulu” Paulo alandilepo e finshi? Abomfya iyo nsoselo ku kulosha ku cisambilisho ca cine ica Bwina Kristu. Muli kalata wa ntanshi kuli Timote, Paulo alondolwele ukuti “ifyebo ifituntulu” maka maka “fya kwa Shikulwifwe Yesu Kristu.” (1 Timote 6:3) Ukupashanya icipasho ca fyebo fituntulu kulenga umuntu ukuba na mano yatuntulu, ukutemwa, no kulangulukilako bambi. Apo ubutumikishi bwa kwa Yesu ne fyo asambilishe filomfwana ne fisambilisho fyonse fimbi ifyaba muli Baibolo onse, kanshi insoselo ya kuti “ifyebo fituntulu” kuti yalosha na ku fisambilisho fyonse ifya mu Baibolo.

Kuli Timote, nga fintu caba kuli baeluda ba Bwina Kristu bonse, icipasho ca fyebo fituntulu cali “icaseekeshiwa cisuma” icali no kulindwa. (2 Timote 1:13, 14) Timote ali no ‘kushimikile cebo, ukucincila mu nshita iyene, na mu nshita iishiyene, ukwebaula, ukukalipila, ukukonkomesha, mu kushishimisha konse no kulamuka kwa kusambilisha.’ (2 Timote 4:2) Lintu twaishiba ukuti ifisambilisho fya busangu fyalyanene mu kasuba ka kwa Timote, tulatesekesha umulandu Paulo akomailile pa bucindami bwa kusambilisha ifyebo fituntulu. Twamona no kuti Timote ali no kucingilila umukuni ukupitila mu ‘kwebaula, ukukalipila, ukukonkomesha’ mu kushishimisha, ukuba amaka ya kusambilisha bwino.

Ni kuli bani Timote ali no kushimikile cebo? Ifyalandwapo fisoso kuti Timote, pamo nga eluda, ali no kushimikile cebo mu cilonganino ca Bwina Kristu. Pa kwishiba umutitikisha waleleta bakakaanya, Timote ali no kusungilila ukushikatala kwakwe ukwa ku mupashi no kubilisha mu kushipa icebo ca kwa Lesa, te mano ya ba pano nse, amano ya pa lwakwe, nelyo ifya kutunganya fya fye. Ca cine, ici nalimo kuti  caleta ukukaanya ukufuma kuli bamo abalemenena ku bubi. (2 Timote 1:6-8; 2:1-3, 23-26; 3:14, 15) Lelo, pa kukonka ukufunda kwa kwa Paulo, Timote ali no kutwalilila ukucilikila ubusangu, nga fintu fye Paulo acitile.—Imilimo 20:25-32.

Bushe amashiwi ya kwa Paulo pa lwa kushimikile cebo yalabomba na ku kushimikila ku nse ya cilonganino? Ee, yalabomba, nga filya fine amashiwi yashingulukako yalanga. Paulo atwalilila ukusoso ati: “Lelo iwe ube uwatekanya mu fintu fyonse, cula ku bubi, bombo mulimo wa bukabila bwa mbila nsuma, fishapo bukapyunga bobe.” (2 Timote 4:5) Ukushimikila imbila nsuma ye pusukilo ku bashatetekela—e cacindamisha mu butumikishi bwa Bwina Kristu. (Mateo 24:14; 28:19, 20) Kabili nga fintu fye Icebo ca kwa Lesa cishimikilwa mu cilonganino nangu ni mu “nshita iishiyene,” e fyo tuba no mukoosha mu kushimikila icebo ku bashaba mu cilonganino nangu tuli mu mafya.—1 Abena Tesalonika 1:6.

Twashintilila pa Cebo capuutwamo ica kwa Lesa mu kushimikila kwesu konse no kusambilisha. Twalicetekela nga nshi Baibolo. Paulo aebele Timote ukuti: “Amalembo yonse yantu yapuutwamo kuli Lesa kabili ya mulimo ku kusambilisha, ku kwebaula, ku kulungika ifintu, ku kusalapula kwa mu bulungami.” (2 Timote 3:16) Ayo mashiwi yalambulwa libili libili ku kulanga ukuti Baibolo Cebo capuutwamo ica kwa Lesa. Lelo cinshi Paulo alembeele aya mashiwi?

Paulo alelanda kuli eluda, uwakwete umulimo wa “kwebaula, ukulungika ifintu, ku kusalapula kwa mu bulungami,” mu cilonganino. E ico, alecinkulako Timote ukucetekela amano ya mu Cebo capuutwamo, umo Timote asambilishiwe ukutula ku bunya. Baeluda ukupala Timote, bafwile pa nshita shimo ukwebaula bakacita wa fibi. Ilyo balecite ci, bafwile lyonse ukucetekela muli Baibolo. Kabili, apo Amalembo yalipuutwamo na Lesa, ukwebaula konse ukufumamo cine cine kufuma kuli Lesa. Abasuula ukwebaula kwaba mu Baibolo, basuula ukufunda kwapuutwamo ukufuma kuli Yehova umwine, te mano ya buntunse basuula iyo.

Mwandini ibuuku lya kwa Timote wa Cibili lyaisulamo amano ya bulesa! Kabili ifyo lyaisulamo ubupilibulo nga nshi ilyo twabebeta ifyo ifintu fyali ilyo ukufunda kwa liko kwalelembwa! Muli cino cipande, twapitamo fye patali patali mu fyebo fyawamisha, ifyapuutwamo ifyo ili buuku lyakwata, lelo nafikumanina ku kutulanga ifyo cafwa nga nshi ukubebeta ifyo ifintu fyali ilyo tulebelenga ifyalembwa mu Baibolo. Ico cikalenga tukashininkishe ukuti cine cine ‘tulelungika bwino icebo ca cine.’

[Futunoti]

[Icikope pe bula 27]

Paulo afwaile ukuteyanya Timote ku kucingilila ifilonganino

[Icikope pe bula 30]

Paulo acinkwileko Timote ukucetekela amano ya mu Cebo capuutwamo