Umulalilo wa kwa Shikulu—Bushe E Cinshi?

BUSHE cinshi mwibukisha nga mwaumfwa ati “umulalilo wa kwa Shikulu”? Abantu abengi batontonkanya ulwa cikope cayemba icalengwa pa cibumba mu Milan, ku Italy, ico Leonardo da Vinci alengele (1452-1519). Icishinka ca kuti ukufuma fye ku kale Umulalilo wa kwa Shikulu walitemwikwa ku baishiba ukulenga, ku balemba amalyashi, na ku balisha inyimbo.

Lelo bushe uyu Mulalilo wa kwa Shikulu, e cinshi, kabili wakuma shani abantu ilelo? Ifitabo fiitwa amaencyclopedia na madikishonari kuti yatila Umulalilo wa kwa Shikulu, uo bambi batila Mulalilo wa Kulekeleshako, ca kulya ico Yesu Kristu aliile na batumwa bakwe icungulo bushiku pa ntanshi ya mfwa yakwe iya bulilambo. Apo e mulalilo wa kulekelesha Yesu aliile na bakonshi bakwe aba busumino, ilingi line abantu bawita Umulalilo wa Kulekelesha. Kabili apo watendekwe na Shikulu Yesu Kristu, ishina lya kuti Umulalilo wa kwa Shikulu e lyalinga sana.

Pa myaka iingi, abantu abengi balipoosa imyeo yabo pa fyo balemona ukuti e fyalinga kufwilapo. Imfwa shabo shimo shalinonsha abantu bamo pa kashita. Nelyo ca kuti imfwa sha aba bantu shalinonseshe bamo pa kashita, takwaba nangu imo pali ishi mfwa iingalingana ne ya kwa Yesu Kristu ukucindama. Kabili, ukutula apo umuntu atampila ukucula takwaba imfwa iyabala aikuma abantunse bonse nge mfwa ya kwa Yesu. Mulandu nshi?

Pa kwasuka ico cipusho no kumwaafwa ukusanga ifyo Umulalilo wa kwa Shikulu wamukuma, shi belengeni icipande cikonkelepo.