Bushe Ukutemwa kwa Cishinka Kwacindama Shani?

BAIBOLO itila: “Icifwaikwa mu muntu kutemwa kwa cishinka.” (Amapinda 19:22, NW) Cine cine, ukuba ne cikuuku pa mulandu wa kutemwa kulafwaikwa sana. Lelo, muli Baibolo, “ukutemwa kwa cishinka” kulosha ku cikuuku cilangwa pa mulandu wa bucibusa bwabapo kale, pamo nga bulya bubapo ilyo umo acitila umbi ifya nkumbu. E co, busanshamo na bucishinka.

Imfumu Yoashi iya Yuda yalifililwe ukulundulula iyi mibele ishaiwamina. Yalingile ukutasha sana nasenge na Yehoyada, umwina mwakwe. Ilyo Yehoyashi ali fye ne myeshi, nakulu umubifi aibikile pali bunamfumu no kwipaya bonse bamunyina Yoashi abali no kupyana pa bufumu. Lelo, alifililwe ukwipaya Yohashi umunono, pantu nasenge no mwina mwakwe balimufishile. Bamusambilishe na Malango ya kwa Lesa. Ilyo Yohashi ali ne myaka 7, Yehoyada abomfeshe amaka yakwe aya bushimapepo no kwipaya uyu namfumu wabipa no kubika Yohashi pa bufumu.—2 Imilandu 22:10–23:15.

Yoashi wacaice atekele bwino sana pa bufumu mpaka imfwa ya kwa Yehoyada, lelo pa numa atendeke ukupepa utulubi. Lesa atumine Sekaria, uwali umwana wa kwa Yehoyada, ku kuyasoka Yoashi pa busangu bwakwe. Yoashi atile Sekaria apoolwe amabwe. Mwandini ici cali kubulwa bucishinka ukwa kuponya pa musao ku lupwa akabile ukutasha sana!—2 Imilandu 24:17-21.

Baibolo itila: “Yoashi imfumu taibukishe uluse ulo [wishi wa kwa Sekaria] acitile kuli wene, lelo aipeye umwana wakwe.” Pa kufwa, Sekaria atile: “Yehova amone no kulandula!” Nga fintu Sekaria asosele, Yoashi aishilelwala sana kabili ababomfi bakwe bene e bamwipeye.—2 Imilandu 24:17-25.

Bonse abakonka uku kufunda, tabakabe nga Yoashi, lelo, bakakwata inshita ya ku ntanshi iisuma: “Wileka luse ne cishinka fikutaluke, . . . e fyo ukasango bubile . . . mu menso ya kwa Lesa na ya bantu.”—Amapinda 3:3, 4.