Bomfyeni Bwino Inshita Ilyo Ifintu Fyayaluka

Ba Pum, ba Jan, ba Dries, na ba Otto, ni baeluda ba Bwina Kristu bekala mu Netherlands kabili aba bonse bane balipalana mu fingi. Bonse balyupa kabili balikwata na bana. Cimbi na co, imyaka ya ku numa, balebomba incito kabili baleikala bwino sana. Lelo, bonse bene balilekele incito no kutendeka ukubomfya inshita yabo yonse na maka ku kubomba imilimo itungilila Ubufumu. Cinshi cabafwile ukwaluka ifi? Bonse balibomfya bwino iyi inshita ifintu fyayaluka.

FWE bengi imikalile ikaaluka kuli pele pele. Ukwaluka ukwingi, pamo ngo kuupa no kuupwa, ukukwata abana, nelyo ukusakamana abafyashi abakoloci, kulaleeta imilimo na imbi. Lelo, ukwaluka kumo kulatupeela ishuko lya kulundulula ubutumikishi bwesu ubwa Bwina Kristu. (Mateo 9:37, 38) Ku ca kumwenako, abana besu abakalamba kuti batendeka ukuikalila nelyo kuti twaleka incito.

Na kabili, nangu ca kuti ifintu kuti fyayaluka kuli ifwe, tulefwaya nelyo tatulefwaya, Abena Kristu bamo balicitapo fimo pali uko kwaluka icalenga no kuti bakwate inshita iikalamba iya kubomba mu butumikishi. Ifi fine e fyo ba Pum, ba Jan, ba Dries, na ba Otto bacitile. Bacitile shani?

Ilyo Abana Batendeka Ukuikalila

Ba Pum balebomba incito ya kusunga ifyalembwa fya ndalama pa kampani kapanga imiti. Ba Pum na bena mwabo, ba Anny, ilingi balebombako bupainiya bwa kwafwilisha pamo na bana babo abanakashi babili. Ba Pum na ba Anny baleteyanya no kwangalila pamo na bambi abalebomba bupainiya. Bashimika ati, “Ici calebacingilila ku mafya yafuma mu kubishanya kubi.” Ica kumwenako ca bafyashi babo calengele abana bonse babili ukuba bapainiya ba nshita yonse ilyo bapwile isukulu lya ku sekondari.

Ilyo abana batendeke ukuikalila, ba Pum na ba Anny balimwene ukuti uku kwaluka kwalengele bakwete inshita ne ndalama na fimbi ifyali no kubafwa ukutandala ku fifulo fimo nelyo ukuleshe citendwe mu nshila shimbi. Lelo, aba baupana babomfeshe iyi nshita ifintu fyayalwike ku kulundulula ubutumikishi bwabo ubwa Bwina Kristu. E co, ba Pum baipwishe abene ba ncito ukubafumishako ubushiku bumo ubwa kubomba cila mulungu. Pa numa ba Pum bapangile amapekanyo ya kuti baletendeka imilimo pa 7:00 hrs no kwinuka pa 14:00 hrs. Kwena ukubomba inshiku shinono kwali no kulenga balefola indalama shinono isha kwikalilamo. Na lyo line, ba Pum balitungulwike, kabili mu 1991 batendeke ukubomba bupainiya bwa nshita yonse nga bakashi babo.

Lyene ba Pum babepwishe ukulayafwa uwalesakamana Iciyanda ca Kulonganinamo ica Nte sha kwa Yehova. Ubo bwite bwalolele mu kuti aba baupana bali no kusha ing’anda yabo  umo baikele pa myaka 30 no kukuukila mu ng’anda yaba pa cifulo ca Kulonganinapo. Balikuukile. Bushe Calyafishe? Ba Anny bayasuka ati lyonse nga bafuluka ukwikala mu ng’anda yabo, baleipusha ati ‘Bushe mbe nga muka Lote?’ Balikeene ‘ukucebukila ku numa.’—Ukutendeka 19:26; Luka 17:32.

Ba Pum na ba Anny batila ico basalilepo ukucita calibaleetela amapaalo ayengi. Pa mapaalo ayengi ayo baipakisha paba ne milimo babomba pa Ciyanda ca Kulonganinamo, ukuteyanya amabungano ya citungu, no kulanshanya na bakangalila ba miputule (abatumikishi benda) abalanda amalyashi pali ici ciyanda. Limo limo, balatandalila ifilonganino fyalekanalekana ilyo ba Pum balebomba nga kangalila wa muputule.

Cinshi calengele aba baupana ukutunguluka mu kulundulula umulimo wabo? Ba Pum batila: “imikalile yobe nga yayaluka sana, ufwile ukupampamina pa kubomba bwino ne fyo fine fintu ifipya.”

