Imipeelele Isekesha Lesa

YESU na basambi bakwe baleipakisha ica kulya mu Betani ne bumba lya fibusa fisuma, apaali na Maria, Marita, na Lasaro uwabuushiwe nomba line. Ilyo Maria abulile umulingo wa makilogramu yatatu uwa mafuta yaumo mutengo no kusuba amakasa ya kwa Yesu, Yuda Iskariote alifulilwe no kuilishanya. Atile: “Mulandu nshi aya mafuta ya cena cisuma yashashitishiwe pali badenari imyanda itatu (300) no kupeela abapiina?” Na bambi na bo bailishenye cimo cine.—Yohane 12:1-6; Marko 14:3-5.

Lelo, Yesu atile: “Mulekeni umwine. . . . Pantu abapiina mwaba na bo pe, kabili lyonse ilyo mwafwaya kuti mwabacitile cisuma, lelo tamwakabe na ine pe.” (Marko 14:6-9) Bashimapepo ba ciYuda balesambilisha ukuti ukupeela abapiina cisuma nga nshi kabili ne membu sha bape kuti shalekelelwa. Kabili, Yesu alandiilepo fye ukuti ukupeela kusekesha Lesa te kwa kwafwilisha fye abapiina.

Ukubebeta mu kwipifya pa fyo ukupeela kwali mu cilonganino ca Bwina Kristu ica pa kubala kwalatwafwa ukumona inshila shingabomba isha kwangwa bambi no kulenga Lesa ukusekelela pa kupeela tupeela. Kwalatwafwa no kwishiba imipeelele iifumamo ifisabo fyawamisha.

“Ukupeela Ifya Nkumbu”

Pa miku iingi Yesu akoseleshe abasambi bakwe “ukupeela ifya nkumbu.” (Luka 12:33) Nangu cibe fyo, Yesu asokele pa kupeela kwa mataki ukwa kuicindamika ukucila ukucindamika Lesa. Atile: “Ilyo ulepeela ifya bupe fya nkumbu, wilalisha ipenga ku ntanshi yobe, nge ficita aba bumbimunda mu masunagoge na mu misebo, pa kuti bacindikwe ku bantu.” (Mateo 6:1-4) Ilyo Abena Kristu ba kubalilapo babakile uku kukonkomesha, basengawike imipeelele ya bashimapepo ba bumbimunda abaliko mu nshiku shilya no kusala ukwafwa abapiina ukupitila mu kubafwa ukubomba imilimo ya pa lwabo nelyo mu kupeela ifya bupe ukwabula bambi ukumonako.

Ku ca kumwenako, pali Luka 8:1-3, twaebwa ukuti Maria umwina Magadala, Yoana, Susana, na bambi babomfeshe “fikwatwa fyabo” ku kupyungila  Yesu na batumwa bakwe ukwabula ukuilanga. Nelyo ca kuti aba baume tababulishe sana, bashiile imikalile bakwete kale no ukuipeelesha fye ku butumikishi. (Mateo 4:18-22; Luka 5:27, 28) Apo aba banakashi bayafwile Yesu na bakonshi bakwe ku kufishapo umulimo bapeelwe na Lesa, kanshi ninshi balecindika Lesa. Kabili Lesa alitashishe ukupitila mu kusungilila ifyebo pa kupeela bapeele ifya nkumbu mu Baibolo pa kuti aba nkulo yaleisa bengalabelengamo.—Amapinda 19:17; AbaHebere 6:10.

Dorka na o aali ni umo pa banakashi ba cikuku ‘uwaiswilemo imilimo isuma ne fya nkumbu ifyo alecita.’ Alebilila bamukamfwilwa ifya kufwala mu musumba wali ku lulamba lwa bemba uwa Yopa. Nampo nga aleishitila insalu umwine nelyo alebabilila ukwabula ukubalipilisha nga baifwaila insalu abene, tatwaishiba. Na lyo line, imilimo yakwe isuma yamulengele ukutemwikwa ku bantu aleafwa, na kuli Lesa, uwamulambwile pa busuma bwakwe.—Imilimo 9:36-41.

Ukukwata Inkuntu Shalinga Calicindama nga Nshi

Cinshi cacincishe aba bantu ukupeela? Te kuba ne cililishi ca kukuntukilwa fye icibako nga umo apaapaata ukulomba ubwafwilisho. Balishibe ukuti e co balingile ukucita cila bushiku ukwafwa bambi abali mu bupiina, abalecula, abalwele, nelyo abali na mafya yambi. (Amapinda 3:27, 28; Yakobo 2:15, 16) Uku e kupeela kusekesha Lesa. Icilenga uku kupeela kutemwa kwashika ukwa kuli Lesa no kufwaisha ukupashanya inkumbu na bukapekape ifyo akwata.—Mateo 5:44, 45; Yakobo 1:17.

