Ifipusho Ukufuma ku Babelenga

Bushe cibi ukwipaya icitekwa icilwalishe nelyo icikotele?

Abantu abengi balitemwe nama shalekanalekana. Ifitekwa fimo fisanguka ifibusa fisuma. Ku ca kumwenako, imbwa shaishibikwa ukuti shilomfwila no kutemwa shikulu wa shiko. Kanshi kuti twaumfwikisha umulandu abantu batemenwa ifitekwa, sana sana ifyo baikala na fyo pa myaka.

Lelo, ifitekwa ifingi tafikala imyaka iingi. Imbwa na tupushi kuti fyaikala imyaka 10 ukufika ku myaka 15 nelyo ukucilapo ukulingana no musango wa fiko. Ilyo fyakota, ifi fitekwa kuti fyalalwalilila no kufilwa ukucita ifyo fyalecita ilyo fyali na maka, ici kuti casakamika abalefiteka. Bushe kuti cabipa ukwipaya ifi fitekwa?

Umwina Kristu kuti afwaya ukusunga inama ukulingana no kufwaya kwa kwa Lesa. Ukucusha inama kupusana no kufwaya kwa kwa Lesa, pantu Icebo cakwe citila: “Umulungami asakamano mweo wa citekwa cakwe.” (Amapinda 12:10) Lelo, Lesa tamona inama mu musango umo wine amwenamo abantu. Ilyo Lesa alengele abantu, alangile ukuti paliba ubupusano ubukalamba pa bantu ne nama. Ku ca kumwenako, apeele abantunse isubilo lya mweo wa muyayaya, lelo tapeele ili subilo ku nama. (Abana Roma 6:23; 2 Petro 2:12) Apo e Kabumba, e wakwata amaka ya kupeela abantunse icifulo cabalinga pa nama.

Ukutendeka 1:28 kutweba ulwa ico cifulo. Lesa atile ku bantunse ba ntanshi: “Mube na bukateka kwi sabi lya muli bemba, na ku fyuni fya mu lwelele, na ku fya mweo fyonse ifyenda pe sonde.” Na pa Amalumbo 8:6-8 patila: “Mwabike fintu fyonse [mwe Lesa] mwi samba lya makasa [ya muntu]: ifitekwa fya mukuni na maombe, fyonse fiine, ne nama sha mu mpanga pamo; ifyuni fya mu lwelele, ne sabi lya muli bemba, conse icenda mu mpito sha muli bemba.”

Lesa alilondolwele bwino ukuti umuntu kuti abomfya bwino inama no kushipaya. Ku ca kumwenako, impapa sha nama kuti shabomfiwa ku kupangilako ifya kufwala. Lesa kabili asuminishe abantunse ukulya inama pa numa ya Lyeshi lya mu nshiku sha kwa Noa, ukulunda pa misalu bapeelwe ukuti balelya.—Ukutendeka 3:21; 4:4; 9:3.

Ici tacipeela umuntu insambu sha kwipayaulula inama ku musamwe fye. Pa Ukutendeka 10:9, Baibolo ilondolola Nimrode, ukuti ali “mubamfi uwakosa.” Lelo icikomo cimo cine cisosa ukuti ali “uwakosa [“uulwisha,” NW] ku cinso ca kwa Yehova.”

Kanshi, nangu ca kuti umuntu ni kateka pa nama, tafwile ukubomfya bubi bubi icifulo cakwe lelo afwile ukucibomfya mu kumfwana ne fishinte fisangwa mu Cebo ca kwa Lesa. Ici napamo kuti casanshamo ukukanaleka icitekwa ukulacululuka fye pa mulandu wa bukote, ukucenwa kwabipisha, nelyo ubulwele bushipola. Nga cabe fi, Umwina Kristu umwine kuti asalapo ica kucita. Nga asalapo ukutila kuti cawamisha ukukanaleka icitekwa ukulacululuka fye pantu tapali isubilo lya kutila kuti capola, lyene kuti acipaya.