Yehova Alasakamana Abantu Yaweyawe

BUSHE tufwile ukulumbuka nelyo ukuba abaibela pa kuti Lesa aletupenda? Abraham Lincoln, kateka walenga 16 uwa ku United States of America, inshita imo atile: “Shikulu atemwa abantu yaweyawe. E co baafulila no kufula.” Abengi baimona kwati bantu yaweyawe fye, abashacindama. Ukuba umuntu yaweyawe kuti kwamoneka kwati kubo “mupiina kabili uwa pa nshi.” Ne shiwi fye “yaweyawe” lyumfwika kwati lilosha ku “bantu ababulisha fimo ifyo aba pa muulu bakwata,” “aba cabe cabe,” nelyo fye “abasuulwa.” Ni bani mwingatemwa ukuba nabo? Abaituumika, abakaluka, nelyo aba cilumba? Bushe te kuti mutemwepo ukuba na bantu ba bucibusa, abaicefya, abafuuka abalanga ukufuma ku mutima ukuti balitemwa bambi?

Apo ukututumya abantu no kupumya fyaliseeka muno calo pali lelo, bamo cilabakosela ukusumina ukuti Lesa alabasakamana. Kabelenga umo uwa uno magazini alembele ati: “Nakulile mu lupwa umushali sana ukutemwa. Nalisuulilwe, balentumfya no kunseka. E co, naleimona ushacindama ukufuma ku bwaice. Ncili ndayumfwa filya naleyumfwa kale ne ci cinenga ukufuupulwa nga naba no bwafya.” Lelo, kwaliba ifitulenga ukucetekela ukuti Lesa alasakamana abantu yaweyawe.

Ifyo Lesa Asakamana Abantu Yaweyawe

Imfumu Davidi yalembele ati, “Yehova mukulu, kabili awamino kutashiwa apakalamba; ubukulu bwakwe te bwa kupenengamo.” (Amalumbo 145:3) Lelo, ici tacilesha Yehova ukutusakamana mu kutemwa na mu cikuuku. (1 Petro 5:7) Ku ca kumwenako, kemba wa malumbo atile: “Yehova aba mupepi na ku baputuke misana, kabili abafunshike mitima alabapususha.”—Amalumbo 34:18.

Ifyo abantu bangwako sana muno calo, pamo nga ukuyemba, ubusambashi, nelyo ifyuma, te fyo Lesa amona ukucindama. Ifunde lya kwa Lesa ku bena Israele lyalangilile inkumbu shakwe ku bapiina, abana banshiwa, bamukamfwilwa na bambi bambi. Lesa aebele abena Israele, abacushiwepo mu Egupti ati: “Umulebeshi wikamucululusha, nangu kumufyenenkesha; . . . Mukamfwilwa onse, no mwana wa nshiwa, mwikamucusha. Ukucusha nga wamucusha, na o ukulila nga andilila, cine cine nkomfwa ukulilila kwakwe.” (Ukufuma 22:21-24) Kabili, kasesema Esaya alangile ukucetekela kwakwe mu fyo Lesa asakamana abalanda, atile: “Mwabelo mulanda ukwa kushina, mwabelo mubusu ukwa kushina mu kumanama kwakwe, mwabe cubo kuli mukukukule, icintelelwe ku cikabilila, ilyo umwela wa ba kututumya waba nga mukukulule pa cibumba.”—Esaya 25:4

Mu butumikishi bwakwe bonse, Yesu Kristu, uwabe “cipasho cilya cine fye” ica kwa Lesa aishileba ica kumwenako ku basambi bakwe mu kwangwa abantu yaweyawe ukufuma ku mutima. (AbaHebere 1:3) Ilyo amwene amabumba “abalulunkaniwa kabili abapaswa nge mpaanga ishabula kacema,” Yesu “abekatilwe inkumbu.”—Mateo 9:36.

