‘Solomone Tafwelepo nga Limo Ilya Aya’

AMALUBA nga aya yali pano yalasangwa sana mu mbali ya misebo ku kapinda ka ku kulyo aka Afrika. Yetwa ati cosmos kabili yafumine ku kapinda ka ku kulyo aka Amerika. Aya maluba yashaiwamina kuti yalenga twaibukisha isambilisho Yesu asambilishe. Abengi abalemukutika bali abapiina, balesakamikwa pa fyo balekabila, e kutila ifya kulya ne fya kufwala.

Yesu aipwishe ati, “mulandu nshi mulesakamikilwa ifya kufwala? Sambilileniko ku maluba ya mu mpanga fintu yakula; tayacucutika, nelyo ukupikula; lelo ndemweba nati nangu fye ni Solomone mu bukata bwakwe bonse tafwelepo nga limo ilya aya maluba.”—Mateo 6:28, 29.

Abantu balilandapo ifyalekanalekana pa musango wa maluba Yesu alandilepo. Lelo Yesu ayalingenye ku fimenwa, ukusosa ati: “Nomba nga e fyo Lesa afwika ifimenwa fya mu mpanga, ifibapo leelo kabili mailo fyapooswa mwi buku, bushe takacilepo ukufwika imwe, mwe ba citetekelo cinono?”—Mateo 6:30.

Nangula aya maluba tayasangwa mu Israel, kuti yatwafwa ukumfwikisha isambililo Yesu asambilishe. Aya maluba yalamoneka bwino sana apatali na mupepi kabili abakopa ifikope balitemwa ukuyakopa kabili na batemwa ukulenga balayalenga sana. Ca cine, Yesu alandile fye icishinka ilyo atile, “nangu fye ni Solomone mu bukata bwakwe bonse tafwelepo nga limo ilya aya.”

Cinshi twingasambililako pali leelo? Ababombela Lesa kuti bacetekela ukuti akabaafwa ukusanga ifyo bakabila na mu nshita ya mafya. Yesu atile: “Mulefwaya ubufumu [bwa kwa Lesa], na fyonse ifi [pamo nge fya kulya ne fya kufwala] fikalundwako kuli imwe.” (Luka 12:31) Ca cine, mu kufwaya Ubufumu bwa kwa Lesa e mwaba amapaalo. Lelo bushe mwalibwishiba Ubufumu bwa kwa Lesa ne co bukacitila abantu? Inte sha kwa Yehova bakatemwa ukumwaafwa ukusanga ifyasuko muli Baibolo.