Balitemenwe Uluse

BA MILTON G. HENSCHEL, abali mwi Bumba Litungulula ilya Nte sha kwa Yehova pa nshita yaleepa, bapwishishe umulimo wabo uwa pe sonde pa Cibelushi, March 22, 2003. Bali ne myaka 82.

BaMilton Henschel batendeke ukubombela pa cishinte ca Nte sha kwa Yehova ninshi bacili fye abalumendo, kabili babombele mu busumino pa myaka ukucila 60. Bwangu bwangu baishibikwe ukuti baali abashilimuka kabili mu kufumaluka balitemenwe umulimo wa kushimikila Ubufumu. Mu 1939 babele bakalemba wa ba N. H. Knorr, abaleangalila dipartimenti wa kupulinta impapulo uwa Nte sha kwa Yehova uwa pa Brooklyn. Ilyo Munyinefwe Knorr atendeke ukulatungulula Inte sha mwi sonde lyonse mu 1942, asendele Munyina Henschel ukutwalilila ukuba kaafwa wakwe. Mu 1956 Munyinefwe Henschel aupile baLucille Bennett, kabili capamo bapitile mu nshita sha nsansa ne sha mafya ya mu bumi.

Munyinefwe Henschel abombele capamo mu kupalamisha na Munyina Knorr ukufika mu 1977 lintu baKnorr bafwile. Ilingi line Munyinefwe Henschel aendele pamo na Munyinefwe Knorr mu fyalo ukucila 150, ukutandalila no kukoselesha Inte sha kwa Yehova mwi sonde lyonse, ukucilisha bamishonari na babombela pa maofesi ya misambo. Inshita shimo inyendo sha musango yo shali ishayafya kabili isha busanso. Mu 1963 ilyo Munyinefwe Henschel aletandalila ibungano lya citungu ku Liberia, asangilwe mu kupakaswa kwatapata lintu akeene ukuibimba mu kusefya kwa buluko. * Pa numa fye ya myeshi inono, mu kushipa Munyinefwe Henschel abwelele ku Liberia mu kukumana na kateeka no kulomba ukuti ubuntungwa bwa mipepele ubwa Nte sha kwa Yehova isha muli cilya calo bwingakulilako.

Pa kubomba na mafya ayakalamba, Munyinefwe Henschel caishibikwe ukuti alelangulukilako, aali uuteuluka, kabili uupelulula. Abalebomba pamo na bo balibatemenwe ico balecite fintu busaka busaka, bali abafuuka, kabili aba milangwe. BaHenschel tabakwete icilafi, balesansamusha bamishonari abengi ukushinguluka isonde pa kubalumbula mu mashina, ukusosapo ifyebo finono mu lulimi lwa cikaya na mu kucincila ukulandapo ifyebo fimo ifya kubasekesha.

Pali Mika 6:8 tucinkulwako ukuti Yehova Lesa afwaya ifwe “ukutemwo luse.” BaMilton Henschel tukalabebukishisha ku ca kumwenako baimike ica kutemwa uluse. Te mulandu no bukulu bwa cishingamo bakwete, bali abayanguka ukupalamako, abanakilila, kabili aba cikuuku. Batemenwe ukusosa ati, “Nga uletwishika, ibukisha ukuti icintu ca cikuuku e cintu calungama ukucita.” Ilyo tuleloosha uyu munyinefwe watemwikwa, tulesekelela ukuti alishipikisha mu busumino ukufika ku mpela, kabili ali no kupokelela icilambu calaiwa, ne ci “cilongwe ca bumi.”—Ukusokolola 2:10.

[Futunoti]

[Icikope pe bula 31]

Ba M. G. Henschel na ba N. H. Knorr

[Icikope pe bula 31]

BaHenschel na bena myabo baLucille