Babombela Bamunyinabo ba Bwina Kristu Aba mu Fyalo Fimbi

BUSHE mwalibala amuumfwako amashiwi ya kuti “ababomfi ba ku fyalo fimbi” nangu “aba kuitemenwa aba ku fyalo fimbi”? Inte sha kwa Yehova ababa muli aya mabumba balaitemenwa ukubomfya inshita yabo no kulamuka kwabo ku kwafwa ukukuula umwa kupulintila kabili umwa kwananishisha ubukombe bwa Bufumu ubwa mu Baibolo. Balafwilisha no kukuula ifikuulwa fya Kulonganinamo na Mayanda ya Bufumu, umo basambilila Baibolo. Pali ino nshita, balekuula mu fyalo 34, sana sana mu fyalo ifipiina. Mafya nshi kabili mapaalo nshi basanga ilyo balebombela bamunyinabo ba Bwina Kristu aba mu fyalo fimbi? Bamona shani “umulimo washila” babomba? (Ukusokolola 7:9, 15) Pa kuti twishibe natuumfwe ku babombeele mu Mexico.

Ababomfi ukufuma ku fyalo fimbi aba kubalilapo ukwisa ku Mexico bafikile mu May 1992. Batile bashifika fye baswangana no kuswangana ukukushako ifikuulwa fya pa maofeshi ayangalila umulimo wa Nte sha kwa Yehova mu Mexico. Kwali ukukuula ifikuulwa ifipya 14, apali umwa kusendama ababombela pali aya maofeshi, umwa kupulintila, na maofeshi.

Pa kwafwa muli ubu bukuule, ababomfi ukucila pali 730 ukufuma ku Canada, Great Britain, United States, ne fyalo fimbi babombele pamo na babomfi abengi nga nshi abafumine mu ncende shonse isha Mexico. Kabili, Inte ukucila pali 28,000 ababa mu filonganino mupepi na 1,600 ifyabela mupepi na maofeshi balibombeleko pa mpela ya milungu. Bonse babombele no mutima wa kuitemenwa kabili babomfeshe ukulamuka kwabo ukwabula ukulipilwa. Bamwene ukuti lishuko nga nshi ukubombela Yehova muli yi nshila. Mu nshita yonse iya bukuule, baleibukisha amashiwi yapuutwamo aya pa Amalumbo 127:1 ayatila: “Nga Yehova takuulile ng’anda, ninshi abakuulako bacucutika apa fye.”

Amafya Basanga

Mafya nshi ababomfi ba ku fyalo fimbi basanga ilyo balebombela mu fyalo batumwa? Kutikeni ku fyo bamo balandapo.  Curtis na Sally, abaupana abafumine ku United States, balikuulako mu Germany, India, Mexico, Paraguay, Romania, Russia, Senegal, na mu Zambia. Curtis atila: “Ubwafya bwa kubalilapo fye bwali kusha umwana wesu umwanakashi, uwali painiya, no kushe cilonganino cesu mu Minnesota. Ine no mukashi wandi twali muli ci cilonganino pa myaka 24, kabili twalibeleshe bwino.”

Sally atila: “Ukwikala uko ushabelesha bwafya icine cine, ukucilisha ku mwanakashi, lelo nasambilile ukuti kuti wabelesha. Nasukile naleka no kutiina utushishi.” Alundapo ati: “Mu calo cimo, fwe babomfi baali 10 twaleikala mu ng’anda imo umushali kicini kabili yakwete fye fimbusu fibili. Kulya e ko nasambilile ukutekanya sana.”

Ubwafya bumbi ubukabila ukubombesha no kuicefya kusambilila ululimi lumbi. Sharon, uwakuulileko pamo no mulume wakwe mu fyalo ifingi, atila: “Ukukanaishiba ululimi lulandwa mu calo mulebombela bwafya ubwine bwine. Pa kubala, cilafya ukupalama ku ba bwananyina nga ulefilwa ukulanda ifyo ulefwaya. Ici cilakalifya. Lelo aba bwananyina tusanga muli fi fyalo balatutekanishisha kabili bafwaisha ukutwafwa. Tapakokola sana, tulatendeka ukulanshanya.”

