Bushe Yali ni Nkulo ya kwa Satana?

“NGA twamona ububi bwacitwa, kuti twatila yali ni nkulo ya kwa Satana. Takwabako inkulo imbi iyo abantu bakongamamo apakalamba, no kufwaisha kwa kwipaya amamilioni ya bantu bambi pa milandu ya mushobo, imipepele nelyo pa mulandu wa busambashi nelyo ubupiina.”

Ukusefya kwa pa caka ukwalenga 50 ukwa kulubulwa kwa bantu ba kaele abapooselwe mu nkambi sha kwipailwamo isha ciNazi kwabalamwine ifilandilwe pa muulu mu nyunshipepala ya The New York Times iya pa January 26, 1995. Ukwipayaululwa kwa baYuda ba ku Bulaya ukucila pa mamilioni 6, na ko kwali kwipayaula kwa mushobo ukwaishibikwa sana ku bengi mu lyashi lya kale. Mupepi na mamilioni yatatu aya bekashi ba ku Poland abaYuda balyonawilwe mu ciitwa “ukwipayaululwa kwa baYuda ba mu Bulaya ukwalabwa.”

Jonathan Glover mu citabo cakwe icitila Humanity—A Moral History of the Twentieth Century

atila: “Ukutunganya impendwa ya bantu baipaiwe mu nkondo ukutula mu 1900 ukufika mu 1989 kuti yaba mamilioni 86.” Asosa no kuti: “Abalefwa mu nkondo mu myaka ya ba1900 nabafula ica kuti nacikosa ukumfwikisha. Icipendo ca pa kati ica mpendwa ya bafwa tacaishibikwa, pantu nalimo ifiputulwa fibili muli fitatu (amamilioni 58) balipaiwe mu nkondo shibili isha calo conse. Lelo, nga ca kuti uku ukwipayaulula kwalyanene sana cila nshita, abalefwa mu nkondo nga baali nalimo abantu 2,500 cila bushiku, Uko e kuti ukucila pa bantu 100 mwi awala limo pa myaka 90.”

E ico, basosa abati imyaka ya ba1900 e yacililemo ukusuumwamo umulopa ukutula apo abantu babela pa calo. Nadezhda Mandelstam alemba mu citabo ca Hope Against Hope ati: “Natumona ukuti ububi bwalicimfya pantu insambu sha buntunse shalisuulwa no konaulwa.” Mu kulwishanya kwa busuma no bubi, bushe ububi cine cine bwalicimfya?

 [Abatusuminishe Ukubomfya Icikope pe bula 2]

COVER: Mother and daughter: J.R. Ripper/SocialPhotos

[Abatusuminishe Ukubomfya Icikope pe bula 3]

Icikope ca ba U.S. Department of Energy