Twalilileni Ukuba Abashangila, no Kucimfya Ulubilo lwa ku Bumi

NGA mwali no kwabuka bemba wa mabimbi, bwato bwa musango nshi mwingafwaya? Bushe kuti mwasala ubwato bunono ubushakosa nelyo ishitima lya pa menshi ilyapangwa bwino? Ukwabula no kutwishika kuti mwasala ishitima, pantu kuti mwayabuka bwino pali ulya bemba ali na mabimbi yabipisha.

Ilyo tuli muli buno bwikashi bwayafya nga nshi, tuponenwa na mafya ya kutiinya. Ku ca kumwenako, inshita shimo abacaice kuti bayumfwa abapelenganishiwa kabili abashacingililwa muli cino calo caisulamo amano ya kufulunganya ne misango. Abantu ababele Abena Kristu nomba line nalimo bacili baleyumfwa ukuti tabali abashangila. Nangu fye ni bamo abashangila ababombela Lesa mu busumino imyaka iingi nalimo bale-eshiwa pantu ifyo baleenekela tafilacitika.

Kwena te nomba abantu batendeka ukumfwe fi. Ababomfi ba cishinka aba kwa Yehova, pamo nga Mose, Yobo, na Davidi, limo na bo balesakamikwa. (Impendwa 11:14, 15; Yobo 3:1-4; Amalumbo 55:4) Lelo, mu mikalile yabo bali abashangila ku kuipeela kuli Yehova. Ica kumwenako cabo icisuma cikoselesha na ifwe ukuba abashangila, lelo Satana Kaseebanya afwaya ukutufumya mu lubilo lwesu ulwa ku bumi bwa muyayaya. (Luka 22:31) E ico bushe kuti twatwalilila shani abashangila, “abakosa ndi mu citetekelo”? (1 Petro 5:9) Kabili kuti twakosha shani abasumina banensu?

Yehova Afwaya Twashangila

Nga tuli aba cishinka kuli Yehova, lyonse akatwaafwa ukuba abashangila. Kemba wa malumbo Davidi ali na mafya ayengi, lelo acetekele Lesa, kabili e co aimbile ati: “[Yehova] alininike amfumishe mu cilindi ca malwa, mu matipa ya lutikiti; atekele na makasa yandi pa cilibwe icasumbuka, apampamike intampwilo shandi.”—Amalumbo 40:2.

Yehova alatukosha ukupilikita “ukupilikita kusuma ukwa citetekelo” pa kuti ‘twikatishe ku bumi bwa muyayaya.’ (1 Timote 6:12) Alatupeela ne fya kutwaafwa ukuba abashangila no kucimfya mu bulwi bwesu ubwa ku mupashi. Umutumwa Paulo acincishe Abena Kristu banankwe ‘ukukosa muli Shikulu na mu maka ya bukose bwakwe,’ no ‘kufwala ifya bulwi fyakumanina ifya kwa Lesa ukuti babe na maka ya kwiminina ndi ku kulwisha imicenjelo ya kwa Kaseebanya.’ (Abena Efese 6:10-17) Lelo finshi fingalenga twaba abasakamikwa? Kabili kuti twaicingilila shani ku filenga twalatelententa?

Cenjeleni ku Filenga Ukutelententa

Calicindama ukwibukisha icishinka cikalamba, icitila: Ifyo tupingula ukucita kuti fyalenga fwe Bena Kristu ukuba abashangila nelyo abatelententa. Abacaice bafwile ukupingula pa  fintu pamo nga incito bakalabomba, ukulundako amasambililo yabo, e lyo no kuupa nelyo ukuupwa. Abakalamba kuti bakabila ukupingula nampo nga bakakukila ku ncende imbi nelyo nga bakafwaya incito na imbi. Cila bushiku tulapingula pa fyo twalabomfya inshita kabili tulapingula na pa fintu fimbi. Cinshi cikatwaafwa ukupingula bwino ica kuti twacilanapo ukuba ababomfi ba kwa Lesa abashangila? Umwina Kristu umo umukokole atile: “Nomba Yehova pa kuti angafwe ilyo ndepingula pa fintu. Nalisumina ukuti calicindama ukupokelela ukufunda no kukonka kwene, nampo ngo ko kufunda kwapelelwa muli Baibolo, pa kulongana kwa Bwina Kristu, muli baeluda, na mu mpapulo shilanda pali Baibolo.”

