Iciipailo—Cinshi Cibomba mu Kupepa?

BUSHE mumona ukuti iciipailo calicindama mu kupepa kwenu? Ku bengi abaya ku macalici mu Kristendomu, napamo iciipailo kuti caba icacindama sana. Bushe mwalibala amutontonkanyapo ico Baibolo isosa pa kubomfya iciipailo mu kupepa?

Iciipailo ca kubalilapo icalumbulwa mu Baibolo ni cilya Noa akuulile pa kupeela amalambo ya nama ilyo afumine mu cibwato ca kupusukilamo pa numa ye Lyeshi. *—Ukutendeka 8:20.

Pa numa ya kufulunganya indimi pa Babele, abantunse basalangene mpanga yonse pano isonde. (Ukutendeka 11:1-9) Ukufwaisha ukupepa Lesa ukwa cifyalilwa kwalengele abantunse ukufwaya ukupalama kuli Lesa, uo baile baletaluka, ‘ukumupampanta’ kwati tabamona. (Imilimo 17:27; Abena Roma 2:14, 15) Ukutula mu nshiku sha kwa Noa, abengi balikuulila imilungu yabo ifiipailo. Imipepele yalekanalekana na bantu balibomfya ifiipailo mu kupepa kwa bufi. Apo balinunwike kuli Lesa wa cine, bamo balibomfya ifiipailo ku fya muselu, ukutuula abantu, na bana fye. Ilyo ishamfumu shimo isha Israele shafutatile Yehova, shakuulile ifiipailo ku milungu ya cisenshi, pamo nga Baali. (1 Ishamfumu 16:29-32) Lelo ni shani pa lwa kubomfya ifiipailo mu kupepa kwa cine?

Ifiipailo no Kupepa kwa Cine mu Israele

Pa numa ya kwa Noa, abaume bambi aba busumino bakuulile ifiipailo fya kubomfya mu kupepa Lesa wa cine, Yehova. Abrahamu akuulile ifiipailo pa Shekemu, lwa mupepi na Betele, ku Hebrone, na pa Lupili lwa Moria, apo apeele umwana wa mpaanga pe punda lya kwa Isaki. Pa numa, Isaki, Yakobo, na Mose baitemenwe ukukuule ifiipailo fya kubomfya mu kupepa Lesa.—Ukutendeka 12:6-8; 13:3, 18; 22:9-13; 26:23-25; 33:18-20; 35:1, 3, 7; Ukufuma 17:15, 16; 24:4-8.

Ilyo Lesa apeele abena Israele Amalango yakwe, abebele ukukuula ica kwikalamo, ihema lya kusenda, ilyaleitwa no kuti “ihema lya kulaishanya.” Ici cali cintu cacindama ico Lesa ateyenye ukuti balelandilamo nankwe. (Ukufuma 39:32, 40) Ica kwikalamo, nelyo ihema, cakwete ifiipailo fibili. Iciipailo ca fya bupe fya kuninika icapangilwe ku fimuti fya mushita no kupamwako umukuba, cabikilwe ku mwinshi kabili calebomfiwa ku kupeela amalambo ya nama. (Ukufuma 27:1-8; 39:39; 40:6, 29)  Iciipailo ca fye fungo, na co icapangilwe ne fimuti fya mushita no kupamwako golde, cabikilwe mu kati ke hema, pa ntanshi ya cipembe ca Mwashilisha. (Ukufuma 30:1-6; 39:38; 40:5, 26, 27) Ifye fungo ifyaibela fyalefutumwinwa palya imiku ibili mu bushiku bumo, ulucelo ne cungulo. (Ukufuma 30:7-9) Itempele lya pe, ilyo Imfumu Solomone yakuulile lyapalile ihema. Na lyo lyakwete ifiipailo fibili.

