Bushe Ubufumacumi E Bufwaikwa Epela?

BUSHE cine cine ubufumacumi bulafwaikwa mu mikalile yesu iya cila bushiku? Ubufumacumi bwaba kukanabepa nelyo ukukanaba no bumbimunda; ukuba uwafumaluka; uwa cishinka; kabili uwa cine. Ukwabulo kutwishika, iyi mibele ilafwaikwa pa kuti tulundulule bucibusa busuma na bambi. Umutumwa Paulo akonkomeshe ati: “Mube ne cumfwila kuli bashikulwinwe ba buntunse muli fyonse, te kubombela ukumonwa, nga bateemuna abantu, lelo ku kufumaluka umutima, no kutiina Yehova.” (Abena Kolose 3:22) Ni bani bashingatemwa umuntu wa bufumacumi uwa musango yo ukubabombela? Pali lelo, aba bufumacumi pambi kuti bakwata ishuko ilya kusanga no kwikalilila pa ncito yabo.

Lelo, icilenga ukufwaya sana ukuba no bufumacumi ni co bulakuma bucibusa bwesu na Lesa. Abena Israele ba pa kale balipaalilwe na Lesa ilyo baumfwilile sana amafunde no kubake mitebeto. Ilyo alelanda pa kusanguluka kwa cilonganino, Paulo acincishe Abena Kristu ati: “Tucite umutebeto, te wa citutumushi ca kale, nangu wa citutumushi ca bubi no bubifi, lelo uwa mukate ushatutumushiwa uwa bufumacumi ne cine.” (1 Abena Korinti 5:8) Pa kuti ukupepa kwesu kusenaminwe na Lesa, tatufwaya fye ukuba no bufumacumi lelo na kabili twalibucindamika. Lelo, ishibeni ukuti ubufumacumi te bufwaikwa epela. Ubufumacumi bufwile ukusailishanya ne cine.

Abapangile ingalaba ya Titanic pamo pene na banininemo nalimo bacetekele mu bufumacumi ukuti ilya ngalaba te kuti ibunshiwe nangu panono. Lelo, pa lwendo fye ulwa kubalilapo mu 1912, iyi ngalaba yailepama mu cilibwe ca menshi makaasa kabili abantu 1,517 balifwile. AbaYuda bamo abaliko mu kutendeka kwa buKristu nalimo bacetekele mu bufumacumi mu nshila yabo iyo balepepelamo Lesa, lelo ukupimpa kwabo takwali “kupimpa umwabela ukwishiba kwine kwine.” (Abena Roma 10:2) Pa kuti Lesa atusenamine, tufwile ukushimpa ifyo twasuminamo mu bufumacumi pa fyebo fine fine. Inte sha kwa Yehova uko mwikala bakatemwa ukumwafwilisha ukubebeta icasanshiwamo mu kubombela Lesa mu bufumacumi na mu cine.