Ukusumina Muli Lesa Nalimo Tushaishiba

ABANTU babili pali batatu mu Germany balisumina muli Lesa. Lelo, ilyo abantu ukucila pali 1,000 baipushiwe ukulondolola Lesa basuminamo, icinabwingi balondolwele ifyapusanapusana. Magazini isabankanya ilyashi iya FOCUS yashimika ati: “Abena Germany bakwata ubwishibilo bwalekanalekana pali Lesa nga fintu fye abantu bene bapusanapusana.” Nangu ca kuti caliba bwino ukusumina muli Lesa, bushe te ca bulanda ukusumina muli wene ukwabula ukwishiba ifyo aba?

Te mu Germany mweka umo abantu bashaishiba ubuntu bwa kwa Lesa; lelo na mu fyalo fimbi ifya ku Bulaya. Ukufwailisha kwacitilwe ku Austria, ku Britain, na ku Netherlands kwasokolwele ifyo abengi basumina ukuti Lesa aba “maka yapulamo nelyo inkama ishingalondololwa.” Maka maka abacaice, nangu fye abasumina muli wene, batila aba ni nkama.

Bushe Lesa Mwalimwishiba Bwino?

Palibo bupusano ubukalamba nga nshi pa kwishiba umuntu no kumwishiba bwino. Ukwishibo muntu—imfumu tushamonapo, kalapashi wa mangalo, umuntu walumbuka tutamba muli filimu—kwishiba fye ukuti e ko aba. Lelo, ukwishibo muntu bwino, kusanshamo ifingi. Cisanshamo ukwishiba bwino imibele ya uyo muntu, imyendele, ifyo ayumfwa, ifyo atemwa ne fyo apata, kabili ifyo apanga ukucita ku ntanshi. Ukwishiba bwino muntu kulenga twaba ifibusa sana na wene.

Abantu abengi balipingulapo ukuti ukwishiba Lesa—nelyo ukwishiba fye ukuti e ko aba—te cikabilwa fye epela. Balilunduluka mu kwishiba Lesa bwino. Bushe balisanga ukuti calicindama ukumwishiba? Umwaume uwe shina lya Paul, uwikala ku kapinda ka ku kuso aka Germany kabili uo inshita imo uwasumine fye muli Lesa mu cinkumbawile, apingwilepo Ukumwishiba bwino. Paul alondolola ati: “Ukwishiba Lesa bwino cikabila ukuba ne nshita no kubombesha, lelo ifilambu fitumbukamo fikalamba. Imikalile ilawama nga twaba na bucibusa busuma na Kabumba.”

Bushe ukwishiba Lesa bwino kwaliwaminwa ukubomfya inshita no kuibikilishako? Mukwai belengeni icipande cikonkelepo.

[Amashiwi pe bula 3]

Palibo bupusano ubukalamba nga nshi pa kwishiba umuntu no kumwishiba bwino