Ubukose Bulakabilwa pa Kushimikila

Nangu ca kutila aba babomfi balabombesha mu makuule, balishiba ukuti ukushimikila imbila nsuma iya Bufumu bwa kwa Lesa e cacindamisha. E ico, balabombela pamo umulimo wa kushimikila ne filonganino umo balongana. Åke na Ing-Mari, abaupana abakuulileko ku Guadeloupe, Malawi, Mexico, na ku Nigeria, na bo batile ubukose bulakabilwa pa kulanda ululimi lumbi ilyo muleshimikila mu calo cimbi.

 Ing-Mari atila: “Pa kubala imibombele yesu yali fye iyawayawaya, pantu lyonse twaleya na baNte ba muli fi fyalo kabili pa mulandu wa kutiino kuseebana ilingi twaleleka e balanda. Lelo, bushiku bumo ulucelo twaile tulashimikila fweka. Twali no mwenso sana. Twasangile umukashana uwakutike ku fyebo napekenye. Nabelengele ilembo limo no kushalika impapulo. E lyo umukashana atile: ‘Kanjipusheko. Nalikwata lupwa uusambilila Baibolo ne Nte sha kwa Yehova. Kuti nacita shani pa kuti na ine ndesambilila?’ Nshaishibe ica kusosa. Lyene nalishipile no kumulanga ifya kusambilila Baibolo.”

Ing-Mari alundapo ati: “Ala nalisekelele no kutasha Yehova pa kupaala ukubombesha no kufwaisha kwesu ukwa kwebako bambi icine.” Uyu mukashana alilundulwike kabili abatishiwe pe bungano lya citungu mu Musumba wa Mexico. Åke na Ing-Mari basupawila ifyo bamona ubutumikishi abati: “Kwena twalikatamika sana umulimo wesu mu makuule yalekanalekana, lelo takuli icacila insansa no kuumfwa bwino ukwisako pa mulandu wa kwafwa umuntu ukusambilila icine.”

Ukuipusula

Ca cine ukuti ababomfi abasha indupwa ne fibusa balaipusula ifingi pa kuti babombele bamunyinabo mu fyalo fimbi, lelo na bo balasanga insansa ishingi. Ni nsansa nshi?

Howard, uwabombela pamo no mukashi wakwe, Pamela, mu Angola, Colombia, Ecuador, El Salvador, Guyana, Mexico, na mu Puerto Rico atila: “Lishuko nga nshi ukwishiba aba bwananyina aba mu fyalo fimbi no kuimwena ukutemwa ukwaba mu ba bwananyina ba mwi sonde lyonse. Ilingi tuumfwa fye, lelo ilyo mwaikala no kubomba na bambi abafuma mu fyalo fimbi, e lyo mwingacilamo ukucindamika ubwananyina bwesu.”

Gary, uwakuulako mu Colombia, Costa Rica, Ecuador, Mexico, na muno Zambia, na o asoso kuti uyu mulimo walimwafwa sana. Atila: “Ukukanshiwa uko nakanshiwa pa myaka pa kubombela pamo na ba bwananyina bakosoka abasangwa mu maofeshi ya mu fyalo natuminweko kwalingafwa ukuipangasha bwino ku mafya ya mu mulimo wandi. Uyu mulimo walikosha icitetekelo candi pantu mwaba ishuko lya kumona ifyo ukuteyanya kwa kwa Yehova kwaikatana isonde lyonse, te mulandu no lulimi, umushobo, nelyo icalo.”

Pali nomba, ubukuule mu Mexico nabupwa, kabili ifikuulwa fyakuulilwe fyapeelwe uno wine mwaka. Ababomfi ba ku fyalo fimbi abacincishiwa no kutemwa Lesa balilengako ukuti ukupepa kwa cine mu Mexico na mu fyalo fimbi kuye pa ntanshi. Inte sha kwa Yehova mwi sonde fye lyonse balatasha nga nshi ukuitemenwa no kuipeelesha kwa babomfi ba ku fyalo fimbi ukwa kufwaya ukubombela bamunyinabo ba Bwina Kristu.

[Icikope pe bula 25]

Ecuador

[Icikope pe bula 25]

Colombia

[Icikope pe bula 25]

Angola

[Icikope pe bula 26]

Ulubansa lwayemba pa maofeshi ya Nte

[Icikope pe bula 26]

Ubukuule bwatendeka pa maofeshi ya mu Mexico

[Icikope pe bula 26]

Pe samba: Bamo ababombele mu Dipartimenti wa Bukuule beminine pa ntanshi ya fikuulwa fipya

[Icikope pe bula 27]

Ababomfi bafuma ku fyalo fimbi balabombela pamo umulimo wa kushimikila na ba mu filonganino balonganako