Umutumwa Yohane akomaile pa mipeelele yacindamisha iyapala yi ilyo aipwishe ati: “Lelo onse uukwete ifya mikalile ya pano calo kabili amona munyina alekabila, lelo amwisalila inkumbu shakwe, bushe ninshi ukutemwa Lesa kwaikala shani muli wene?” (1 Yohane 3:17) Icasuko cine cayeba. Ukutemwa Lesa kulenga abantu ukuba abape. Lesa alatasha kabili alalambula abantu bapashanya imibele akwata iya bukapekape. (Amapinda 22:9; 2 Abena Korinti 9:6-11) Bushe muno nshiku tulamona bukapekape bwaba ngo bu? Tontonkanyeni pa cacitike nomba line mu cilonganino cimo ica Nte sha kwa Yehova.

Ing’anda ya mwanakashi umo umukoloci Umwina Kristu yalekabila ukuwamishiwa apakalamba. Aleikala fye eka kabili takwete ulupwa lwa kumwafwako. Mu myaka yapita, ing’anda yakwe yalebomfiwa ku kulongana kwa Bwina Kristu, kabili ilingi line aleitako onse uulefwaya ukulya nankwe. (Imilimo 16:14, 15, 40) Ilyo aba mu cilonganino bamwene imibele aalimo balikutene ku kumwafwilisha. Bamo bapeele indalama, bambi baipeele fye abene ukubombako. Pa mpela ya milungu iya kupenda fye, abaitemenwe balipaalikilepo umutenge upya, umuputule wa kusambilamo uupya, ukumasako sementi no kupenta yonse imiputule yali pa nshi, no kubikamo amakabati yapya mu kicini. Uku kupeela  bapeele kwakumanishe fyonse ifyalekabila uyu nakulubantu kabili ici calengele cilonganino conse ukwikatana na bena mupalamano balapapa nga nshi pa cilangililo bamwene ica kupeela kwa cine ukwa Bwina Kristu.

Kwaba inshila ishingi isho ifwe pa lwesu twingafwilamo bambi. Kuti twaisha na bana ba nshiwa. Kuti twayafwa bamukamfwilwa abakoloci ifya kushitashita nelyo ukubabililako ifya kubilabila. Kuti twaipikilako bambi nelyo ukulipililako bambi abashingakumanisha ukulipila ifipooswa. Tatufwile ukuba aba cuma pa kuti twafweko bambi. Umutumwa Paulo alembele ati: “Ukuiteyanya nga kwabako intanshi, kuli ukwapokelelwa maka maka umo umuntu akwatila, te umo ashakwatila.” (2 Abena Korinti 8:12) Lelo bushe uku kupeela kwa mu kulungatika, e kweka fye Lesa apaala? Iyo.

Cinshi Cingasoswa pa Kukumbusuka Kwateyanishiwa?

Inshita shimo ifyo tucita pa lwesu tafifikapo. Na kuba, Yesu na batumwa bakwe balesunga indalama mu kabokoshi isha kwafwilamo abapiina, kabili balepokelela imisangulo yalefuma ku bantu baangilweko abo balesanga mu mulimo wabo. (Yohane 12:6; 13:29) Kabili, ne filonganino fya mu kubangilila fyalisangwile imisangulo ilyo kwaimine ukukabila kabili bateyenye umulimo wa kukumbusuka uukalamba.—Imilimo 2:44, 45; 6:1-3; 1 Timote 5:9, 10.

Inshita imo ici cacitike ni mupepi na mu mwaka wa 55 C.E. Ifilonganino fya mu Yudea fyali mu bupiina, napamo pa mulandu wa cipowe cacitike. (Imilimo 11:27-30) Umutumwa Paulo, uwali uwa-angwako lyonse ku bapiina, alombele ubwafwilisho mu filonganino ukufika na ku fyali ukutali ku Makedonia. Paulo umwine e wateyenye ukupoka imisangulo kabili abomfeshe abaume basuminishiwe ukutwala iyo misangulo. (1 Abena Korinti 16:1-4; Abena Galatia 2:10) Bonse ababombeleko uyu mulimo, pamo na Paulo wine, tabalipilwe amalipilo, baitemenwe fye.—2 Abena Korinti 8:20, 21.

