“Campeele Ifyabulile mu Mutima Wandi”

“NDEMUTASHA no mutima wandi onse pa bupe bwawamisha ubwa citabo citila Palameni Kuli Yehova. Campeele ifyabulile mu mutima wandi—e kutila ukufwaya ukutemwikwa no kuteeswa kuli Yehova. Nomba ndeumfwa uwapalama sana kuli Yehova na ku Mwana wakwe uwatemwikwa. Ndefwaya ukwebako bonse ulwa ici citabo no kupeelako bonse abatemwikwa bandi.” Ifyo e fyo Nte ya kwa Yehova umo aumfwile pa citabo cipya ica mabula 320 icafumine pa Mabungano ya Citungu ayaleti “Bakabila ba Bufumu Abapimpa” ayaliko mu 2002/03. Natumone fimo fimo ifyaba muli ci citabo cipya no mulandu calembelwe.

Fimo Fimo Ifyaba mu Citabo Cipya

Finshi fyaba muli ci citabo cipya? Ifyebo fyonse fili mu fipande fya kusambililamo fibili muli uno magazini na fimbi ifingi! Ici citabo cikwete ifipandwa 31, cimo na cimo cilepele fye nge cipande ca kusambililamo ica mu Ulupungu lwa kwa Kalinda. Pa numa ya mashiwi ya ntendekelo ne fipandwa fitatu ifya kwiswila, ici citabo nacakanishiwa mu fipande fine, cimo na cimo cilelanda pa mibele yapulamo imo na imo iya kwa Yehova. Icipande cimo na cimo citendekele no kusupula kwa iyo mibele. Ifipandwa fyakonkapo muli co cipande filelanda pa fyo Yehova alangisha iyo mibele. Lyena, icipande cimo na cimo cilimo icipandwa pali Yesu. Mulandu nshi? Kwena, Yesu atile: “Uwamona ine, amona na Tata.” (Yohane 14:9) Apo ali cipasho capwililika ica kwa Yehova, Yesu atupeela ica kumwenako cine cine ica fyo imibele ya kwa Lesa ibomba. Icipande cimo na cimo cilesondwelela ne cipandwa ciletusambilisha ifya kupashanya Yehova mu kulanga iyo ine mibele muli co cipande. Pa kulanda pa mibele ya kwa Yehova, ici citabo naciloshako kwi lembo lyonse fye ilyaba mu Baibolo.

Ici citabo cileti Palameni Kuli Yehova nacikwata imbali shimo ishaibela. Ukutampa ne Cipandwa 2, icipandwa cimo na cimo cili no mukululo uleti “Amepusho ya Kutontonkanyapo.” Amalembo na mepusho yalimo te ya kupituluka mu cipandwa. Lelo, ubufwayo bwa yako bwa kumwafwa ukutontonkanya pa mbali shimbi ishacindama isha uyo mulandu. Poosesheniko amano pa kubelenga Ilembo lyonse ililipo. Lyene bebeteni icipusho cili pali ilyo lembo, no kwesha ukumona ifyo mwingabomfya ifyo fyebo pa lwenu. Ukwetetula kwa musango yo kuti kwatwafwa ukulapalama kuli Yehova pe.—Amalumbo 19:14.

Ifikope fya mu citabo ca Palameni Kuli Yehova na fyo fyalisapikwa bwino bwino no kulengwa mu nshila ingamusambilisha no kumucincisha. Ifipandwa 17 fili ne fikope pe bula ilituntulu ifilelanga ifya mu Baibolo.

Mulandu Nshi Calembelwe?

Mulandu nshi icitabo ca Palameni Kuli Yehova calembelwe? Ubufwayo bukalamba ubwa ici citabo cipya bwa kutwafwa ukwishiba bwino Yehova pa kuti tube na bucibusa bwakosa na Lesa wesu.

Bushe kuti mwatontonkanyapo umo uwinganonkelamo mu citabo ca Palameni Kuli Yehova, napamo umusambi wa Baibolo atemwa munyina nelyo nkashi wa Bwina Kristu uwaleko kushimikila? Nga imwe—bushe mwalitendeka ukubelenga ici citabo cipya? Nga te ifyo, mulandu nshi mushingafwaila inshita ya kutampa ukucibelenga bwangu bwangu? Sheniko inshita ya kwetetula pa fyo mwabelenga. Shi ici citabo cipya nacimupalamike kuli Yehova Lesa, pa kuti mubile imbila nsuma ya Bufumu bwakwe no buseko bwafulilako no kupimpa!