Ubushiku Bwacindamisha

BWALI bushiku bwawemye umupwilapo imikalile ya bantunse ku ciyayaya. Takwatala akuba ubushiku ubuli bonse ukutula apo umuntunse abela pe sonde ubwabala abukuma inshita ya ku ntanshi iya bantunse ngo bu. Bwali e bushiku Yesu apwishishishe fyonse ifyo aishiile pe sonde. Ilyo apampaminwe pa cimuti ca kucushiwilwapo, aishishe icefu pa kufwa no kupunda ati: “Nacipwa!” (Yohane 19:30) Bushe bufwayo nshi Yesu aishiile?

Baibolo itila, “Umwana wa muntu taishile ku kupyungilwa, lelo ku kupyungila no kupeelo mweo wakwe icilubula ku kukabulamo abengi.” (Mateo 20:28) Yesu apeele umweo wakwe, nelyo ubumi bwakwe, ukuti abantunse bapusuke ku lubembu ne mfwa ifyo bapyana. Cine cine, “Lesa atemenwe aba pano calo ukutemwa kwa kuti apeele Umwana wakwe uwafyalwa eka, ukuti onse uumutetekela eonaika lelo abe no bumi bwa muyayaya.” (Yohane 3:16) Mwandi ilambo lya kwa Yesu kupekanya kwacindama icine cine!

Paba umulandu na umbi untu ubushiku bwa mfwa ya kwa Yesu bwacindamina sana. Pali bulya bushiku Umwana wa kwa Lesa asambilishe abatumwa bakwe ifyacindama ifyali no kubafwa ukutwalilila ne citetekelo. Ifyo filya fyebo fya kulekelesha fifwile fyafikile pa mitima ya balya basambi! Finshi abasambilishe? Bushe kuti twanonkelamo shani mu fyo Yesu abasambilishe? Ifi fipusho fyalalandwapo mu cipande cikonkelepo.