Inte sha kwa Yehova na bo bene lelo balangufyanya ukwafwa ilyo kwaba kayofi. Ku ca kumwenako, mu lusuba lwa 2001, imfula ya cikuuku yalengele kube ilyeshi mu Houston, Texas, U.S.A. Amayanda ya Nte yonse pamo ayaonawilwe yali 723, kabili yamo pali aya yalyonawilwe cibi. Ilyo aka kayofi kacitike fye, komiti ya kukumbusuka yalipangilwe ukubomfya baeluda bafikapo aba Bwina Kristu. Iyi komiti yalebebeta ukukabila kwa muntu umo na umo no kupeela indalama sha kwafwilisha Inte sha mu cifulo ico ukucefyanyako amafya yalengelwe na kayofi no kulungisha amayanda yabo. Abaitemenwe ukubomba ukwabula ukulipilwa ukufuma ku filonganino fyali mupepi e babombele umulimo onse. Nte umo alitashishe nga nshi pa bwafwilisho ica kuti ilyo apokelele amalipilo ukufuma ku kampani ka inshuwalansi aya kulungishisha ing’anda yakwe, apeele ishi ndalama ngo bupe ku cipao ca kukumbusuka  pa kuti shingafwako bambi abalekabila.

Lelo ilyo tulefwaya ukupeela ku kabungwe ka bwafwano, tufwile ukucenjela ilyo tulelingulula ukulombelesha kwabo. Utubungwe tumo twaba na babomfi abengi aba kulipila nelyo inshila babomfya pa kuti abantu bacincishiwe ukupeela ilafwaikwa indalama ishingi ica kuti shinono fye shibomfiwa ku kwafwa abantu. Amapinda 14:15 yatila: “Uwapelwa amano atetekele cebo conse; lelo uwacenjela amwensekeshe nyantilo shakwe.” E co ca mano ukubebeta ifishinka bwino bwino.

Ukupeela Ukunonsha Icine Cine

Kwabako ukupeela ukwacila na pa kupeela kwa bwafwano. Yesu alilandile pali ci ilyo kateeka wa cuma umulumendo aipwishe ico aali no kucita pa kuti anonke ubumi bwa muyayaya. Yesu amwebele ati: “Kashitishe ifikwatwa fyobe no kupeela abapiina, kabili ukakwate icuma mu muulu, e lyo wise ulenkonka.” (Mateo 19:16-22) Moneni ukuti Yesu tatile fye, ‘Ulepeela abapiina kabili ukanonka ubumi’ iyo. Lelo asosele no kuti, “Wise ulenkonka.” Kuti twatila, nelyo ca kuti ukubomba imilimo ya bwafwano cisuma sana kabili ca kunonsha, ukuba abasambi ba Bwina Kristu kwalicila na po.

Ubufwayo bukalamba Yesu akwete bwa kwafwa bambi lwa ku mupashi. Ilyo talafwa, aebele Pilato ati: “Ici e co nafyalilwe, kabili ici e co naishile pano calo, ukuti nshimike icine ubunte.” (Yohane 18:37) Nangula ali pa ntanshi ku kwafwa abapiina, ukuundapa abalwala, no kuliisha abaali ne nsala, umulimo ukalamba Yesu akanshishe abasambi bakwe wa kushimikila. (Mateo 10:7, 8) Na kuba, pa mafundisho ya kulekelesha abebele pali ne fyebo fyaleti: “E ico kabiyeni, kalengeni aba nko shonse ukuba abasambi.”—Mateo 28:19, 20.

Kwena ukushimikila takwingapwisha amafya yaba mu calo yonse. Na lyo line, ukushimikilako abantu ba misango na misango kucindika Lesa pantu kufishapo ukufwaya kwa kwa Lesa kabili ku bapokelela ubukombe bwa kwa Lesa e nshila itwala ku mapaalo ya bumi bwa muyayaya. (Yohane 17:3; 1 Timote 2:3, 4) Mulandu nshi mushingakutikila ku Nte sha kwa Yehova umuku ukakonkapo? Baleta ica bupe ca ku mupashi. Kabili balishiba ukuti iyi e nshila yawamisha bengamupeelelamo.

[Ifikope pe bula 6]

Kwaba inshila ishingi isha kwangilwamo bambi

[Icikope pe bula 7]

Ukushimikilako bambi imbila nsuma kusekesha Lesa no kwisula inshila itwala ku mapaalo ya muyayaya