“Ihema lya Cine Cine” ne Ciipailo ca Mampalanya

Ilyo Yehova apeele abena Israele Amalango, tabapeele fye amafunde ya kukonka mu mikalile yabo na mu kupalama kuli wene mu malambo na mwi pepo. Ifingi ifyateyanishiwe fyalimo filya umutumwa Paulo aitile ati “icimpashanya,” “icilangililo,” nelyo “icinshingwa ca fintu fya mu muulu.” (AbaHebere 8:3-5; 9:9; 10:1; Abena Kolose 2:17) Nalimo tutile, ifingi ifyo Amalango yalandile tafyatungulwile fye abena Israele mpaka ukwisa kwa kwa Kristu, lelo na kabili fyali cinshingwa ca fyo Lesa alefwaya ukuti fifishiwepo ukupitila muli Yesu Kristu. (Abena Galatia 3:24) Cine cine, ifyali mu Malango fyalimo ukusesema. Ku ca kumwenako, umwana wa mpaanga uwa pa Ca Kucilila, uo umulopa wakwe wabomfiwe nge cishibilo ce pusukilo ku bena Israele aiminineko Yesu Kristu. E “Mwana wa Mpaanga uwa kwa Lesa, uulesenda ulubembu lwa ba pano calo,” uo umulopa wakwe wapongolwelwe pa kuti tulubulwe ku lubembu.—Yohane 1:29; Abena Efese 1:7.

Ifingi ifyakuma ihema ne tempele fyaleimininako ifintu fya cine cine ifya ku mupashi. (AbaHebere 8:5; 9:23) Na kuba, Paulo alembele pa lwe “hema line line, ilyaimikwe kuli Yehova, te ku muntu iyo.” Atwalilila ati: “Kristu aishile nga shimapepo mukalamba uwa fisuma ifyafishiwapo, pa kupita mwi hema likalamba kabili ilyacilapo ukupwililika ilishapangwa ku minwe, e kutila, ilishaba lya mu kubumbwa kuno.” (Heb. 8:2; 9:11) “Ihema likalamba kabili ilyacilapo ukupwililila” lyali litempele lya ku mupashi ilya kwa Yehova ilyakulisha. Imilandile ya mu Malembo ilangilila ukuti itempele lya ku mupashi ilyakulisha mitantikile iyo abantunse bapalaminamo kuli Yehova ukupitila mwi lambo lya kukonsolwela ilya kwa Yesu Kristu.—AbaHebere 9:2-10, 23-28.

Ukusambilila mu Cebo ca kwa Lesa ukuti fimo ifyalandwamo pamo ne fipimo fya mu Malango fiimininako ifya ku mupashi ifyakulisha kabili ifyacindamisha, kulakosha ukucetekela kwesu ukwa kuti Baibolo yalipuutwamo. Na kabili citucincisha no kutasha pa mano ya kwa Lesa ayalangishiwa mu kuibela mu Malembo.—Abena Roma 11:33; 2 Timote 3:16.

Iciipailo ca fya kuninika fya malambo na co calibamo ukusesema. Cimoneka kwati ciimininako “ukufwaya” kwa kwa Lesa nelyo ukuitemenwa kwakwe ukwa kupokelela ilambo lya kwa Yesu ilyapwililika.—AbaHebere 10:1-10.

Pa numa, mwi buuku lya AbaHebere, Paulo asosele ati: “Twakwate ciipailo ico abapyungila mwi Hema tabasuminishiwo kulyako.” (AbaHebere 13:10) Bushe ciipailo nshi alelandapo?

Bakelula wa baKatolika abengi batila iciipailo calumbulwa pa AbaHebere 13:10 ni cilya cabomfiwe ku Lukalisitiya, “insakalamenta” iyo batila ukupitila muli yene Kristu alapeela ilambo cipya cipya pa Minsa. Lelo, kuti mwamona  nga mwabebeta icalelandwapo ukuti iciipailo ico Paulo alelandapo ca mampalanya. Abasoma abengi batila “iciipailo” calandwapo muli ili lembo ca mampalanya. Giuseppe Bonsirven, umuJesuit atile: “Ici cilomfwana bwino sana na fyonse ifyalandwa mu mampalanya muli kalata ya [ku baHebere.]” Atila: “Ku Bena Kristu ishiwi ‘iciipailo’ intanshi lyalebomfiwa lwa ku mupashi kabili ni pa numa ya kwa Irenaeus, maka maka pa numa ya kwa Tertullian na St Cyprian, e lyo lyatendeke ukuloshiwa ku lukalisitiya sana sana kwi tebulo lya lukalisitiya.”