Moneni kabili abantu Yesu asalile ukuba  abatumwa bakwe—abaishibikwe ati “abashasambilila kabili abantu yaweyawe.” (Imilimo 4:13) Ilyo Yesu afwile, abakonshi bakwe batendeke ukulaalika abantu ba misango yonse ku kukutika ku Cebo ca kwa Lesa. Umutumwa Paulo alembele ati: “uushasumina nelyo umuntu yaweyawe” kuti aisa mu cilonganino ca Bwina Kristu no kusumina. (1 Abena Korinti 14:24, 25) Ukucila ukusala fye abo bakumbwa nga kukonka ifipimo fya calo, Lesa asalile, abafuuka, abantu yaweyawe ku kubomba umulimo wakwe. Umutumwa Paulo atile: “Moneni ukwitwa kwenu, mwe bamunyinane, ukuti abengi abaitilwe tabaali aba mano ku buntunse, te bengi aba maka, te bengi bashimucindikwa; lelo Lesa asalile ifya buwelewele fya pano calo, ku kulenga bekatwe nsoni aba mano; kabili Lesa asalile ifyanaka fya pano calo, ku kulenga ifyakosa fikatwe nsoni; kabili Lesa asalile ifinangwa fya pano calo ne fyasuulwa, ifintu ifishabapo, ukuti onaule ifyabapo, ukuti umuntunse nangu umo etakisha ku cinso ca kwa Lesa.”—1 Abena Korinti 1:26-29.

Na lelo line, Lesa asakamana ifwe sana. Ukufwaya kwa kwa Lesa kwa kuti “abantu ba misango yonse bakapusuke no kufika ku kwishiba bwino bwino icine.” (1 Timote 2:4) Nga ca kuti Lesa atemenwe abantunse sana ica kuti atumine Umwana wakwe pe sonde ku kwisatufwila, tatufwile ukuyumfwa ukuti tatwatemwikwa nelyo tatwacindama. (Yohane 3:16) Yesu Kristu alangile abakonshi bakwe ubucindami bwa kucita ifintu kuli bonse na ku wacepesha fye muli bamunyina ba ku mupashi kwati balecitila Yesu wine. Atile: “Apo ponse mwacitile ifi kuli umo uwa aba bamunyinane bacepesha, ninshi mwacitiile ine.” (Mateo 25:40) Te mulandu na fintu icalo citumona, nga twalitemwa icine, twalicindama mu menso ya kwa Lesa.

E fyo Francisco, * kalume umwana wa nshiwa uwa ku Brazil aumfwile pa numa ya kulundulula bucibusa na Lesa. Atila: “Ukwishiba Yehova no kuteyanya kwakwe kwalingafwile ukuleka ukuyumfwa uwapelelwa kabili uwa nsoni. Nasambilile ukuti Yehova alitemwa umo na umo uwa ifwe.” Yehova aishileba umufyashi wa cine cine kuli Francisco.

Ukusakamana Abacaice

Yehova alitemwa sana abacaice bonse capamo e lyo na umo umo. Lelo, kwena, nampo nga tuli bakalamba nelyo abaice, tatufwile ukuituumika. Lelo, napamo twalilamuka muli fimo kabili twaba ne mibele iyo Lesa engabomfya ku ntanshi. Yehova alishiba ukulopololwa no kukanshiwa tukabila pa kuti atubomfye. Ku ca kumwenako, moneni ilyashi lyaba muli 1 Samwele icipandwa 16. Apo bambi abali no kuba pa bufumu mu Israele balemoneka abafikapo sana kuli kasesema Samwele, Yehova alondolwele ico ali no kusalila Davidi, uwali umwaice pa bana ba kwa Yese bonse ukuti akabe mfumu ya Israele ku ntanshi. Atile: “Wilolesha kumoneka kwakwe, nangu  butali bwa ciimo cakwe; pantu nimukaana [umukalamba wa kwa Davidi], pantu Yehova tamona ifyo umuntunse amona; pantu umuntunse amona pa menso, lelo Yehova amona mu mutima.”—1 Samwele 16:7.

