Bushe Ubupiina Bukabala Abupwa?

SOLOMONE, Imfumu ya mano iya Israele wa pa kale yatile: “Moneni, ifilamba fya bacitwo lumanimani, abashaba na kasansamusha—ku kuboko kwa ba lumanimani kufuma amaka, lelo kuli aba takwaba kasansamusha!” (Lukala Milandu 4:1) Ukwabula no kutwishika, abengi abacitwo ulumanimani abo alelandapo bali bapiina.

Indalama te sho twingapiminako fye ubupiina. Ukulingana ne fyebo fyafumine ku World Bank mu June 2002, “batungenye ukuti mu 1998 abantu amabilioni 1.2 mwi sonde lyonse baleliila mu ndalama ishishafikile kuli K4,831 pa bushiku bumo. . . na baleliila mu ndalama shishafikile kuli K9,662 pa bushiku bumo bali amabilioni 2.8.” Batile nangu line ifyo fipendo fyali pa nshi ukucila ifyo batungenye pa kubala, “ficili pa muulu sana nga kukonka ubupiina bwa bantu.”

Bushe ubupiina bukatala abupwa? Yesu Kristu aebele abasambi bakwe ati: “Abapiina mwaba na bo pe.” (Yohane 12:8) Lelo, bushe ici cilolele mu kuti ubupiina ne fyo buleeta ifyabipisha fikatwalilila pe na pe? Iyo, pantu nangu ca kutila Yesu talaile abakonshi bakwe ukuti bonse bakaba abakankaala, tatufwile ukusondwelela ukuti amashiwi yalolele mu kuti takuli ifyo abapiina bengasubila.

Te mulandu no kubombesha kwa bantunse e lyo na malayo ya kufumyapo ubupiina ayashifishiwapo, Icebo ca kwa Lesa, Baibolo citulaya ukuti nomba line fye takwakabe abapiina. Na kuba, Yesu abilile “mbila nsuma ku bapiina.” (Luke 4:18) Iyi mbila nsuma yabamo no bulayo bwa kuti ubupiina bukafumishiwapo. Ici cikacitika ilyo Ubufumu bwa kwa Lesa bukaleta ifintu ifipya pano calo.

Mwandi icalo cikaaluka! Yesu Kristu, Imfumu ya mu muulu ‘akalililo bulanda umulanda no mubusu, ne myeo ya babusu akapususha.’ Cine cine ‘akalubule myeo yabo mu kunyanyantilwa na mu kufyengwa.’—Amalumbo 72:13, 14.

Ulwa iyo nshita, pali Mika 4:4 patila: “Bakekalo muntu onse mwi samba lya mwangashi wakwe, kabili mwi samba lya mukunyu wakwe, tapakabe na wa kututumya; pantu akanwa ka kwa Yehova nakasosa.” Ubufumu bwa kwa Lesa bukapwisha amafya yonse aya bantunse, bukafumyapo fye no kulwala ne mfwa. Lesa “akamine mfwa ukumina kwa pe. Shikulu Yehova akafuuta ne filamba pa finso fyonse.”—Esaya 25:8.

Kuti mwacetekela aya malayo pantu yalipuutwamo na Lesa umwine. Cinshi mushingabebetela ifishinka ifilanga ukuti Ukusesema kwa mu Baibolo kwalicetekelwa?

[Abatusuminishe Ukubomfya Icikope pe bula 32]

Icikope ca baFAO/M. Marzot