“Bakabila ba Bufumu Abapimpa” mu Nsansa Balongana Capamo

IMIBELE yabipa, ukwafya kwa ndalama, ne cimfulumfulu mu fya mapolitiki filengele icalo conse ukubipa. Nangu line ifintu fibipile umusango yu, Inte sha kwa Yehova balilongene umutende inshiku shitatu pa Mabungano ya Citungu ayaleti “Bakabila ba Bufumu Abapimpa.” Aya mabungano yaliko mu calo conse ukutendeka mu May 2002.

Inshita ya mabungano yali ni nshita ya kusekelela nga nshi. Natupitulukemo patali patali muli programu wa masambililo ya mu Baibolo aya kukoselesha.

Ubushiku bwa Kubalilapo Bwakomaile pa Kupimpa kwa kwa Yesu

Umutwe we bungano pa bushiku bwa kubalilapo waleti “Pashanyeni Ukupimpa kwa kwa Shikulwifwe, Yesu.” (Yohane 2:17) Ilyashi lyaleti “Sekeleleni pa Kulongana Capamo nga Bakabila ba Bufumu” lyali lya kusengela bwino bwino abasangilweko pa kuti bengaipakisha ukusekelela kubako lyonse pa mabungano ya bantu ba kwa Lesa. (Amalango 16:15) Pa numa ya ili lyashi pakonkele ukwipusha bakashimikila ba mbila nsuma abapimpa.

Ilyashi lyaleti “Ilemene Kuli Yehova” lyalandile pa cikomo cimo na cimo ica Amalumbo 37:1-11. Twalikoseleshiwe ‘ukukanalunguluka’ ilyo tulemona kwati ifintu fileenda bwino ku ncitatubi. Nangu line ababifi kuti batubepesha, Yehova mu kuya kwa nshita akalenga abantu bakwe aba cishinka ukwishibikwa. Ilyashi lyaleti “Beni Abatootela” lyalandile pa fyo twingalanga ukuti tulatasha kuli Lesa. Abena Kristu bonse bafwile ukutuula “ilambo lya malumbo” kuli Yehova. (AbaHebere 13:15) Ukwabula ukutwishika, ukutasha kwesu ne fyo ifintu fili kuli ifwe e fitwafwa ukupima inshita tupoosa ku mulimo wa kwa Yehova.

Ilyashi likalamba lyakwete umutwe waleti “Bakabila ba Bufumu Bapuutwamo no Kupimpa.” Lyalandile pali Yesu Kristu ukuti e wawamisha ukupashanya ukupimpa. Pa numa Ubufumu bwa mu muulu bwapangilwe mu 1914, Abena Kristu ba cine balekabila ukupimpa pa kubilisha ilya mbila nsuma. Kalanda wa lyashi alandile pe bungano lyali ku Cedar Point, mu Ohio, ku U.S.A., mu 1922 kabili atucinkwileko pa kubilisha kwa lulumbi ukwaleti: “Ishibisheni Imfumu no Bufumu Bwakwe”! Mu kupita kwa nshita, ukupimpa kwa babomfi ba busumino aba kwa Lesa kwabalengele ukubila ku fyalo fyonse pa lwa cine ca Bufumu icishaiwamina.

Ilyashi lyaleti “Shipeni pa Kwishiba Ukuti Yehova Ali na Ifwe,” lyalandilwe mu nshita ya kasuba pa bushiku bwa kubalilapo, lyalangile ukuti abantu ba kwa Lesa e bo Satana asansa sana. Na lyo line, te mulandu na fintu batukaanya, nga tuletontonkanya pa fya kumwenako fya citetekelo ifyalembwa mu Baibolo ne fya ndakai tukaba no bukose bwa kushipikisha amesho na matunko ukwabula umwenso.—Esaya 41:10.

Lyena pakonkele ilyashi lya kukonkana ilya mbali shitatu, ili lyashi lyakwete umutwe waleti  “Ukusesema kwa kwa Mika Kulatukosha Ukuti Twendele mwi Shina lya kwa Yehova.” Kalanda wa lyashi lya kubalilapo apashenye mibele yabipa, ubusangu mu mipepele, no kutemwa ifikwatwa, ifyaliko mu nshiku sha kwa Mika ku nshiku shesu. Atile: “Isubilo lyesu ilya ku ntanshi likaba iline line nga twalundulula umutima wa cumfwila no kushininkisha ukuti imyendele yesu ili iya mushilo kabili imikalile yesu yaisulamo imibele ya bukapepa—kabili nga tatulabile no kuti ubushiku bwa kwa Yehova bukesa nangu cibe shani.”—2 Petro 3:11, 12.