Bushe abacaice pali lelo kuti bacetekela ukuti Yehova alibatemwa icine cine? Tontonkanyeni pali Ana, umukashana wa ku Brazil. Nga fintu ciba ku bacaice abengi, alecushiwa ilyo amona ububifi no lufyengo. Lyene bawishi batendeke ukusenda wene na bankashi yakwe ku kulongana kwa Bwina Kristu. Mu kupita kwa nshita, atendeke ukuipakisha ifyo alesambilila pa lwa Cebo ca kwa Lesa. Ana atendeke ukubelenga Baibolo pamo ne mpapulo sha Bwina Kristu e lyo no kupepa kuli Yehova Lesa. Atendeke ukulundulula bucibusa na Lesa panono panono. Alondolola ati: “Naleipakisha ukucofe ncinga no kuya ku lupili lwali mupepi na ku mwesu uko naletamba ukuwa kwa kasuba ukushaiwamina. Nalepepa kuli Yehova no kumutasha pa cikuuku cakwe na bukapekape, no kwesha ukulondolola ifyo namutemwa. Ukwishiba Yehova Lesa no bufwayo bwakwe kwalengele naleka ukusakamikwa kabili naleyumfwa uwa mutelelwe.” Bushe na imwe mulakwatako inshita ya kwetetula pa fyo Yehova amusakamana mu kutemwa?

Ca cine, icikulilo cesu kuti calenga catukosela ukulundulula bucibusa bwa pa mutima na Yehova. Ku ca kumwenako, tontonkanyeni pali Lidia. Ilyo aebeleko bawishi ifya ku mutima ifyalemusakamika sana, bamukalipile fye abati: “Bupumbu ubo.” Nangu line alyumfwikishe ukuti bawishi balefwaya alabeko ku bwafya, Lidia atila: “Ukusambilila Baibolo kwampeele fyonse ifyo nalefwaisha ne fyacilapo. Imibele isuma iya kwa Yehova yalengele aaba cibusa wandi uo natemwisha. Nomba nalikwata Tata uwantemwa, uung’umfwikisha uo ningeba fyonse ifya ku mutima ne fyo ntiina sana. Kuti nalanda no Muntu wacindamisha mu bubumbo pa maawala, no kucetekela nincetekela ukuti alekutika.” Amalembo ya mu Baibolo pamo nga Abena Filipi 4:6, 7 yalimwafwile ukumona ifyo Yehova asakamana mu kutemwa. Palya patila: “Mwisakamikwa nangu kamo, lelo muli fyonse lekeni ifya kulomba fyenu fiishibikwe kuli Lesa mu kupepa no kupaapaata pamo no kutootela; no mutende wa kwa Lesa uwacila amatontonkanyo yonse ukalinda imitima yenu na matontonkanyo yenu muli Kristu Yesu.”

Ukumwafwa Ukusakamana Ukukabila Kwenu

Yehova alasakamana cila mubomfi wakwe pamo ne cilonganino cakwe ica mwi sonde lyonse. Kuti twalanga ukutemwa kwesu kuli Shifwe wa mu muulu pa kulanda na wene. Tatufwile ukwangusha bucibusa bwesu na wene. Davidi alyangilwe bucibusa bwakwe na Yehova lyonse. Atile: “Inshila shenu munenge ukushishiba, mwe Yehova; no mwa kuya mwenu munsambilishe. Munyenseshe mu cishinka cenu, no kunsambilisha; pantu ni mwe Lesa ipusukilo lyandi.”—Amalumbo 25:4, 5.

Kuti caba iceni kuli imwe ukuba na bucibusa bwa pa mutima na Lesa. Kuti mwacetekela ukuti Uwapulamo akamwafwa mu mafya yonse ayo mwingakwata, ukulingana no kufwaya kwakwe. (1 Yohane 5:14, 15) E co, sambilileni ukulumbula mu kulungatika ico mulepepela, ukuibebeta no kumona ifyo mulekabila.

