Bushe Lutambi fye Nelyo Mafisakanwa?

MU MAKOLEJI yamo aya mu Poland, abasambi lyonse balasonke ndalama sha kushitila bakafundisha ubupe, pa kuti bakapite pa mashindano. E mulandu wine cayanshishe Katarzyna, Umwina Kristu wacaice. Aipwishe ati: “bushe nsonkeko indalama nelyo iyo?” Abanankwe batile: “Ulu lutambi lwaliseeka. Tapali ububi ubuli bonse, lelo ukamwenamo, e co cinshi uletwishikila?”

Katarzyna atile: “mfwile ukusumina ukuti umwaka wa kubalilapo pa sukulu, na ine nalisonkeleko indalama.” “Limbi limbi fye e lyo nakutulwike ukuti ukucite ci kutungilila amafisakanwa, ayabindwa mu Baibolo.” Aibukishe amalembo yalanda ukuti Yehova alibinda amafisakanwa. (Amalango 10:17; 16:19; 2 Imilandu 19:7) Katarzyna atila: “Nalyumfwikishe ifyo cayanguka ukukonkelesha ifibusa. Nalitontonkenyepo na kabili, kabili ukutule lyo nshabalile nsonkako indalama na kabili.” Nangu line abasambi bambi balemupumya, pa myaka itatu iyapita, aalilondolola kuli bambi ukuti tasonkako indalama sha kushita ifi “fya bupe” pa mulandu wa fyo asuminamo ifyaba mu Baibolo.

Bamo baleti Katarzyna wa kaso fye kabili tafwaya kwafwa bambi. Atila: “na pali nomba bamo tatumfwana. Lelo, abengi balicindika ukuyumfwa kwandi, ne ci cilansansamusha.” Katarzyna bamwishibe ukuti ni Nte ya kwa Yehova, uukonka ifishinte fya Baibolo mu mikalile yakwe.