“Palameni Kuli Lesa, Na o Akapalama Kuli Imwe”

Ifyo Baali Kale Ne Fyo Baba Nomba Icebo ca kwa Lesa Cileyalula Abantu

AMUMONA ba Tony ilyo bali abapungwe, nga mwalimwene ifyo bali abankalwe kabili aba lukakaala no kutemwa sana ukuya lyonse ku ncende shabipa mu Sydney, ku Australia. Baleyangala na bamukukulu. Ilingi line balepanga imilandu ya kutoba amayanda, ukulwa imbuli sha bamukukulu, no kulwe mbuli ne mfuti mu misebo.

Ba Tony batendeke ukupeepa ninshi bali ne myaka 9. Ilyo balefisha imyaka 14, ninshi balapeepa ibange cila bushiku kabili imikalile yabo yali iyabipa. Ilyo bafishishe myaka 16, balikunkwime ku muti wa heroin, kabili ici calengele no kuti balebomfya na cocaine, no muti wa LSD, na kuba ba Tony abene batila, “kwena nalebomfya conse icingankola.” Lyena batendeke ukushitisha imiti na mabumba ya bamukukulu yabili. Tapakokwele ba Tony baishibikwe ukuba bakalapashi bashintililwapo mu kushitisha imiti ku kabanga ka lulamba lwa Australia.

Cila bushiku ba Tony balepoosa indalama pa kati ka madola 160 na 320 (aya ku United States) kuli heroin ne bange. Lelo ulupwa lwabo lwalecula sana ku fintu ifingi. Batila, “ine no mukashi wandi twalesontwa imfuti ne myele pa menso imiku iingi kuli bamukukulu balefwaya imiti ne ndalama twakwete pa mwesu.” Pa numa ya kuba mu cifungo imiku itatu, ba Tony balengelwe ukutontonkanya pa fyo imikalile yabo yali no kuba ku ntanshi.

Nangu line ba Tony baleya ku calici, baletontonkanya ukuti balifuma kuli Lesa uo baishibe ati pa kukanda ababembu alebalungulusha umuyayaya mu helo. Lelo, ilyo Inte sha kwa Yehova babili babatandalile, ba Tony balipapile ukwishiba ukuti te fyo Lesa aba. Kabili ba Tony balitemenwe nga nshi pa kuumfwa ukutila kuti bawamya ubumi bwabo no kupokelela amapaalo ukufuma kuli Lesa. Amashiwi ya kwa Yesu Kristu ayakoseleshe sana ba Tony, ni yalya ayatila: “Kuli Lesa fyonse kuti fyacitwa.” (Marko 10:27) Amashiwi yafikile sana ba Tony pa mutima, mashiwi yatila: “Palameni kuli Lesa, na o akapalama kuli imwe.”—Yakobo 4:8.

Ba Tony nomba bakwete umulimo wa kulenga ubumi bwabo ukumfwana ne fyaba muli Baibolo. Batila: “Fwaka e yo nabalilepo ukuleka, kale nalyeseshe imiku iingi ukuti ndeke lelo nalefilwa. Ku maka ya kwa Yehova, nalilekele ukubomfya heroin ne bange, ifyanteekele ubusha pa myaka 15. Nshaletontonkanya ukuti nkaleka iyi misango.”

Ukucila ukutiina Lesa uo batila alalungulusha abantu mu helo—icisambilisho cishaba mu Baibolo—ba Tony na bena mwabo bapokelele isubilo lya kwikala umuyayaya muli paradise pe sonde. (Amalumbo 37:10, 11; Amapinda 2:21) Ba Tony batila, “palipitile inshita sana kabili nalibombeshe pa kuti nenge imikalile yandi ukumfwana ne fyo Lesa afwaya, lelo ukwafwa kwa kwa Yehova kwalinenga ukutunguluka.”

Ca cine, uyu muntu akunkwime ku miti asangwike  Umwina Kristu. Bena na bakashi babo, balibomba amaawala ayengi kabili balibomfya ifikwatwa fyabo mu mulimo wa kusambilisha Baibolo. Na kabili balebombesha ukukusha abana babo babili abatiina Lesa. Uku kwaluka kukalamba kwacitike pa mulandu wa maka yaluma ayo Icebo ca kwa Lesa, Baibolo, cakwata. Cine cine, e fyo no mutumwa Paulo alandile ati, “Icebo ca kwa Lesa ca mweo kabili ca maka.”—AbaHebere 4:12.

Nangu line bamo balimona ifi fya kumwenako fisuma, balapaasha ukwabula ne fishinka ukuti umulimo wa kusambilisha Baibolo uwa Nte sha kwa Yehova ulonaule ndupwa ne mibele isuma iya bacaice. Ifyacitike kuli ba Tony fyalipusana no ku kutunganya.

Abengi balishiba ukuti ukukunkuma kwabipisha ku miti kuti kwacincintilwa nga filya cali kuli ba Tony. Mu nshila nshi? Ukupitila mu kuba ne citetekelo muli Lesa ne Cebo cakwe, e lyo no kwaafwa kwa Bena Kristu basakamana kabili ababa no kutemwa. Ba Tony mu nsansa basondwelela ukuti: “Nalimona ifyo ifishinte fya mu Baibolo fyacingilila abana bandi. Ifisambilisho fya mu Baibolo fyalipususha icupo candi. Na bena mupalamano bandi nomba balalaala utulo ukwabula ubwafya pantu nshaba cintinya kuli bene.”

[Amashiwi pe bula 9]

‘Ku maka ya kwa Yehova, nalilekele ukubomfya imiti ikola iyanteekele ubusha pa myaka 15’

[Akabokoshi pe bula 9]

Ifishinte fya mu Baibolo Filabomba

Ifishinte fya mu Baibolo ifyalekanalekana fyalyafwa abakunkwime ku miti ukuleka uyu musango uonaula. Ifishinte fimo ni fi:

“Tuisangulule kuli fyonse ifikowesha umubili no mupashi, tube abafishapo bumushilo mu kutiina Lesa.” (2 Abena Korinti 7:1) Ukubomfya imiti ikola kutoba ifunde lya kwa Lesa.

“Akatiina ka kuli Yehova e ca kubalilapo ca mano, no kwishiba Uwa mushilo e mucetekanya.” (Amapinda 9:10) Akatiina ka kuli Yehova pa mulandu wa kumwishiba bwino ne nshila shakwe kwalyafwa abengi ukuleka ukubomfya imiti ikola.

“Tetekela Yehova umutima obe onse, na ku kwiluka kobe we mwine wishintililako; uko konse wenda umwishibe, na o akatambalike nshila shobe.” (Amapinda 3:5, 6) Ukushintilila pali Lesa no mutima onse no kucetekela wene kuti kwalenga waleka misango yonaula.