Ifipusho Ukufuma ku Babelenga

Bushe Umwina Kristu nga aumfwa amashiwi ukufuma uko ashishibe, ninshi epela nasanswa ku fibanda mwa?

Iyo. Nangu ifibanda fyashimikwa ukwishila muli iyo nshila, abantu abengi abomfwa amashiwi nelyo ukubipilwa kumbi kumbi, pa numa ya kufwailisha basanga ukuti balwele fye.

Na mu nshiku sha kwa Yesu, cimoneka kwati calishibikwe ukuti ukusanswa ku fibanda no kulwala e fyalelenga kwaba ifyakucitika fyapala fi limo limo. Pali Mateo 17:14-18, tubelengapo ulwa kwa kalume waundepwe na Yesu. Nelyo ca kuti kalume aali ne fishibilo fya kulwala ukufunta kwabipa, ukucula alecula kwalengelwe ne cibanda. Nangu cibe fyo, pa nshita yafumineko ilyo amabumba ya balecula baletelwe kuli Yesu pa kuti abondape, bamo abasanshiwemo bantu “bali ne fibanda na balefunta.” (Mateo 4:24) Cimoneka kwati, calishibikwe ukuti abalefunta bamo tabali na fibanda. Balelwala fye.

Cashimikwa ukuti abacula ku bulwele bwa schizophrenia, e kuti ubulwele bulenga umuntu ukukanaishiba icilecitika, ubo ilingi line bwingaposhiwa ku muti wa ku cipatala, balomfwa amashiwi nelyo fimo ifingabalenga balaumfwa kwati balwala umutima. * Amalwele yambi kuti pambi yalenga ukufulungana uko bamo mu kuluba bengatila fibanda filelenga. E ico, nangu umuntu aleshimika ukuumfwa amashiwi yalemusosha nelyo fimbi ifingalamupumfyanya teti pambi afwaye ukukaninina fye ati te fibanda filemulolosha, mufwile mwamukoselesha ukufwailisha nampo nga kuliko icili conse icilelenga ifyo alepitamo.

[Futunoti]