Tulemulaalika Ukusangwako

UMULALILO wa kwa Shikulu, uo Shikulu Yesu Kristu atendeke mupepi ne myaka 2,000 iyapitapo, te ca kucitika fye ica mu lyashi lya kale. Ukutula apo watendekelwe walikuma abantu na maka icine cine. Pa kukuntwa ku mutima ne fyo babelenga mu fyalembwa mu Malandwe pa cacitike bulya bushiku, abengi balatukuta ukusefya Umulalilo wa kwa Shikulu mu nshila shapusanapusana.

Ici te kuti citupapushe, pantu Yesu Kristu umwine aebele abakonshi bakwe ukusefya ici ca kucitika lyonse. Abebele fye mu kulungatika ati: “Mulecite ici ku kunjibukisha.”—Luka 22:19; 1 Abena Korinti 11:23-25.

Kwena, pa kuti umo anonkelemo icine cine mu kusefya, afwile ukumfwikisha bwino umo calola, nge fyo Icebo ca kwa Lesa, Baibolo, calanda. Kabili, calicindama ukwishiba ico Baibolo ilanda pa bushiku bwa kusefeshapo ne nshila ya kusefeshamo.

Pa kukonka ifyo Yesu alandile, Inte sha kwa Yehova icalo conse bakalongana pali Citatu icungulo bushiku, pa April 16, 2003, ku kusefya imfwa ya kwa Yesu. Kakaba kashita bakabebeta Amalembo no kubukulula icitetekelo cabo no kutemwa uko batemwa Shikulu Yesu Kristu, uwatile: “Lesa atemenwe aba pano calo ukutemwa kwa kuti apeele Umwana wakwe uwafyalwa eka, ukuti onse uumutetekela eonaika lelo abe no bumi bwa muyayaya.” (Yohane 3:16) Mulelaalikwa ku kulongana na bo cilya cungulo pa kuti na imwe bene mukakoshe icitetekelo cenu no kutemwa mwatemwa Yesu Kristu na Shifwe uwa muulu, Yehova Lesa.