Ukutendeka Imikalile Yaanguka

Ba Jan na bakashi babo, ba Woth, bakwata abana batatu. Nga ba Pum no lupwa lwabo, ba Jan balibomfeshe bwino inshita ilyo ifintu fyayalwike. Pa myaka iingi, ba Jan balikwete incito iisuma mu banki kabili ulupwa lwabo lwaleikala bwino. Lelo, batendeke ukufwaisha ukulundulula ubutumikishi bwabo. Balondolola ati: “Mu bumi bwandi, naumfwikishe icine kabili ukutemwa natemwa Yehova kwalikulile.” E co, mu 1986, ba Jan bayalwile imibombele yabo. Batila: “Nashukile amateyanyo yapya ayali pa ncito kabili natendeke ukubomba amaawala ayanono. Abanandi abasungwike pali ici batendeke ukunjita ati Diwodo pantu nalebomba fye pali dinsdag [Cibili], woensdag [pali Citatu], na donderdag [pali Cine]. Indalama nalefola shalicepeleko na mapesenti 40. Nashitishe ing’anda yesu no kushita ing’anda ya pa mumana pa kuti twingabombela uko bakabilisha ba Bufumu balekabilwa sana. Lyene napokele penshoni bwangu; indalama shalicepele na kabili na mapesenti 20, lelo, mu 1993 nalitendeke ukubomba bupainiya bwa nshita yonse.”

Pali lelo, ba Jan baba muli Komiti wa Kumfwaninamo ne Fipatala uwa Hospital Liaison Committee kabili balitwalilila ukwangalila. Te mulandu no kulwalilila, ba Woth balabombako bupainiya bwa kwafwilisha limo limo. Abana  babo bonse batatu nomba balyupa no kupwa, kabili bonse pamo na bena mwabo batumikishi bapimpa aba Bufumu.

Bushe ba Jan na ba Woth bakumamo shani ukwikalila mu tuntu utunono uto bakwata? Ba Jan bayasuka ati: “Ilyo twalekwata ifingi, tatwaleangwa sana ifikwatwa. Muno nshiku napamo te kuti cumfwike bwino ukulolela pa kuti tushite cimo, lelo, amapaalo ya ku mupashi na mashuko twapokelela e yapyanapo.”

Nga ba Jan na ba Woth, ba Dries na bakashi babo, ba Jenny, nabo basalilepo ukwangusha imikalile yabo pa kuti baangwe sana imilimo ya Bufumu. Ba Dries na ba Jenny balebomba bupainiya mpaka ilyo bakwete umwana. Lyene pa kuti basakamane ulupwa lwabo, ba Dries balebomba umulimo wa bukalemba pa kampani akakalamba. Ababengishe ncito balitemenwe imibombele yabo kabili babapeele icifulo icikalamba. Lelo, ba Dries balikeene ico cifulo pantu abasumina nga balekwata inshita iinono fye iya kubomba imilimo ya Bwina Kristu.

Pa kukusha abana no kuteensha banyina wa ba Jenny abalwele, aba baupana balekabila inshita iikalamba na maka. Na lyo line batwalilile ukulundulula umupashi wa bupainiya. Cinshi cabafwile ukucite co? Ba Jenny balondolola ati: “Twaleikala na bapainiya, twalelaalika bapainiya ku ca kulya, kabili twalepekanishisha ba kangalila ba miputule umwa kwikala.” Ba Dries basosa no kuti: “Twalyangwishe imikalile kabili tatwalekongola. Twapingwilepo ukukanacita amakwebo ayakalamba nelyo ukushite ng’anda, pa kuti ifyo fintu tafitupumfyenye ku ntanshi.”

Ukupingulapo kwa ba Dries na ba Jenny ukwa kwalula ifintu pa kuti bakwate inshita ikalamba iya kubomba imilimo ya Bufumu kwafuminemo ifilambu. Abana babo bonse babili ni baeluda, kabili umo pali bene ni bapainiya pamo no mwina mwakwe. Ba Dries na ba Jenny balebomba bupainiya bwaibela, kabili pa numa ba Jenny baleenda na ba Dries mu mulimo wa kutandalila ifilonganino. Pali nomba babomfi bakuitemenwa pa Bethel, apo ba Dries baba muli Komiti wa Musambo.

Ukupoka Bwangu Penshoni

Nga ba Dries na ba Jenny, ba Otto na bakashi babo, ba Judy, balebomba bupainiya ilyo bashilakwata abana babili abakashana. Ilyo ba Judy bali ne fumo lya pa kubala ba Otto baingile incito ya bukafundisha pa sukulu.

Ilyo abana balekula, ba Otto na ba Judy ilingi balelaalika bapainiya mu mwabo pa kuti abana babo abanakashi balemona insansa shakwata Abena Kristu babomba umulimo wa nshita yonse. Mu kupita kwa nshita, umwana wabo umwanakashi umukalamba pali bonse, atendeke bupainiya. Pa numa, aile  kwi Sukulu lya Gileadi, kabili wene pamo no mulume wakwe, pali nomba ni bamishonari ku calo cimo ica mu Afrika. Umwana wabo umwanakashi umwaice atendeke bupainiya mu 1987, kabili ba Judy na bo balitendeke bupainiya.

