Ukubombela Aba Lulimi Lwaibela mu Calo ca Korea

MU LUSUBA lwa 1997 kwali ukulongana kwa citungu ukwa Nte sha kwa Yehova ukwa bantu bacincimuka lelo abashilanda. Kwali e kulongana kwa kubalilapo ukwa bankomamatwi na bashumfwikisha mu Korea. Abasangilweko bonse bali 1,174. Programu yonse—iyakwetemo amalyashi, ukwipusha, ne cilangililo—yali mu Lulimi lwa Cina Korea ulwa Bankomamatwi ulwa kubomfya ifishibilo kabili abalelanda amalyashi baletambwa pa fikope fisela mu Cikuulwa ca Kulonganinamo. Uku kulongana kwali e kalume ka kubombesha kwa babomfi baitemenwe ukubomba no mukoosha.

Inshita ikesa muli paradaise wa pe sonde ilyo “amatwi ya bankomamatwi yakakomonwa.” (Esaya 35:5) Pa kwisaba mu Paradaise ileisa, bonse, ukusanshako na bankomamatwi, bafwile intanshi ukwingila muli paradaise wa ku mupashi, e kuti imibele yaisulamo ifya ku mupashi iya bantu ba kwa Lesa abapaalwa. Bafwile baba Inte sha kwa Yehova ishaipeela kabili ishabatishiwa, abakanshiwa na Yehova.—Mika 4:1-4.

Intendekelo Inono

Nelyo ca kuti bankomamatwi balishimikilwe muli ba1960, ni muli ba1970 fye e mo bamo aba bankomamatwi batendeke ukusangwa ku kulongana kwa Nte sha kwa Yehova mu Seoul, umusumba ukalamba uwa Korea. Munyina wa Bwina Kristu uwaishibe ukulemba ulubilo alelemba pa cipampa ifishinka fikalamba ifya malyashi, na malembo ya mu Baibolo yabomfiwe.

Mu 1971 mu musumba wa Taejon, Nte umo uwakwete umwana nkomamatwi atendeke ukumusambilisha na bankomamatwi banankwe ubukombe bwa Bufumu. Pali ili bumba e pafumine abantu bapimpa abaisaba inceshi mwi bala umwaba bankomamatwi.—Sekaria 4:10.

Abacaice Baipeela Abene no Kwanga

Ukubombesha kukalamba ku ba kuitemenwa na bambi kwalekabilwa pa kuti bankomamatwi banonke ukwishiba pali Yehova na Yesu no kuba pa nshila ya ku bumi. (Yohane 17:3) Pa kuti ico cicitike, Inte sha kwa Yehova bamo bamo balisambilila  ifya kulanshanya na bankomamatwi kabili balipaalwa mu fyafumamo.

Park In-sun, uwa myaka ya kufyalwa 15, aimikiile ubuyo bwa kusambilila ifya kulanshanya na bankomamatwi. Pa kuti acite ci, aingile incito mu fakitare umwali bankomamatwi 20 abalebombako ne co aingilile ncito umu ni co alefwaya ukusambililako imilimo pa ncito. Pa myeshi 8, abombele na bo mupepi pa kuti asambilile ululimi lwabo ne mitontonkanishishe yabo. Umwaka wakonkelepo, aishileba painiya, nelyo kabila wa Bufumu uwa nshita yonse, kabili alebomba ne bumba lya bankomamatwi abalefwaya ukusambilila icine ca mu Baibolo. Ibumba lyalikulile bwangu bwangu, kabili ukucila pali 35 balesangwa ku kulongana kwa pa Mulungu.—Amalumbo 110:3.

Lyene, pa muku wa kubalilapo mu Seoul, ukulongana kwa Bwina Kristu kwalipekanishiwe ukwa bankomamatwi beka beka. Munyina Park In-sun abombele bupainiya bwaibela muli ili bumba lyalelunduluka. Nomba aishileba kalapashi mu kumfwana na bankomamatwi. Mu myeshi imo imo, aletungulula amasambililo ya Baibolo aya pa ng’anda 28 na bankomamatwi. Abengi balilunduluka no kusanguka Inte sha kwa Yehova.

Pa mulandu wa kukampuka mu mulimo wa kuitemenwa, icilonganino ca kubalilapo ica bankomamatwi calipangilwe mu October 1976, cakwete bakasabankanya 40, na bapainiya ba nshita yonse babili. Ici cacincishe imibombele mu misumba imbi iya mu Korea. Bankomamatwi abengi bali ne nsala ya kuumfwa imbila nsuma kabili balepembelela ukutandalilwa.