Ilyo tulepingula pali fimo, tufwile ukuipusha aya mepusho: ‘Nga papita imyaka 5 nelyo 10 ukufuma lelo, bushe nkalasekelela pali ifi napingula, nelyo nkalalanguluka? Bushe ndashininkisha ukuti ifyo mpingulapo tafyakalenge natelententa lwa ku mupashi lelo fikanenga ukulunduluka?’—Abena Filipi 3:16.

Ukunakila ku matunko nelyo ukuba mupepi no kutoba amafunde ya kwa Lesa kwalenga abantu bamo ababatishiwa ukukanaba abashangila. Bamo abatamfiwa mu cilonganino pa mulandu wa kucita ulubembu ukwabula ukulapila balibombesha no kubweshiwa, lelo tapakokola balatamfiwa na kabili pa mulandu wa lubembu lumo lwine. Bushe icilenga nalimo kukanapepela ukwafwa kwa kwa Lesa pa kuti ‘bapatishe icabipa no kulambatila ku cisuma’? (Abena Roma 12:9; Amalumbo 97:10) Bonse tufwile ‘ukulungamika inshila sha kwendamo amakasa yesu.’ (AbaHebere 12:13) E ico natulande pa fishinka fimo ifingatwaafwa ukuba abashangila lwa ku mupashi.

Twalilileni Ukuba Abashangila Ukupitila mu Kubomba Umulimo wa Bwina Kristu

Cimo ico tufwile ukucita pa kutwalilila abashangila mu lubilo lwesu ulwa ku bumi kubombesha mu mulimo wa kushimikila pa Bufumu. Cine cine, ubutumikishi bwesu ubwa Bwina Kristu bulatwaafwa nga nshi ukubika imitima ne mintontonkanya yesu pa kucita ukufwaya kwa kwa Lesa na pa cilambu ca mweo wa muyayaya. Ukukuma kuli ici, Paulo akoseleshe abena Korinti ukuti: “Mwe bamunyinane abatemwikwa, beni abashangila, abashitelententa, abacincila pe mu mulimo wa kwa Shikulu, pa kwishibo kuti ukucucutika kwenu te kwa fye muli Shikulu.” (1 Abena Korinti 15:58) “Ukushangila” e kuti ‘ukushikatala.’ Ukuba “abashitelententa” kulosha ku kwiminina ndi. E ico, ukupamfiwa mu butumikishi bwesu kuti kwatwaafwa ukuba Abena Kristu bashangila. Ukwaafwa abantu ukwishiba Yehova kutulenga ukwishiba ukuti twalicindama kabili kutuletela insansa.—Imilimo 20:35.

Pauline, Umwina Kristu uwabomba bumishonari no mulimo wa nshita yonse umbi uwa kushimikila imyaka ukucila pali 30, atile: “Ubutumikishi bucingo pantu ukushimikila bambi kunenga ukushininkisha ukuti nalisanga icine.” Uku kushininwa kulasangwa na lintu tulecitako na fimbi ifya Bwina Kristu, pamo ngo kusangwa ku kulongana ku kupepa no kusambilila no mukoosha pa lwesu.

Ukutemwa kwa ba Bwananyina Kulaafwa Ukuba Uwashangila

Ukuba mu kuteyanya kwa mwi sonde lyonse ukwa bakapepa ba cine kuti kwatwaafwa nga nshi ukuba abashangila. Ala lipaalo nga nshi ukubishanya na ba bwananyina ba mwi sonde lyonse aba kutemwa! (1 Petro 2:17) Kabili na ifwe kuti twaafwa abasumina banensu ukuba abashangila.

Moneni ukwaafwa kusuma ukwa muntu watambalala Yobo. Nangu fye ni kasansamusha wa bufi Elifasi asumine ukuti: “Ukulanda kobe kwatungililo watalansuka, na makufi ayatetema ulayalengo kutalila.” (Yobo 4:4) Bushe na ifwe tulaafwa bambi? Ifwe umo umo twalikwata umulimo wa kwaafwa bamunyinefwe na bankashi ba ku mupashi ukushipikisha mu mulimo wa kwa Lesa. Ilyo tuli na bo, kuti twacita umwabela amashiwi yatila: “Kosheni amaboko ayatompoka, lengeni na makufi ayatetema ukutalila.” (Esaya 35:3) E ico kuti twabika ubuyo  bwa kukosha no kukoselesha Umwina Kristu umo nelyo babili inshita yonse twakumana na bo. (AbaHebere 10:24, 25) Amashiwi ya kukoselesha aya kutasha pa fyo babombesha ku kutemuna Yehova kuti yabaafwa sana ukuba abashangila no kuba ne subilo lya kucimfya ulubilo lwa ku bumi.