Kalanda wa lyashi lya bubili mu lyashi lya kukonkana alandile pa fyo Mika ashimawile intungulushi sha baYuda. Balecusha abapiina, abantu abashakwete wa kubacingilila. Lelo Mika asobele na pa lwa kucimfya kwa kupepa kwa cine. (Mika 4:1-5) Amaka tukwata ukufuma ku mupashi wa mushilo uwa kwa Yehova, yatulenga ukupampamina pa kushimikila ubu bukombe bwa kukoselesha kabili ubupeela isubilo. Lelo ni shani nga ciletwafya pa mulandu wa kulwala nelyo ukupelebela mu nshila shimo? Kalanda wa butatu atile: “Ififwaya Yehova fyalilinga kabili fintu twingacita.” Lyene alandile pa fyalekanalekana ifyaba pali Mika 6:8, apo tubelenga ukuti: “Cinshi cimbi ico Yehova alefwaya kuli iwe, kano ukucito bupingushi, no kutemwo luse, no kwenda bufuuke bufuuke na Lesa obe?”

Apo imibele yabipa mu calo kuti yakuma Abena Kristu, ifwe bonse twalimwenenemo mu lyashi lyaleti “Sungilileni Umusangwela Ukupitila mu Kulindo Mutima Wenu.” Ku ca kumwenako, ukusungilila umusangwela kukalenga tukakwate cupo ca nsansa. Fwe Bena Kristu, tatufwile no kutontonkanya fye pa kutila kuti twacita ubulalelale.—1 Abena Korinti 6:18.

Ilyashi lyaleti “Ibakeni ku Bucenjeshi” lyatwebele ifyo tufwile mano mano ukumona nga sumu ifyebo fyanyonganishiwa, ifyebo fyabamo ubufi, no bufi bwafiita na fititi ififuma ku basangu. (Abena Kolose 2:8) Kabili, tatufwile ukuibepa pa kutontonkanya ukuti kuti twaipakisha ifya lunkumbwa fya lubembu ukwabula ifyabipa ukutucitikila.

Ilyashi lyalekeleshe pa bushiku bwa  kubalilapo lyaleti: “Pepeni Lesa Wine Wine Eka.” Ilyo ifintu filebipilako mu calo, tulakoseleshiwa ukwishiba ukuti Yehova nomba line alaleta icalo cakwe icipya umwaba ubulungami! Ni bani bakekalamo? Beka fye abapepa Yehova. Ku kwafwa ifwe, abana besu, na basambi besu aba Baibolo ukufika pali ubu buyo, kalanda wa lyashi afumishe icitabo cipya icaleti Pepeni Lesa Wine Wine Eka. Mwandi twalitemenwe ukupokelela ici citabo!

Ubushiku bwa Cibili Bwakomaile pa Kupimpila Icalungama

Ubushiku bwalenga shibili pe bungano bwakwete umutwe waleti: “Pimpileni Icalungama.” (1 Petro 3:13) Kalanda wa kubalilapo alandile pe lembo lya bushiku. Akomaile pa kuti, ukupoosako sana amano ku kubebeta ilembo lya bushiku lyonse kulalundako ukupimpa kwesu.

Lyena paishile ilyashi lya kukonkana ilyaleti “Bakabilisha ba Bufumu Abacindika Ubutumikishi Bwabo.” Ilyashi lya kubalilapo lyakomaile pa bucindami bwa kulungika ukusosa Icebo ca kwa Lesa. (2 Timote 2:15) Ukubomfya bwino Baibolo kulenga yaba ‘na maka’ mu mikalile ya bantu. (AbaHebere 4:12) Tufwile ukwangwa kuli Baibolo no kuba abashininwa ilyo tulepelulula pa fyo yalanda. Ilyashi lya bubili mu lyashi lya kukonkana lyatukoseleshe ukubwelela libili libili ku balefwaisha ukusambilila. (1 Abena Korinti 3:6) Ukupekanya no kushipa filakabilwa pa kubwelela mu kwangufyanya kuli bonse abalefwaya ukusambilila. Ilyashi lya butatu lyatukoseleshe ukulamona cila muntu uo twasanga ukuti akaba umusambi kabili lyalangile ukuti ukutambika isambililo lya Baibolo pa  muku wa kubalilapo kuti kwaleta insansa shaba mu kwaafwa abantu ukuba abasambi.