Ilyo ukwaluka kwa fintu kwalengele ba Otto ukubomba amaawala yanono ku sukulu, babomfeshe inshita yaleshalako ku kubomba bupainiya. Kuli pele pele, balilekele incito. Pali lelo, babomfya ukulamuka kwabo ukwa bukafundisha ku kukoselesha ifilonganino lwa ku mupashi.

Cinshi ba Otto bale-ebako abapoka bwangu penshoni? “Nga mwaleka incito, te kwesha ukusalapo ukutuusha umwaka umo nelyo ukucilapo. Cilanguka ukubelesha ‘ukwikala fye.’ Bwangu bwangu, mukalabako kuli bupainiya. Lelo, tendekeni ukulundulula ubutumikishi bwenu ilyo line fye.”

Ukubomfya Ifyo Mwaishiba

Ca cine, bamunyinefwe pamo nga ba Pum, ba Jan, na Dries, na ba Otto pali nomba tabakwata bukose na maka bakwete ilyo bali abaice. Lelo, balikosoka sana, balishibe ifingi, kabili balikwata amano. (Amapinda 20:29) Balishiba umo ukuba wishi kwalola, kabili apo balibombela pamo na bakashi babo, balishiba ifyasanshiwa mu kuba nyina. Pamo na bakashi babo, balicimfya amafya ya mu lupwa no kwimikila abana babo amabuyo ya ku mupashi. Ba Otto batila: “Apo ndi kangalila wa muputule, nga nafunda pa milandu ya lupwa, ukufunda kulaba bwino pantu na ine nalikushapo abana.” E cimo cine na ba Dries, ukuba wishi nomba kwalenga ulupwa lwa Bethel umwaba abacaice abengi ukukwata uwa kubafwa.

Ifyo aba ba munyinefwe baishiba fyabalenga ukusakamana ukukabila kwa filonganino ukwalekanalekana. Kuti twatila, ifya citika mu bumi bwabo, fyalinona ifisolobelo babomfya, pa kuti balebomfya amaka yabo mu nshila ya kunonsha. (Lukala Milandu 10:10) Na kuba, pa nshita iili yonse, kuti bacite ifingi ukucila abakosa lwa ku mubili lelo abashaishiba fingi.

Aba bamunyinefwe pamo na bena mwabo, baba fya kumwenako fisuma ku bacaice ababa pa bantu ba kwa Yehova. Abacaice balamona ukuti abaupana pamo nga aba balikwatapo amafya ayengi na mapaalo ayalembwa mu mpapulo shesu isha Bwina Kristu. Tulakoseleshiwa ukumona abaume na banakashi abakwata umupashi wa kuitemenwa nga Kalebu, uwalombele umulimo wayafya nangu line ali mukalamba.—Yoshua 14:10-12.

Pashanyeni Icitetekelo Cabo

Bushe kuti mwapashanya icitetekelo ne milimo ya aba baupana abalandilwepo muli cino cipande? Ibukisheni ukuti baleikala umwabela icine. Balengele abana babo ukutemwa bupainiya. Ba Jan balondolola ati bacitile fyo, “ukupitila mu kuba ica kumwenako mu kutemwa Lesa no kuteyanya kwakwe, pa kuteyanya ukubishanya kusuma, no kusambilisha abana babo ifya kuiteka.” Na kabili balebomba no kwangalila capamo no lupwa. Ba Pum batila, “Pa nshita ya kutusha, cila lucelo ulupwa lonse lwaleya mu kushimikila no kuipakisha ukutusha capamo mu nshita ya kasuba.”

Na kabili, aba Bena Kristu balepekanishisha libela, pa kuti ilyo ifintu fyayaluka, bali abaiteyanya ukubomba bwino muli iyo mikalile ipya. Balimike amabuyo no kusala ifya kucita ifyabalengele ukufikapo bwangu pa mabuyo yabo. Balefwailisha inshila ya kucefeshamo inshita balepoosa ku ncito kabili baliitemenwe ukwikalila fye mu ndalama shinono. (Abena Filipi 1:10) Abakashi balyafwile sana abalume babo. Bonse capamo balefwaisha ukwingila pa “mwinshi ukalamba kabili uwa kubombeshamo” ne cafumamo ca kuti balaipakisha amapaalo yakalamba ukufuma kuli Yehova.—1 Abena Korinti 16:9; Amapinda 10:22.

Bushe na imwe mulafwaisha ukulundulula ubutumikishi bwenu? Nga ni fyo, ukubomfya bwino nshita ilyo ifintu fyayaluka kukamwafwa ukucita ico.

[Icikope pe bula 20]

Ba Pum na ba Anny balesakamana Iciyanda ca Kulonganinamo

[Icikope pe bula 20]

Ba Jan na ba Woth balebombela pamo umulimo wa kushimikila

[Icikope pe bula 21]

Ba Dries na ba Jenny balebomba pa Bethel

[Icikope pe bula 21]

Ba Otto na ba Judy baleipekanya ukuyatandalila icilonganino cakonkapo