Baeluda ba Bwina Kristu kuti bayafwilisha nga nshi pa kukoselesha abapya. Kuti bacite ifi pa kubapeela imitubululo isuma no kubapanda amano ukubomfya Amalembo e lyo no kubomba na bo mu butumikishi. Umutumwa Paulo lyonse aleshukila inshita ya kukoselesha bambi. Alefuluka ukumona Abena Kristu ba mu Roma pa kuti abakoshe lwa ku mupashi. (Abena Roma 1:11) Alemona bamunyina na bankashi aba ku Filipi ngo ‘kusekelela kwakwe kabili icilongwe’ kabili abakonkomeshe ‘ukwiminina ndi muli Shikulu.’ (Abena Filipi 4:1) Ilyo aumfwile amafya ya bamunyina mu Tesalonika, Paulo atumine Timote ku ‘kubekasha no kubakoselesha, ukuti nangu umo etelentenshiwa ku fya bucushi.’—1 Abena Tesalonika 3:1-3.

Umutumwa Paulo no mutumwa Petro balimwene ukuti bakapepa banabo balebombesha kabili balebatasha. (Abena Kolose 2:5; 1 Abena Tesalonika 3:7, 8; 2 Petro 1:12) Kanshi na ifwe, twilatontomesha pa bunake bwa bamunyinefwe, lelo tutontomeshe pa mibele yabo iisuma ne fyo babomba bwino ukutwalilila abashangila no kucindika Yehova.

Nga tulanda ifibi pa bantu nelyo ukubalengulula, nalimo kuti twalenga cayafya kuli bamo ukuba abashangila mu citetekelo. Calicindama ukwibukisha ukuti bamunyinefwe baba “abalulunkaniwa kabili abapaswa” muli buno bwikashi! (Mateo 9:36) Mu cilonganino ca Bwina Kristu, benekela ukusangamo icisansamushi no kupembesulwa. Kanshi ifwe bonse natubombeshe apo twingapesha ukukosha abasumina banensu no kubaafwa ukuba abashangila.

Bamo nalimo kuti bacita ifingatulenga ukutelententa. Bushe tukaleka amashiwi yabipa nelyo imicitile ishawama ukututompola mu mulimo wa kwa Yehova? Shi twikaleka nangu umo ukutulenga ukufilwa ukushangila!—2 Petro 3:17.

Amalayo ya kwa Lesa Yatulenga Ukushangila

Ubulayo bwa kwa Yehova ubwa kuti ku ntanshi ifintu fikawama ilyo Ubufumu bukalateka butupeela isubilo ilitwaafwa ukuba abashangila. (AbaHebere 6:19) Kabili ukushininwa ukuti Lesa lyonse alafishapo amalayo yakwe kutulenga ukuba ‘abalola no kwiminina ndi mu citetekelo.’ (1 Abena Korinti 16:13; AbaHebere 3:6) Icitetekelo cesu kuti caeshiwa nga ca kuti amalayo ya kwa Lesa yalemoneka kwati yalekokola ukufishiwapo. E ico calicindama nga nshi ukuti tuibake ku kulufiwa ku fisambilisho fya bufi na ku kufutatukako kwi subilo lyesu.—Abena Kolose 1:23; AbaHebere 13:9.

Ica kumwenako cabipa ica bena Israele abafwile pa mulandu wa kuti tabacetekele amalayo ya kwa Yehova cifwile ukuba ica kutusoka. (Amalumbo 78:37) Ukucila ukubapashanya, shi natube abashangila, ukubombela Lesa ukwabula ukushingashinga muli shino nshiku  sha kulekelesha. Eluda umo umukokole atile: “Cila bushiku njikala kwati ubushiku bwa kwa Yehova bukesa mailo.”—Yoele 1:15.

Cine cine, ubushiku bukalamba ubwa kwa Yehova nabupalama. Lelo, tatufwile kutiina cikulu fye natupalama kuli Lesa. Nga ca kuti twanakila ifipimo fyakwe ifyalungama no kuba abashangila, kuti twacimfya ulubilo lwa ku bumi bwa muyayaya!—Amapinda 11:19; 1 Timote 6:12, 17-19.

[Icikope pe bula 23]

Bushe mulebombesha apo mwingapesha ukwaafwa Abena Kristu banenu ukuba abashangila?

[Abatusuminishe Ukubomfya Icikope pe bula 21]

The Complete Encyclopedia of Illustration/J. G. Heck