Ukutemwa Kulafwaikwa Icine Cine

ABANTU bonse balafwaya ukutemwikwa te mulandu no mushinku wabo, intambi, ululimi, nelyo umushobo wabo. Nga ca kuti tababatemenwe, tababa ne nsansa. Dokota umo uwalesapika alembele ati: “Ukutemwa na bucibusa e filenga sana ukuba abatuntulu, ukuba ne nsansa, no kuumfwa bwino. Nga tapali ukutemwa na bucibusa kuti twalwala, ukuba no bulanda, no kucululuka. Nga kwali umuti uwingalenga umuntu ukuba umutuntulu, ukuba ne nsansa, no kuumfwa bwino, mupepi na dokota onse mu calo kuti ale-eba abalwele bakwe ukubomfya uyo muti. Kuti caba mulekelesha sana ukukanaeba umulwele ukubomfya umuti wa musango yo.”

Lelo, abantu muno nshiku, maka maka inyunshipepala ne milabasa, pamo na balya abamonwa nga bantu ba kupashanya, ilingi line balanda sana pa fyuma, amaka, ukulumbuka, no kulaalana kwa baume na banakashi ukucila pa kuba na bucibusa busuma, ubwabamo ukutemwa. Bakafundisha abengi balanda sana pa buyo ne ncito, abati nga wakwate fyo ninshi wakwata ifyo ulefwaya mu bumi. Ca cine ukuti amasomo no kulundulula ukulamuka kwa muntu pa lwakwe fyalicindama, lelo bushe umo afwile ukusupile fyo ica kuti alabako na kuli balupwa ne fibusa? Kalemba wa ku kale uwasoma kabili uwalebebeta sana imibele ya bantunse apashenye umuntu walamuka lelo uushakwata ukutemwa ku “cela ca mukuba icilelila nelyo amalimba ya nyenjele.” (1 Abena Korinti 13:1) Abantu ba musango yo kuti baba ne cuma, kabili kuti balumbuka, lelo teti babe ne nsansa shine shine.

Mwi sambilisho lyakwe, Yesu Kristu, uwaishibishe sana abantunse no kubatemwa nga nshi, alemona ukutemwa Lesa no munensu ukuti e cintu cacindamisha. Atile: “Uletemwa Yehova Lesa obe no mutima obe onse, no mweo obe onse, no kutontonkanya kobe konse. . . . Uletemwo munobe nga we mwine.” (Mateo 22:37-39) Ni abo beka abomfwila aya mashiwi e bakaba abakonshi ba kwa Yesu cine cine. E ico, atile: “Muli ici e mo bonse bakeshibilo kuti muli basambi bandi, nga mwaba no kutemwana.”—Yohane 13:35.

Lelo, ni shani fintu umo engalundulula ukutemwa muno calo ca ndakai? Kabili bushe abafyashi kuti basambilisha shani abana babo ukutemwa? Icipande cikonkelepo calalanda pali aya mepusho.

[Ifikope pe bula 3]

Calyafya sana ukuba no kutemwa mu calo umo ubufunushi bwaba fye mpanga yonse