Ilyashi lyakonkelepo lyakwete umutwe waleti: “Umulandu Tufwile ‘Ukupepela no Kukanaleka.’” Baibolo ikoselesha Abena Kristu ukuumfwila ubutungulushi bwa kwa Lesa muli fyonse ifyo balecita. Tufwile ukushako inshita ya kupepa pa lwesu. Na kabili, tufwile ukuba no mukoosha mwi pepo, pantu Yehova nalimo kuti aleka papita inshita pa kwasuka amapepo yesu.—Yakobo 4:8.

Ilyashi lyaleti “Ukulanda pa fya ku Mupashi Kulakuulilila” lyatukoseleshe ukubomfya ica bupe cesu ica kulanda ku kunonsha fwe bene na bambi. (Abena Filipi 4:8) Abena mwesu na bana balakabila ukulanshanya na bo ifya ku mupashi cila bushiku. Pa kuti cibe fyo, indupwa shifwile ukuliila pamo nangu fye umuku umo cila bushiku, e cingalenga kwaba ukulanshanya kwa kukoselesha.

Ukulongana kwa lucelo kwalekelesheko ne lyashi lya kucincimuna ilyaleti “Ifyo Ukuipeela no Lubatisho Fitungulula kwi Pusukilo.” Abaleeya ku kubatishiwa intanshi balinonkele ukwishiba, balangile icitetekelo, balilapiile, balekele ukucita ifyabipa, kabili baliipeele abene kuli Lesa. Kalanda atile, pa numa ya kubatishiwa, balingile ukutwalilila ukukula lwa ku mupashi no kuba abapimpa lyonse no kukwata imyendele isuma.—Abena Filipi 2:15, 16.

Mu nshita ya kasuba, ilyashi lyaleti “Beni Abafuka, no Kusungilila Ilinso Lyenu Ilituntulu” lyakomaile pa fishinka fibili. Ukuba abafuke cipilibula ukwishiba bwino bwino umo twapelebela napo twaba kuli Lesa. Ubufuke bulatwafwa ukusunga ilinso lyesu “ilituntulu”—ukutontomesha pa Bufumu bwa kwa Lesa, ukucila ifya ku mubili. Nga twacite fi, tatufwile ukusakamikwa, pantu Yehova akatupeela ifyo tukabila.—Mateo 6:22-24, 33, 34.

Kalanda wa lyashi lyakonkelepo alangile umulandu tulingile “Ukutetekela Yehova no Mweo Onse mu Nshita sha Bwafya.” Bushe kuti twakumamo shani ukushipikisha ifintu pamo nga ubunake bwesu no kubulwa indalama nelyo ukulwala? Shi natwipushe Yehova ukutupeela amano yene yene no kweba bambi ukutwafwa. Ukucila ukuleka tusakamikwe nelyo ukumona ati natupelelwa, tufwile ukukosha ubucetekelo bwesu muli Lesa ukupitila mu kubelenga Icebo cakwe.—Abena Roma 8:35-39.

Ilyashi lya kukonkana ilyalekeleshe pe bungano lyakwete umutwe waleti “Umusango wa Citetekelo Cesu Uleeshiwa ku fya Kwesha fya Misango Misango.” Ilyashi lya kubalilapo lyatucinkwileko ukuti Abena Kristu bonse balapakaswa. Ukupakaswa kuba bunte kuli bambi, kulakosha icitetekelo cesu, kabili kutupeela ishuko lya kulanga bucishinka bwesu kuli Lesa. Nangu line tatuikolomwena amafya, tatwakabomfye inshila shipinkana na malembo ku kupwisha ukupakasa.—1 Petro 3:16.

