“Naulungika, Ubumi Busuma Sana!”

BUSHE kuti mwatemwa ukusambilila ico twabela pa calo? Magdalena, inte ya kwa Yehova, uuli ne myaka 18 kabili uwikala mu musumba wa Szczecin, ku Poland ayafwile Katarzyna uo asambilila nankwe pe sukulu lya ku sekondari ukwishiba ico twabela pa calo. Katarzyna aleilandila umwine ati ni mukanalesa, lelo, ilyo Magdalena alandile na wene pali Baibolo, alitemenwe icine cine.

Nangu line Katarzyna alitemenwe ifyo Magdalena amwebele ifisangwa muli Baibolo, tasumine no mutima onse. Inshita imo ilyo alelanshanya na Magdalena pa lwa fibusa fine fine, Katarzyna asosele ati: “Walikwata Baibolo; walishiba ifishinte fya kukonka no ko wingasanga ifibusa. Lelo, ni shani pali balya abashingasumina ifyo fishinte pali ndakai?”

Katarzyna ayalwike lintu aile ku London, ku England. Ailetandala ku maofeshi yanono aya Nte sha kwa Yehova kulya, kabili alitemenwe ifyo bamulangile icikuuku. Utuntu utunono pamo nga ukumwiswila icibi no kwangwa kwafumaluka ku fyo alelanda kwalengele wene ukuumfwa bwino.

Ilyo umwaka upya uwa masomo watendeke, mu September 2001, Katarzyna apingwilepo ukusumina ukusambilila Baibolo lyonse. Alitwalilila ukucindamika ifishinte fya Baibolo kabili alitendeka no kufikonka mu fyo alecita lyonse. Nomba line fye, aebele Magdalena ati, “Ndeyumfwa kwati ndetendeka ubumi bupya.” Kabili atumine na mashiwi pa foni ya kwenda na yo ati: “Natasha sana pe sambililo lya Baibolo twacikwata lelo! Naulungika, ubumi busuma! Cisuma sana ukwishiba uo tufwile ukutasha pali co.”