Ukubombela Bankomamatwi

Napamo kuti mwaipusha ifyo bankomamatwi basangilwe. Abengi basangilwe ukupitila mu kulangililwa. Kabinge, abene ba matuuka ya mupunga balipushiwe, kabili e bapeele amashina na manambala ya mayanda apekala bankomamatwi. Amaofeshi ya kamfulumende yamo yalyafwile nga nshi muli uku kufwailisha. Umukoosha wa kubombela mu cifulo ca kubombelamo umo bankomamatwi bekala, mwafumine ifisuma, na kwi pele pele, ifilonganino fine fyalipangilwe. Abena Kristu bacaice abengi bakoseleshiwe ukusambilila ululimi lwa kumfwaninamo na bankomamatwi.

Bapainiya baibela abasambilile ukulanshanya na bankomamatwi batuminwe ne ofeshi lya musambo ilya Nte sha kwa Yehova ku kubomba ne filonganino. Mu nshita ya nomba line, abapwishishe Isukulu lya Kukansha Ilya Butumikishi batuminwe kuli fi filonganino kabili balikoselesha bankomamatwi lwa ku mupashi.

Kwaba mafya ayafwile ukubombelwapo. Icikabilwa pa kubombela muli ci cifulo kubombesha ku kwishiba ubwikalo bwa bankomamatwi. Bena balandilapo fye no kucita ifintu ukwabula insoni. Limo limo ici cilapapusha abantu kabili kuti calenga no kupusana. Kabinge, ilyo baNte balesambilisha Baibolo pa ng’anda kuli bankomamatwi, cilakabilwa ukubafwa ukwishiba bwino ululimi lwa bankomamatwi no kubakoselesha ukulapoosa inshita ikalamba ku kubelenga.

Mu milimo ya cila bushiku, bankomamatwi balakwata mafya ayo bambi tushikwatapo. Ukulanshanya na ba mu maofeshi ya kamfulumende na ba fipatala, pamo ne milimo ya fya kushitashita, ilingi line balasanga ubwafya nga nshi. Mu cilonganino ca Bwina Kristu, bankomamatwi balaipakisha ubwananyina bwa cine cine, pantu baNte ukufuma mu filonganino fya bwina  mupalamano balabafwilisha ne citemwishi.—Yohane 13:34, 35.

Mu Bunte bwa mu Lyashi Mulafuma Ifisuma

Mu musumba ukalamba uwa Pusan, uwaba ku kapinda ka ku kulyo aka Korea apafikilila ingalaba, Nte umo akumenye bankomamatwi babili abalembele pa kapepala ati: “Twalitemwa Paradaise. Tulefwaya ukwishiba amalembo yalanda pa bumi bwa muyayaya.” Munyina alembele inambala ya ng’anda uko bekala no kupekanya ukuyabatandalila. Ilyo abatandalile, asangile bankomamatwi nabesula ing’anda balelolela ukuumfwa ku bukombe bwa Bufumu. Ici camucitikile camulengele ukufwaya ukutendeka ukusambilila ululimi lwa kumfwaninamo na bankomamatwi. Bwangu bwangu fye icilonganino ca bankomamatwi calipangilwe mu Pusan.

Munyina wa mu cilonganino amwene bankomamatwi babili balelanshanya ukubomfya ifishibilo kabili alibabingile. Ilyo asangile ukuti e lyo bafuma fye ku kupepa, abalaalike ukusangwa ku Ng’anda ya Bufumu ne nshita ya 14 hours ubushiku bumo bwine. Balishile, kabili isambililo lya Baibolo lyalitendekwe. Pa numa ya kashita fye akanono, aba babili basangilwe ku kulongana kwa citungu na bankomamatwi banabo 20. Ukufuma pali lilya ibumba, abengi baliipeela kuli Yehova. Babili ni baeluda mu cilonganino na umo mubomfi utumikila mu filonganino fya bankomamatwi.

 Umupampamina Waleta Ipaalo

Apo bankomamatwi bamo bekala ukutali ne filonganino bafwile ukuyako, umukoosha no mupampamina ilingi line e fifwaikwa pa kuti balishiwe lyonse ifya ku mupashi ukufuma mu Baibolo. Ku ca kumwenako, umwaume wa myaka ya kufyalwa 31 aleliila mu bulondo ubo alebombela pa cishi. Aumfwile ubukombe bwa mu Baibolo ukufuma ku mwaice wakwe, uwatandalilwe ne Nte sha kwa Yehova. Pa kuti ekushe insala yakwe iya ku mupashi, uyu mulondo nkomamatwi aobele ubwato bakilomita 16 ukuya ku musumba wa Tongyoung, uwabela ku lulamba lwa ku kapinda ka ku kulyo aka Korea. Apangile ubu bulendo pa kuti fye bakumane na painiya waibela uwalefuma ku cilonganino ciyako bankomamatwi mu musumba wa Masan. Lyonse pali Cimo, uyu painiya waibela alepanga ubulendo bwa makilomita 65 pa kuti fye atungulule isambililo lya Baibolo no yu mulondo nkomamatwi.

