Iminineni No Kumona Ukupususha kwa kwa Yehova!
Iminineni No Kumona Ukupususha kwa kwa Yehova!
“Mukaitantamike, mukeminine, no kumono kupususha kwa kwa Yehova, uwaba na imwe.”—2 IMILANDU 20:17.
1, 2. Mulandu nshi ukusansa kusungamine ukwa kwa “Goge mu calo ca Magoge” kwacilila pa kusansa kuletiinya ukwa fipondo ukwa pa kati ka fyalo?
UKUSANSA kwa fipondo kwalondololwa na bamo ukuti kusansa icalo, kusansa ubwikashi bwine. Nge fyo twingenekela, tufwile ukubikako amano kuli ici cintu ca kutiinya. Lelo, kuli ukusansa ukwacilapo ubukalamba, uko abantu bashipoosako amano. Kusansa nshi uku?
2 Kusansa kwa kwa “Goge mu calo ca Magoge,” uo Baibolo yalandapo muli Esekiele icipandwa 38. Bushe kulemyo mulandu ukusosa ati uku kusansa kukalamba kucila ukusansa kuletiinya ukwa fipondo ukwa pa kati ka fyalo? Iyo, pantu ukusansa kwa kwa Goge kwacila pa kusansa imitekele ya bantunse. Goge asansa ubuteko bwa ku muulu ubwa kwa Lesa! Lelo, ukupusana na bantunse, abo bengatunguluka fye panono mu kucimfya ukusansa pa bwikashi bwabo, Kalenga wena aba na maka ya kucimfya ukusansa kwacilapo ukubipa ukwa kwa Goge.
Ukusansa Ubuteko bwa kwa Lesa
3. Bakateeka ba mu calo balaalikwa ukucita cinshi ukutula 1914, kabili bayankulako shani?
3 Ukukansana pa Mfumu iileteeka nomba iya kwa Lesa no bwikashi bubifi ubwa kwa Satana kwalitwalilila ukutula apo Ubufumu bwa kwa Lesa bwaimikilwe mu muulu mu 1914. Ilya nshita, bakateeka abantunse balangilwe ukuti bafwile ukunakila Kateeka Lesa asala. Lelo balikaana ukucite co nga fintu casobelwe ati: “Imfumu sha pano isonde shaibikako, na bakankaala batekela akabungwe pali Yehova na pa wasubwa wakwe, abati, Tuputaule ififungilo fyabo, tupoose tufumye pali ifwe ne myando yabo.” (Amalumbo 2:1-3) Ukukaanya ukuteeka kwa Bufumu kukafika pa kalume mu kusansa kwa kwa Goge wa ku Magoge.
4, 5. Abantunse kuti balwisha shani ubuteeko bwa kwa Lesa ubwa ku muulu ubushimoneka?
4 Kuti twapapa ifyo abantu bengalwisha ubuteko bwa ku muulu ubushimoneka. Baibolo isokolola ukuti ubu buteko bwapangwa na “ba makana umwanda umo na makana amakumi yane na makana yane (144,000), abashitilwe pe sonde,” pamo no “Mwana wa mpaanga,” Kristu Yesu. (Ukusokolola 14:1, 3; Yohane 1:29) Pa kuba ubuteko bwa ku muulu, ubu buteko bupya bwitwa “imyulu ipya,” kabili abekashi ba buko aba pe sonde betwa “isonde lipya.” (Esaya 65:17; 2 Petro 3:13) Bakateeka banankwe Kristu abengi aba pali ba 144,000 balipwisha umulimo wabo uwa pe sonde mu busumino. Mu kucite fyo balilanga ukuti baliwaminwa ukupokelela imilimo yabo iipya mu muulu.
5 Lelo abashalapo abanono pali ba 144,000 bacili pe sonde. Pa bacilile pali 15,000,000 abasangilwe ku kusefya kwa Mulalilo wa kwa Shikulu mu 2002, abali fye 8,760 e balangile isubilo lyabo ilya kuti balisalwa ukuyabombela ku muulu. Onse uupama ukusansa abashalapo ababa ne subilo lya kuteeka mu Bufumu ninshi alesansa Ubufumu bwa kwa Lesa.—Ukusokolola 12:17.