Nga fintu magazini ya baKatolika yasosele, ukubomfya iciipailo kwalyanene mu nshita ya kwa “Constantine” ilyo “batendeke ukukuula ifikuulwa fya kupepelamo.” Ulupapulo lwa Rivista di Archeologia Cristiana (Ukubebeta Ifyashulwa Ifya BuKristu) lwatile: “Kwena takuli uwingalanda ukuti mu myaka 200 iya kubalilapo kwali ifikuulwa fyapangiilwe ukupepelwamo, lelo amapepo yalebeela mu mayanda ya bantu . . . , mu miputule iyo pa numa fye ya mapepo yalebomfiwa ku fyo yapangiilwe.”

Ifyo Kristendomu Abomfya Iciipailo

Ulupapulo lwa baKatolika ulwa La Civiltà Cattolica lwatile, “iciipailo calicindama sana ica mwi calici na mu Lukuta lwa mweo.” Lelo, Yesu Kristu tatendeke imipepele nangu imo iyali no kucitilwa pa ciipailo; kabili taebelepo abasambi bakwe ukubomfya iciipailo mu kupepa. Ilyo Yesu alandile pa ciipailo pali Mateo 5:23, 24 na mu malembo yambi, alelanda pa fyo abaYuda balecita mu mipepele yabo, lelo, taloseshe mu kuti abakonshi bakwe bali no kupepa Lesa ukubomfya iciipailo.

George Foot Moore (1851-1931), umwina Amerika uwasoma ilyashi lya kale alembele ati: “Ifikalamba ifyalecitwa mu mipepele ya Bena Kristu fyaleba ifyapalana, lelo mu kupita kwa nshita, impupo shishacindama shimo shimo isho Justin alandilepo pa kati ka mwanda wa myaka uwa bubili, balishilundulwile no kutendeka ukushikonka mu kupepa.” Impupo sha baKatolika ne fya kusefya mu mipepele fyalifula kabili fyalipikana ica kuti fyaba lubali lwa masomo ya fya mapepo mu maseminario yabo. Moore atwalilila ukusosa atila: “Icalengele sana uyu musango uwaba mu mipepele yonse ukulunduluka Cipingo ca Kale ilyo bashimapepo ba buKristu batendeke ukumonwa nga bapyana ifipuna fya bushimapepo [bwa ciYuda] ubwateyanishiwe na Lesa. Ifya kufwala fisuma sana ifya kwa shimapepo mukalamba, ne fyo bashimapepo bambi balefwala pa kusefya, ibumba lileenda mu mutalalila, amabumba ya bakemba abena Lebi baleimba isha malumbo, icushi ca fye fungo pa cifutumwino calepeelela—fyonse ifi fyalemoneka kwati musango wa kupepa uwafuma kuli Lesa, icalengele icalici ukumona kwati cali fye bwino ukufwaya ukulingana napamo no kucisha ilya mipepele ya ku kale iya lulumbi.”

Kuti mwapapa ukwishiba ukuti impupo ishingi, ukusefya, ifya kufwala ne fipe fimbi ifibomfiwa mu kupepa mu macalici yalekanalekana, te fisambilisho fya Bwina Kristu ifyaba mu Malandwe, lelo fishilano ne mpupo sha baYuda na basenshi. Ulupapulo lwa Enciclopedia Cattolica lwatile baKatolika “bafumya ukubomfya iciipailo ku buYuda na ku busenshi.” Minucius Felix, ndubulwila wa muli ba200 C.E. alembele ati, Abena Kristu tabakwete ‘amatempele ne fiipailo.’ Icitabo cilondolola amashiwi ica Religioni e Miti (Imipepele ne Nshimi) na co catile: “Abena Kristu ba kubalilapo balikeene ukubomfya iciipailo pa kuti ukupepa kwabo kupusane no kwa baYuda na basenshi.”

Ico ubuKristu bwashimpilwe sana sana pa fishinte ififwile ukupokelelwa no kubomfiwa mu bumi lyonse kabili mu fyalo fyonse, umusumba wa mushilo nelyo itempele lyakwete ifiipailo, nelyo bashimapepo ba buntunse abali ne fifulo fyaibela abalefwala ifya kufwala fyaibela, tafyalekabilwa na kabili. Yesu atile: “Inshita ileisa ilyo tamwakapepele Tata mu lupili ulu nangu mu Yerusalemu. . . . Bakapepa bene bene bakapepela Tata mu mupashi na mu cine.” (Yohane 4:21, 23) Amacalici ayengi ayakonka impupo shapikana kabili ayabomfya ifiipailo, balasuula ifyo Yesu alandile pa fyo Lesa wa cine afwile ukupepwa.

[Futunoti]