Ubucindami bwa kwishiba ukukabila kwesu  bwalikomailwapo mwi pepo Imfumu Solomone yapepele ilyo yalepeela itempele. Yatile: “Nge cipowe cili mu calo, napamo icikuko, nga mwabo kukunkutana kwa mabuula napamo kufufuma, makanta napamo amapantankolo, nga balwani babo babafyantika pali imo iya mu mpongolo shabo, nga pabo musango onse wa mpumo no bulwele—ukupepa konse, ukupaapaata konse ukukaba ku muntu onse uwa ku bantu benu bonse abena Israele, abaishiba umuntu no muntu impumo yakwe no kukalipwa kwakwe, . . . lyene imwe muumfwe mu muulu, . . . mulekelele, no kupeela ku muntu no muntu umwabele mibele yakwe yonse.” (2 Imilandu 6:28-30) Cine cine, mwe bene ni mwe ‘mwaishiba impumo no kukalipwa kwenu.’ Fintu cacindama kanshi ukwishiba ifyo mukabila ne fyo mufwaisha. Nga mwacite co, ‘Yehova akamupeele fifwayo mutima wenu.’—Amalumbo 37:4.

Kosheni Bucibusa Bwenu na Yehova

Yehova alafwaya abantu yaweyawe ukuipakisha bucibusa bwa pa mutima na wene. Icebo cakwe citweba ati: “Nkaba Shinwe, na imwe mukaba abana bandi abaume na bana bandi abanakashi, e fyo asosa Yehova Wa maka yonse.” (2 Abena Korinti 6:18) Ca cine, Yehova no Mwana wakwe bafwaya twatunguluka no kukwata umweo wa muyayaya. Fintu tukoseleshiwa ukwishiba ukuti Yehova akatwafwa ilyo tulebomba imilimo yesu mu lupwa, pa ncito na mu cilonganino ca Bwina Kristu!

Na lyo line, bonse tulakwata amafya mu nshita shayafya. Ukulwalilila, amafya mu lupwa, ukucepelwa indalama, nelyo fimbi fye kuti fyatuletela ubukali. Te kuti twishibe ifya kucita ilyo twaeshiwa. Amafya yalefulilako, yaletwa mu kulungatika nelyo mu nshila shimbi na kashinina umubifi, Satana Kaseebanya, uulwa inkondo ya ku mupashi na bantu ba kwa Lesa. Lelo, kuli uutumfwikisha no kutwafwa ukubakilila bucibusa busuma na Yehova. Uyu ni Yesu Kristu uwaba mu cifulo cakwe icasansuka mu muulu. Tubelenga ukuti: “Tatuli na shimapepo mukalamba, uushingalangulukilako ifya kunakuka fyesu, lelo uwaeshiwa muli fyonse nga ifwe, lelo uushaba na lubembu. E ico, tupalamine ukwabulo mwenso ku cipuna ca bufumu ica cikuuku ca bupe fye, ku kuleka tupokelele uluse no kusange cikuuku ca bupe fye ukuti twafwiwe pa nshita yalinga.”—AbaHebere 4:15, 16.

Fintu tukoshiwa ukwishiba ukuti tatukabila kulumbuka nelyo ukuba ne fyuma pa kuti Lesa atusenamine! Nangu muli no bulanda, beni nga kemba wa malumbo uwapepele ati: “Ndi mulanda kabili uwa kukabila; Shikulu alantontonkanya. Uwa kunjafwa kabili uwa kumpokolola ni mwe.” (Amalumbo 31:9-14; 40:17) Cetekeleni ukuti Yehova alitemwa abaicefya, abantu yaweyawe. Cine cine, ‘kuti twapoosa amasakamika yesu yonse pali wene pantu asakamana ifwe.’—1 Petro 5:7.

[Futunoti]

[Ifikope pe bula 29]

Abengi pa bakonshi ba kwa Yesu bali abashasambilila kabili abantu yaweyawe

[Icikope pe bula 30]

Abena Kristu balabombesha ukuba ne citetekelo cakosa

[Ifikope pe bula 31]

Tatukabila ukulumbuka pa kuti Lesa atusenamine