Imfumu Yapwisha Ukucimfya Kwa Iko
6. Yehova na Kristu bamona shani ukukaanya ukucitilwa abantu ba kwa Lesa?
6 Ico Yehova ali no kucita ku bakaanya Ubufumu bwakwe calisobelwe ukuti: “Uwaikala mu muulu aseka, Shikulu abapumya. E lyo asosa kuli bene mu bukali bwakwe, kabili mu cifukushi cakwe abasakamika: ati, Lelo ine ninsansabike mfumu yandi pa Sione, ulupili lwandi lwa mushilo.” (Amalumbo 2:4-6) Inshita nomba naifika iya kuti Kristu, uuletungululwa na Yehova, ‘apwishe ukucimfya kwakwe.’ (Ukusokolola 6:2) Yehova amona shani abakaanya abantu bakwe mu nshita ya kucimfya kwa kulekelesha? Amona ababakaanya ukuti balekaanya wene ne Mfumu yakwe iileteeka. Yehova atila: ‘Uwakumya pali imwe, akumya pa mboni ya linso lyandi.’ (Sekaria 2:8) Kabili Yesu alandile mu maka ukuti amona ifyo abantu bacita kuli bamunyina basubwa ukuti bacitila wene nelyo ifyo bafilwa ukucita ukuti taficitilwa wene.—Mateo 25:40, 45.
7. Mulandu nshi “ibumba likalamba,” ilyalondololwa pa Ukusokolola 7:9, likaponenwa no bukali bwa kwa Goge?
7 Kwena, ababa ku lubali lwa bashalapo abasubwa na bo bakaponenwa no bukali bwa kwa Goge. Aba bakwata isubilo lya kuba mwi “sonde lipya” baba “ibumba likalamba” abafuma “mu nko shonse ne mitundu na bantu na bantu ne ndimi.” (Ukusokolola 7:9) Bashimikwa ukuti ‘baiminina ku cinso ca cipuna ca bufumu na ku cinso ca Mwana wa mpaanga, nabafwala imingila yabuuta.’ E co baliminina bwino ku cinso ca kwa Lesa na Kristu Yesu. Pa kuba ne “misambo ya tuncindu mu minwe yabo,” balumbanya Yehova ukuti e Mulopwe wa bubumbo bonse, uuteekela mu Mfumu abikapo, Yesu Kristu, “Umwana wa mpaanga.”—Yohane 1:29, 36.
8. Ukusansa kwa kwa Goge kukalenga Kristu ukucita cinshi, kabili cinshi cikafumamo?
8 Ukusansa kwa kwa Goge kukalenga Imfumu yabikwapo na Lesa ukulwa ubulwi pa Armagedone. (Ukusokolola 16:14, 16) Abakaana ukunakila bumulopwe bwa kwa Yehova bakonaulwa. Lelo, abashipikisha ubucushi pali bucishinka bwabo ku Bufumu bwa kwa Lesa bakalubulwa umupwilapo. Ukukuma kuli ci, umutumwa Paulo alembele ati: “Ubu e bushininkisho bwa bupingushi bwalungama ubwa kwa Lesa, ukuti mulengwe abawamino bufumu bwa kwa Lesa, ubo muleculila icine cine. E ico cabe calungama kuli Lesa ukubwesesho bucushi ku balemucusha, lelo, kuli imwe mwe balecula, ukutuushisha pamo na ifwe pa kusokololwa kwa kwa Shikulu Yesu ukufuma ku muulu pamo na bamalaika bakwe aba maka mu mulilo uulebilima, ilyo akalete cilandushi pa bashaishiba Lesa na bashinakila imbila nsuma iya kwa Shikulwifwe Yesu.”—2 Abena Tesalonika 1:5-8.
9, 10. (a) Yehova alengele shani Yuda ukucimfya umulwani wa kutiinya? (b) Cinshi Abena Kristu leelo bafwile ukutwalilila ukucita?
9 Mu bucushi bukalamba ubuleisa, ubukafika pa kalume pa Armagedone, Kristu akalwisha ububifi bonse. Lelo abakonshi bakwe tabakalweko, filya fine abekashi bashalwileko aba mu bufumu bwa mikowa ibili ubwa Yuda ubwa kale sana. Ubulwi bwali bwa kwa Yehova, kabili abalengele ukucimfya. Ubulondoloshi butila: “Yehova abikile aba kulaalilila abena Amone, na bena Moabu, na ba ku lupili lwa Seiri abaishiile abena Yuda, na bo balipuminwe. Pantu abena Amone na bena Moabu baimiine abekashi ba mu lupili lwa Seiri ku kubapeela ku konaulwa no kubafita; kabili bapwishishishe abekashi ba mu Seiri, bayafwile umuntu onse ku konaulo munankwe. Ilyo abena Yuda baishile ku lupungu lwa bakacefya ku matololo, bamwene cinkupiti, kabili moneni, bali fitumbi ifyawa pa nshi; tapali na wapuswike.”—2 Imilandu 20:22-24.
