Icalembwa Cawama Nga Nshi Ukubelenga

ABALENGULA impanga baRichard E. Byrd batandalile Antarctic imiku isano ukutula mu 1928 ukufika mu 1956. Apo balilungike ukulembe fyebo muli notibuuku pa fyalecitika, baByrd na bo bali nabo bali na maka ya kwishiba inshita kwaleba ifikuuku, ukulenga ama mapu, no kunonka ifyebo fyafulilako pa lwa calo ca Antarctica.

Inyendo sha baByrd shilangilila ubucindami bwa kusunga ifyebo fyalembwa. Tonse utwacitike pa lwendo lwa pali bemba nelyo mu ndeke kuti twalembwa muli notibuuku. Inshita imbi ifi fyebo kuti fyabomfiwa ukupituluka mu fyacitike nelyo ukubebeta ifyebo fingaba ifya mulimo ku nyendo sha ku ntanshi.

Amalembo yaba ne fyalembwa ifyawamisha nga nshi ukubelenga pa Lyeshi lya mu nshiku sha kwa Noa. Lilya Lyeshi lya calo conse lyatwalilile ukucila pa mwaka umo. Pa kuipekanisha ku Lyeshi, Noa, umukashi wakwe, na bana babo batatu na bakashi babo bapoosele imyaka 50 nelyo 60 ukukuula icibwato—icikulu ica kuti calepele bamita mupepi na 133.5 na bamita 22.3 mu bufumo e lyo na bamita 13.4 mu butali. Bushe cali na bufwayo nshi? Ni ku kubakilila abantunse bamo ne finama fimo ukupusuka Ilyeshi.—Ukutendeka 7:1-3.

Kuti twatila, ibuuku lya mu Baibolo ilya Ukutendeka lyakwatamo ifyo Noa alembele pa fyacitike ukufuma pa kutendeka kwa Lyeshi ukufika ne lyo Noa no lupwa lwakwe bafumine mu cibwato. Bushe mwaba fimo ifingaba no bucindami kuli ifwe lelo?