“Palameni Kuli Lesa, Na o Alapalama Kuli Imwe”

Pa Ntanshi na pa Numa—Kale Imibele Yalibipile, ku Ntanshi Yaisawama

“ICEBO ca kwa Lesa ca mweo kabili ca maka kabili calitwa ukucila ulupanga ulwatwila kubili kubili . . . kabili kuti calingulula amatontonkanyo na mapange ya mutima.” (AbaHebere 4:12) Ifi e fyo umutumwa Paulo alondolwele ifyo icebo ca kwa Lesa catwa. Amaka icebo ca kwa Lesa cakwata aya kufika pa mutima yalimoneke nga nshi mu mwanda wa myaka uwa kubalilapo C.E. Te mulandu no kusonga kwabipa pali ilya nshita, balya basangwike Abena Kristu bafwele ubuntu bupya.—Abena Roma 1:28, 29; Abena Kolose 3:8-10.

Amaka icebo ca kwa Lesa cakwata, aya kwalula imibele ya bantu, yalamoneka na lelo line. Ku ca kumwenako, moneni icacitike kuli ba Richard, abatali kabili abakosa. Apo balekalipa bwangu, ba Richard baleimya ulubuli nga bakalifiwako fye panono. Ubumi bwabo bwalibipile sana ku mulandu wa lukaakala. Ba Richard kabili baingile mwi bumba lya bakapoosa wa nkonya. Balikanshiwe sana kabili baishileba bakalapashi wa nkonya mu Westphalia, mu Germany. Ba Richard balenwa sana ubwalwa kabili ilingi line balelwa imbuli sha pa cintubwingi. Mu lubuli lumo, umuntu alipaiwe, kabili kwashele fye panono ba Richard nga balipooselwe mu cifungo.

Bushe icupo ca ba Richard cali shani? Ba Richard bebukisha ukuti “ilyo Heike na ine tushilasambilila Baibolo, twalecita fye cila muntu ico alefwaya. Heike alepoosa inshita iikalamba na banankwe, ilyo naleipakisha ifyangalo natemenwe—maka maka inkonya, ubwangalo bwa pa menshi, no kuipoosa pa menshi.”

Ilyo ba Richard na ba Heike batendeke ukusambilila Baibolo ne Nte sha kwa Yehova, ba Richard bamwene ukuti te kuti bakumanishe ukwalule mibele no kucita filya fyalembwa mu Cebo ca kwa Lesa. Lelo, ilyo baishibe Yehova Lesa bwino, ba Richard balundulwile ukufwaisha kwabo pa kuti bengamutemuna. Ba Richard bakutulwike ukuti Lesa tasenamina abatemwa ulukaakala nelyo abalucita ku kuisekesha. Ba Richard basambilile ukuti, “[Yehova] apato mubifi no watemwo lufyengo.”—Amalumbo 11:5.

Isubilo lya kwikala umuyayaya muli paradaise wa pe sonde na lyo lyacebwishe ba Richard na ba Heike. Bonse balefwaya ukuba pamo muli paradaise! (Esaya 65:21-23) Ubwite bwa kuti, “palameni kuli Lesa, na o akapalama kuli imwe” bwafikile nga nshi pa mutima wa ba Richard. (Yakobo 4:8) Bamwene ubucindami bwa kuumfwila uku kufunda kwapuutwamo ukwa kuti: “Wifinuka muntu wa lufyengo, kabili wisalapo imibele yakwe yonse; pantu uwapotama wa muselu kuli Yehova, lelo ku batambalala e kwabe senge lyakwe.”—Amapinda 3:31, 32.

Nangu line ba Richard balefwaisha ukwalula imibele yabo, bailwike ukuti te ku maka yabo bengacita ico. Bakutulwike ukuti calicindama ukufwaya ubwafwilisho bwa kwa Lesa ukupitila mwi pepo. E co bacitile umwabela amashiwi ya kwa Yesu ku batumwa Bakwe, ayatila: “Akupepeni, pa kuti mwi-ingila mu matunko. Umutima wena ulefwaisha, lelo umubili naunaka.”—Mateo 26:41.

Pa numa ya kusambilila ifyo Lesa amona ulukaakala ne cipyu, ba Richard tabatwishike ukuti inkonya cali cangalo cabipa. Ukwaafwa kwa kwa  Yehova no kukoselesha kwa balebasambilisha Baibolo, kwalengele ba Richard ukuleka ulukaakala. Balekele inkonya ne mbuli sha pa cintubwingi kabili bapingwilepo ukuwamya imikalile ya lupwa lwabo. Ba Richard, bakangalila ba mutembo mu cilonganino ca Nte sha kwa Yehova, batila: “Ukusambilila icine ca mu Baibolo kwalingafwa ukutontonkanya ilyo nshilacite cintu.” Balundapo ukuti: “Nomba ng’umfwila icishinte ca kutemwa no mucinshi ilyo ndi pamo no mukashi wandi na bana. Ici calenga ulupwa lwandi ukulaumfwana.”

Abashakwata ifishinka pa Nte sha kwa Yehova mu nshita mu nshita balipeela Inte sha kwa Yehova umulandu wa konaula indupwa. Lelo, ifya kumwenako fimo pamo nga ici ica ba Richard cishinina ukuti ifyo balanda bufi. Icishinka cili ca kuti icine ca mu Baibolo cilenga umutende pa ng’anda ne mibele yabipile kale ukuwama ku ntanshi.—Yeremia 29:11.

[Amashiwi pe bula 9]

“Isubilo lya kuba mu paradaise wa pe sonde lyancincishe ukwaluka”

[Akabokoshi pe bula 9]

Ifishinte fya mu Baibolo Filabomba

Baibolo kuti yakwata sana amaka mu mikalile ya bantu. Pano pali ifishinte fya mu Malembo fimo ifyayafwa abantu bali aba lukakaala ukwaluka:

“Awama uukokolo kukalipa ukucile mpalume, no uteko mutima awama ukucilo wacililo musumba.” (Amapinda 16:32) Uwafilwa ukulama icipyu ninshi alinaka, takosa.

“Ukushilimuka kwa muntu kumukokosho kukalipa.” (Amapinda 19:11) Ukuba uwashilimuka kabili uwiluka pa cintu kula-afwa umuntu ukumfwikisha imilandu ilekansaninwapo kabili kuti kwacincintila umuntu ukukanapuuka mu cipyu.

‘Wiba bunankwe kuli cibinda wa bukali epali wasambilile mibele yakwe.’ (Amapinda 22:24, 25) Abena Kristu mano mano balataluka kuli balya abakalipa bwangu.