10 Cali fye nga filya Yehova asobele ati: “Tamwakalwe.” (2 Imilandu 20:17) Ici e cipasho Abena Kristu bafwile ukukonka ilyo Yesu Kristu akema ku ‘kupwisha ukucimfya kwakwe.’ Pali ino nshita, batwalilila ukulwisha ububifi, te kubomfya ifyanso fya ku mubili, lelo babomfya ifyanso fya ku mupashi. Naendi ‘bacimfisha ububi ku busuma.’—Abena Roma 6:13; 12:17-21; 13:12; 2 Abena Korinti 10:3-5.
Nani Akatungulula Ukusansa kwa kwa Goge?
11. (a) Tubungwe nshi Goge akabomfya pa kusansa? (b) Ukuba abalola lwa ku mupashi kusanshamo cinshi?
11 Goge wa ku Magoge alondololwa ukuti ni Satana Kaseebanya uwasalulwa ukutula 1914. Apo cibumbwa ca ku mupashi, tengasansa mu kulungatika, lelo akabomfya utubungwe twa bantunse ku kucita ifyo alefwaya. Bushe utu tubungwe twa bantunse tukaba ni bani? Baibolo tayatulondolwela sana, lelo ilatweba fimo ifingatwafwa ukwishiba abakaba utu tubungwe. Ilyo ifilecitika mu calo filefishapo ukusesema kwa Baibolo, panono panono tukeshiba bwino. Abantu ba kwa Yehova tabatunganya ifya kutunganya lelo baba abalola lwa ku mupashi, ukwishiba ifilecitika mu mapolitiki na mu mipepele ifileumfwana no kufishiwapo kwa kusesema kwa Baibolo.
12, 13. Kasesema Daniele asobele shani pa kusansa kwa kulekelesha pa bantu ba kwa Lesa?
12 Kasesema Daniele asokolola ifyebo fyalundwapo pa kusansa kwa kulekelesha pa bantu ba kwa Lesa ilyo alemba ati: “Kabili [imfumu ya ku kapinda ka ku kuso] ikafuma ne cipyu cikalamba ku kulofya na ku kupeela abengi ku konaulwa. Kabili ikashimpa amahema ya iko aya bukata pa kati ka bemba no lupili lwayemba ulwa mushilo.”—Daniele 11:44, 45.
13 Mu nshita Baibolo yalelembwa, “bemba” ali ni Bemba Mukalamba, nelyo Mediterranean, kabili ‘ulupili lwa mushilo’ lwali ni Sione, untu Yehova alandilepo ati: “Ine ninsansabike mfumu yandi pa Sione, ulupili lwandi lwa mushilo.” (Amalumbo 2:6; Yoshua 1:4) E co ku mupashi, incende ‘pa kati ka bemba no lupili lwa mushilo’ imininako umulimo ulelunduluka uwa ku mupashi uwa Bena Kristu basubwa. Tababa pamo na bantunse bafuma kuli Lesa, kabili balelolela ukuteeka na Kristu Yesu mu Bufumu bwa ku muulu. Cili icaumfwika ukuti ababomfi basubwa aba kwa Lesa, pamo na banabo aba bucishinka abe bumba likalamba, e bo imfumu ya ku kupinda ka ku kuso ikatontapo ilyo ikasansa icabipisha mu kufishapo ukusesema kwa kwa Daniele.—Esaya 57:20; AbaHebere 12:22; Ukusokolola 14:1.
Ababomfi ba kwa Lesa Bakacita Shani?
14. Fintu nshi fitatu abantu ba kwa Lesa bakacita ilyo bakasanswa?
14 Cinshi ababomfi ba kwa Lesa bakenekelwa ukucita ilyo bakasanswa? Na kabili, ifyacitile uluko lwa kwa Lesa mu nshiku sha kwa Yehoshafati fyaba e cipasho. Moneni ukuti abekashi baebelwe ukucita ifintu fitatu: (1) ukuitantamika, (2) ukwiminina, na (3) ukumono kupususha kwa kwa Yehova. Abantu ba kwa Lesa ilelo bakacita shani ukulingana na ya mashiwi?—2 Imilandu 20:17.
15. Ukuitantamika kwa bantu ba kwa Yehova kupilibula nshi?
15Bakaitantamika: Ukwabula ukushingashinga, abantu ba kwa Lesa bakatwalilila ukuba ku lubali lwa Bufumu bwa kwa Lesa. Pa kuba Abena Kristu bakatwalilila ukukanaisansha mu fya calo. Bakaba “abashangila, abashitelententa” mu mulimo wabo uwa bucishinka kuli Yehova kabili bakatwalilila ukulumbanya Yehova pa kutemwa kwakwe ukwa cishinka. (1 Abena Korinti 15:58; Amalumbo 118:28, 29) Amafya ya nomba na ya ku ntanshi tayakabalenge ukusha icifulo babamo ica kusenaminwa na Lesa.