Pa kuti asangwe ku kulongana kwa pa Mulungu mu musumba wa Masan, aleenda bakilomita 16 no bwato no kunina basi bakilomita na bambi 65. Mu mupampamina akwete mwafumine fisuma. Mu myeshi fye inono, alishibileko na fimbi mu lulimi lwa bankomamatwi, asambilile ifilembo na fimbi ifyaba muli alufabeti wa cina Korea, kabili—ne cacindamishe—asambilile ifya kuba cibusa wa kwa Yehova. Ilyo aishibe ubucindami bwa kulongana no kushimikila lyonse, aselele mu cifulo ca kubombelamo ica cilonganino cisangwako bankomamatwi. Bushe ico calyangwike? Iyo. Alekele umulimo wa bulondo uwalemuletela indalama ukufika ku madola 3,800 cila mweshi, lelo umupampamina akwete wamuletele amapaalo. Pa numa ya kulunduluka mu cine, alibatishiwe kabili ndakai abombela Yehova ne nsansa pamo no lupwa lwakwe.

Ukupilibwila Bankomamatwi

Imbila nsuma ya Bufumu ilingi line ibilishiwa ukupitila mu kulanda. Lelo, pa kuti ubukombe ubwa mu Cebo ca kwa Lesa bulungame ilyo bulebilwa, calicindamisha ukuti amasomo yashimpwa pali Baibolo yapeelwe mu nshila ingabelelela. E ico, mu nshita ya kutendeka kwa BuKristu, amabuuku na makalata yalelembwa na bakalamba babelesha. (Imilimo 15:22-31; Abena Efese 3:4; Abena Kolose 1:2; 4:16) Pali lelo, ifya kulya fya ku mupashi fyalipekanishiwa ukupitila mu mabuuku ne mpapulo shimbi isha Bwina Kristu. Ifi fyalipilibulwa mu ndimi mupepi na 380, ukusanshako ne sha bankomamatwi. Pa kuti bafishepo uyu mulimo wa kupilibwila Bankomamatwi mu Korea, iofeshi lya musambo lyalikwata ibumba lya bapilibwila bankomamatwi. Dipartimenti wa vidio apanga amavidio ya bankomamatwi. Ici cilenga bakabila ba mbila nsuma bankomamatwi na basekelela mu filonganino fya mu Korea ukupeelwa ifya kulya fya ku mupashi.

Nelyo ca kuti abengi ni bakalapashi mu lulimi lwa kumfwaninamo na bankomamatwi kabili balafwilisha na mu kupanga amavidio, ilingi line cisangwa ukuti bakapilibula bacilapo kuwama bana ba bankomamatwi. Balisambilila ifya kulanshanya na bankomamatwi ukufuma ku bucece. Aba bantu balalungika pa kulanshanya kabili balanshanya na bankomamatwi no mutimako no kukomaila pa bukombe ukupitila mu kubomfyo mubili no kumoneka kwa cinso, ne ci cilenga ukubafika pa mintontonkanya na pa mitima.

Nge fyo tumwene, amabungano no kulongana kukalamba uko bankomamatwi bengaya kulabako lyonse mu Korea. Icikabilwa pa kuti cibe fi kubombesha, indalama ishingi, no mukoosha. Lelo, abasangwako balatasha pali uku kupekanya. Pa numa ya kupwa uku kulongana, abengi tabaya bwangu, pa mulandu wa kufwaya ukutwalilila ukubishanya kusuma no kulanshanya pa ca kulya ca ku mupashi icisuma icapekanishiwe. Teti tutwishike no kutwishika ukuti ukubombela ili bumba lyaibela mwaba amafya yamo, lelo amapaalo ya ku mupashi ayafumamo ya kunonsha.

[Icikope pe bula 10]

Amavidio yapangwa mu Korea aya lulimi lwa bankomamatwi ulwa fishibilo: “Cinshi Cintu Lesa Afwaya Kuli Ifwe?,” “Ukukatamika Ubupyani Bwesu Ubwa ku Mupashi,” “Ifyacitike Kale Ifya Kutusoka Pali Lelo,” na “Cindikeni Ubutungulushi bwa kwa Yehova”

[Ifikope pe bula 10]

Ukufuma ku kulyo ukuya ku kuso ukutendekela pa nshi: Vidio ya lulimi lwa fishibilo iya bankomamatwi ilepangwa pe ofeshi lya musambo mu Korea; ukupekanya ifishibilo fya mashiwi yabomfiwa pa kulongana kwa Nte sha kwa Yehova; ibumba lya bakapilibula ba lulimi lwa fishibilo ulwa bankomamatwi; ukushininkisha ukuti uulelanda ululimi ne fishibilo fya bankomamatwi alecita bwino pa kupanga vidio