Ilyashi Lya Bakabilisha ba Bufumu

Ifisuma Ififuma mu Kutekanya no Mute

YESU KRISTU asobele ukuti mu nshiku sha kulekelesha “ukutemwa kwa bengi kukafuubalila.” Ici e calenga abantu abengi lelo ukukana-angwa ku mbila nsuma ya Bufumu mu fyalo ifingi. Bamo balisuula fye ne mipepele iine.—Mateo 24:12, 14.

Na lyo line, mu citetekelo kabili no kutekanya, bakasabankanya ba Bufumu balekumamo ukubomba te mulandu no bu bwafya, nge fyo ifyacitike ku calo ca Czech Republic filelanga.

BaNte babili balandile no mwanakashi ninshi ku mwinshi nakwisalwa. Pa numa ya nshita iciibi caliswike panono, no kuboko kwafumiine pa nse no kupoka Ulupungu lwa kwa Kalinda na Loleni! ifyo baNte baleshalika. Ishiwi lyalyumfwikike aliti “natasha,” na ku ciibi e fyo kwaiselwe. BaNte baletwishika abati: “Bushe tukabwele?” Umo pali aba babili uwali painiya, nelyo umutumikishi wa nshita yonse, apingwilepo ukubwelelako, lelo ukwankulako kwali fye cimo cine mpaka no mwaka umo wasukile wapwilamo.

Pa numa ya kupingulapo ukwalula imitendekele, painiya alombele ubwafwilisho kuli Yehova. Inshita imbi ilyo aletambika bamagazini kuli ulya mwanakashi, amwipwishe amepusho ya bucibusa ati: “Muli shani? Bushe mwalibatemwa bamagazini?” Pa muku wa kubalilapo tayaswike, lelo pa numa ya kutandala pa miku iingi, ulya mwanakashi atendeke ukuba uwa bucibusa. Bushiku bumo aliswile iciibi bamonana, lelo ilyashi talyalepele sana.

Apo uyu mwanakashi talefwaya ukulanshanya nankwe pa mwinshi, painiya apingwilepo ukumulembela kalata iya kumulondolwela ubufwayo bwa kutandala kabili amutambike isambililo lya Baibolo ilya pa ng’anda. Kwi pele pele, pa numa ya mwaka umo na hafu uwa kweshaesha no mutekatima, painiya alitungulwike ukutendeka isambililo lya Baibolo na mwine ng’anda. Ilyo ulya mwanakashi pa nshita imbi amwebele ati: “Nalisumine muli Lesa ukutula fye lilya line mwatampile ukundetela bamagazini,” painiya alipapile lelo alikoseleshiwe.

Kanshi ukutekanya no mute kuti kwaleta ifisuma mu mulimo wa kushimikila Ubufumu no kupanga abasambi.—Mateo 28:19, 20.