 Kalanda wa lyashi lya bubili mu lyashi lya kukonkana ayaswike amepusho yakuma ukukanaipoosa mu mashiwi ya calo. Abena Kristu ba kubalilapo balipatile ulukakaala ne nkondo, kabili balishibe no kuti ni Lesa e o balingile ukuumfwila. Ne Nte sha kwa Yehova e fyo baba pali lelo, balomfwila sana icishinte citila: “Tamuli ba pano calo.” (Yohane 15:19) Apo ukweshiwa pa mulandu wa kukanaitumpa mu fikansa fya calo kuti kwabako mu kwangufyanya, indupwa shilingile ukusangako inshita ya kupituluka mu fyo Baibolo yalanda pali uyu mulandu. Nga fintu fye ilyashi lya butatu mu lyashi lya kukonkana lyalandile, ico Satana afwaya sana, te kutwipaya, lelo afwaya ukutusonga ukukanaba aba cishinka. Tulapeela ilumbo kuli Yehova nga twashipikisha muli bucishinka ukupumya, umupatikisha wa kucita bucisenene, ukukalifiwa, na malwele.

Ilyashi lya kulekeleshako ubu bushiku lyali bwite bushaiwamina ubwaleti “Palameni Kuli Yehova.” Ukumfwikisha imibele ya kwa Yehova iyapulamo kulatupalamika kuli wene. Alabomfya amaka yakwe ayashipelela ku kucingilila abantu bakwe, maka maka lwa ku mupashi. Ubulungi bwakwe tabwakaluka lelo bumulenga ukuteyanya ubumi bwabula impela kuli onse uubomba ubulungami. Amano ya kwa Lesa yamonekela mu fyo abomfeshe abantu bashapwililika mu kulemba Baibolo. Imibele yawamisha yaba kutemwa kwakwe, ukwamulengele ukuteyanishisha abantunse umwa kupusukila ukupitila muli Yesu Kristu. (Yohane 3:16) Pa kulekelesha kalanda wa lyashi afumishe icitabo cipya ica kucincimuna icitila Palameni Kuli Yehova.

Ubushiku Bwalenga Shitatu Bwakomaile pa Kupimpile Milimo Isuma

Umutwe wa bushiku bwalenga shitatu pe bungano waleti “Abantu Abapimpile Milimo Isuma.” (Tito 2:14) Programu wa lucelo atampilepo no lupwa lwalelanshanya ilembo lya  bushiku. Lyena pakonkele ilyashi lyaleti “Bushe Mwacetekela Yehova?” Inko shacetekela mu fintu fyalubana ukupitila mu kushintilila pa mano yabo abene no bukose. Lelo, ababomfi ba kwa Yehova mu kushipa no kusekelela bacetekela wene te mulandu no tuyofi.—Amalumbo 46:1-3, 7-11.

Ilyashi lyaleti “Mwe Bacaice—Pekanishisheni Inshita Yenu Iya ku Ntanshi mu Kuteyanya kwa kwa Yehova” lyayaswike icipusho caleti: Bushe uwacaice kuti aipakisha shani ubumi? Tengaipakisha pa kufwaisha indalama, ifikwatwa, no kulumbuka. Kalenga wesu mu kutemwa akoselesha abacaice ukumwibukisha ilyo bacili abanono. Kalanda we lyashi aipwishe bamo ababombeshe umulimo wa Bwina Kristu ilyo bali abaice, kabili twalimwene ukuti bali aba nsansa. Kabili caliweme nga nshi ukupokelela trakiti mupya, uwaleti Mwe Bacaice—Finshi Mukacita mu Bumi Bwenu?, uwapekanishiwe ku kwafwa baNte bacaice ukuipekanishisha inshita ya ku ntanshi iya ciyayaya mu kuteyanya kwa kwa Yehova!

Lyena pakonkele icilangililo cikalamba icafumine muli Baibolo icaleti “Iminineni Abashangila mu Nshita sha Mafya.” Calandile pa mulimo Yeremia abombele pa nshita ntali ukutula ku bwaice ukufika fye na pa nshita lintu Yerusalemu aonawilwe, ubonaushi ubo aseseme mu kupimpa. Yeremia ayumfwile ukuti talingile ukubomba umulimo wakwe, lelo alibombele te mulandu no kukaanya, kabili Yehova alimupuswishe.—Yeremia 1:8, 18, 19.

Pa numa ya cilangililo cikalamba pakonkele ilyashi lyaleti “Pashanyeni Yeremia—Bileni Icebo ca kwa Lesa no Kushipa.” Ilingi line bakabila ba Bufumu pali lelo e bo ababepa no kukubanya ifyebo fyabipisha batontapo. (Amalumbo 109:1-3) Na lyo line, nga Yeremia, kuti twashipikisha ukufupuulwa ukupitila mu kutemwa Icebo ca kwa Yehova. Kabili twalicetekela ukuti bonse abatulwisha tabakacimfye.