16. Ababomfi ba kwa Yehova bakeminina shani?
16Bakeminina: Ababomfi ba kwa Yehova tabakeshe ukuipususha lelo bakacetekela Yehova umupwilapo. Wene eka e waba na maka ya kupususha ababomfi bakwe mu calo ca cimfulumfulu, kabili alaya ukucite fyo. (Esaya 43:10, 11; 54:15; Inyimbo sha Bulanda 3:26) Ukucetekela Yehova kukasanshamo ukucetekela inshila alebomfya nomba iimoneka iyo abomfya pa myaka iingi ku kucita ukufwaya kwakwe. Ukucila kale, Abena Kristu ba cine bakakabila ukucetekela bakapepa banabo abo Yehova ne Mfumu iileteeka bapeela insambu ya kutungulula. Aba baume ba busumino bakatungulula abantu ba kwa Lesa. Ukukanakonka ubutungulushi bwabo kuti kwaleta ubonaushi.—Mateo 24:45-47; AbaHebere 13:7, 17.
17. Mulandu nshi ababomfi ba kwa Lesa aba busumino bakamwena ipusukilo lya kwa Yehova?
17Bakamona ukupususha kwa kwa Yehova: Ipusukilo likaba e cilambu kuli bonse abatwalilila ukusungilila bumpomfu bwa Bwina Kristu kabili abacetekela Yehova ukubapususha. Ukufikila ne nshita ya kulekelesha—kabili ukufika apo bengapesha—bakabilisha ukufika kwa bushiku bwa bupingushi ubwa kwa Yehova. Abantu bonse bafwile ukwishiba ukuti Yehova ni Lesa wa cine no kuti alikwata ababomfi ba busumino pe sonde. Ukukansana takwakakabile ukutwalilila pali bumulopwe bwa kwa Yehova.—Esekiele 33:33; 36:23.
18, 19. (a) Ulwimbo lwa kucimfya ulwa mu Ukufuma icipandwa 15 lulanga shani ifyo abakapusuka ukusansa kwa kwa Goge bakayumfwa? (b) Cisuma nshi abantu ba kwa Lesa bafwile ukucita nomba?
18 Pa kuba na maka cipya cipya, abantu ba kwa Lesa bakengila mu calo cipya, kabili bakafwaisha ukwimba ulwimbo lwa kucimfya, filya fine abena Israele ba ku kale bacitile pa numa ya kulubulwa pali Bemba Wakashika. Pa kutasha nga nshi pa bucingo bwa kwa Yehova, umo umo kabili pamo, bakalanda aya mashiwi yalandilwe kale aya kuti: “Ndeimbila Yehova, ico napulama apakalamba; . . . Yehova musalifi ku bulwi: Yehova e shina lyakwe. . . . ukwa kulyo kwenu, mwe Yehova, kufwantaula abalwani. Kabili mu bwingi bwa kupulama kwenu mwaomona abamwimina; mwatume cifukushi cenu, caboca kwati ni mpimbili. . . . Ku luse lwenu e ko mwatungulwila abantu abo mwalubwile: ku kukosa kwenu mwabaleta ku bwikalo bwenu bwa mushilo. . . . Mukabengisha, no kubalimba mu lupili lwa cikwatwa cenu, apapampamikwa apo mwacitile ubwikalo bwenu, mwe Yehova, apashila apo mwapampamike ku minwe yenu, mwe Shikulu. Yehova akabe mfumu umuyayaya umuyayaya!”—Ukufuma 15:1-19.
19 Nomba apo isubilo lya mweo wa muyayaya lilemonekesha, ino ni nshita isuma ku bantu ba kwa Yehova ukulanga ukuipeela kwabo kuli Yehova no kupampamina cipya cipya pa kumubombela pamo nge Mfumu yabo iya muyayaya!—1 Imilandu 29:11-13.
Bushe Kuti Mwalondolola?
• Mulandu nshi ukusansa kwa kwa Goge kukatontela pa basubwa na ba mpaanga shimbi?
• Ababomfi ba kwa Lesa bakaitantamika shani?
• Ukwiminina kwalola mwi?
• Abantu ba kwa Lesa bakamona shani ukupususha kwa kwa Yehova?
[Amepusho]
[Icikope pe bula 18]
Yehova alengele Yehoshafati na bantu bakwe ukucimfya, ukwabula bene ukulwako
[Icikope pe bula 20]
Abasubwa na ba mpaanga shimbi bonse balacindika bumulopwe bwa kwa Yehova
[Icikope pe bula 22]
Filya cali ku bena Israele ba ku kale, abantu ba kwa Yehova nomba line bakemba ulwimbo lwa kucimfya