Ilyashi lya ku cintubwingi ilyaleti “Imibele ya Pano Isonde Ilepita,” lyalandilwe pa nshita yalinga icine cine. Ifintu pali ino nshita fileyaluka nga nshi. Baibolo yasobelele libela ukuti ifi fintu, e lyo no kupunda ukuti “umutende no mutelelwe,” fikabako ukufika fye na ku bushiku bwa kwa Lesa ubwa kutiinya kabili ubwa bupingushi. (1 Abena Tesalonika 5:3) Bukaleta ukwaluka kwa kusungusha—ukufumyapo inkondo shonse, bumpulamafunde, ulukakaala, no bulwele bwine. Kanshi ukucila ukucetekela ubwikashi bwa nomba, ino e nshita ya kufwaisha ukuipeelesha kuli bukapepa no kuba ne myendele yasanguluka lyonse.

Pa numa ya kusupawila isambililo lya Ulupungu lwa kwa Kalinda ilya ulya mulungu, pakonkele ilyashi lya kulekelesha pe bungano, ilyaleti, “Isulenimo Imilimo Isuma nga Bakabila ba Bufumu Abapimpa.” Kalanda akomaile pa fyo programu atucincimwishe lwa ku mupashi no kutukoselesha ukucetekela Yehova. Pa kusondwelela, twakoseleshiwe ukuba no busaka, ukutemwa, no kuba bakabila bapimpa aba Bufumu bwa kwa Lesa.—1 Petro 2:12.

Twaumfwile nge fyaumfwile ababomfi ba kwa Yehova aba mu nshiku sha kwa Nehemia, twabwelelemo ku mwesu no kusekelela pa mapaalo ya ku mupashi ayo twapokelele pe Bungano lya Citungu ilyaleti “Bakabila ba Bufumu Abapimpa.” (Nehemia 8:12) Bushe ili bungano lya kucincimusha talimulengele ukuba ne nsansa no mupampamina wa kutwalilila ukuba bakabila ba Bufumu abapimpa?

[Akabokoshi ne Cikope pe bula 23]

Icitabo Cipya ica Kwafwa Ukusambilila!

Pa kusondwelela ubushiku bwa kubalilapo pe bungano, abasangilweko balisekelele pa citabo cipya icafumine icaleti Pepeni Lesa Wine Wine Eka. Ici citabo citeyanishiwilwe ukusambilila na bapwisha icitabo ca Ukwishiba Uko Kutungulula ku Mweo wa Muyayaya kabili ukwabula ukutwishika cikakosha icitetekelo ca balya ‘abalemenena ku bumi bwa muyayaya.’—Imilimo 13:48.

[Abatusuminishe]

Icikope cili pa nkupo ya citabo: U.S. Navy photo

[Akabokoshi ne Fikope pe bula 24]

Ica Kwafwa Ukupalama Kuli Lesa

Kalanda we lyashi lyalekelesheko ubushiku bwalenga shibili ubwe bungano abilishe ukufuma kwa citabo cipya icaleti Palameni Kuli Yehova. Ici citabo cakwata ifiputulwa fine, iciputulwa cimo na cimo calanda pa mibele imo iyapulamo iyo Yehova akwata—amaka, ubulungi, amano, no kutemwa. Iciputulwa cimo na cimo muli ici citabo calikwata icipandwa cilanga ifyo Yesu Kristu ateyenye bwino bwino ica kumwenako ca fyo Lesa alanga imibele yakwe. Icikalamba ico ici citabo cipya cilembelwe kutwafwa na basambi besu aba Baibolo ukukosha sana icibusa cesu na Yehova Lesa.

[Akabokoshi ne Fikope pe bula 26]

Ukupanda Abacaice Amano ya ku Mupashi

Ubushiku bwalenga shitatu ubwe bungano bwali ubwaibela pantu e lyo kwali ukufumya trakiti waibela uwaleti Mwe Bacaice—Finshi Mukacita mu Bumi Bwenu? Ateyanishiwe ku kwafwa baNte bacaice ukupingulapo bwino pa fyo balefwaya ukucita ku ntanshi, uyu trakiti mupya apanda mano ya mu Malembo pa lwa kutendeka incito ishipwa mu mulimo wa kwa Yehova.