Bushe Mulefwaya Yehova no Mukoosha?

UMWAUME umo Umwina Kristu alefwaisha sana ukwebako abo alenina na bo ishitima imbila nsuma iya mu Baibolo. (Marko 13:10) Lelo, alefilwa ukubasosha ku mwenso. Bushe alilekele? Iyo, apepele no mukoosha kabili asambilile ifya kutendeka ukulanshanya. Yehova Lesa alyaswike ipepo lya uyu muntu kabili amupeele amaka ya kushimikila.

Umukoosha wa musango yo ulakabilwa ilyo tulefwaya Yehova na mapaalo yakwe. Umutumwa Paulo atile: “Uupalamina kuli Lesa afwile ukusumina ukuti e ko aba no kuti aba kalambula wa bamufwaisha.” (AbaHebere 11:6) Ukufwaya fye Yehova takwakumanina. Ishiwi lya ciGriki ilyapilibulwa ati “ukufwaisha” lilosha ku mukoosha no kuipeelesha. Ici cisanshamo umutima onse, umutontonkanya onse, umweo onse na maka yonse. Nga ca kuti tulefwaya Yehova no mukoosha, tatuba abashayangwa ku fintu, abashi-ibikilishako, nelyo abanang’ani. Lelo, tulanga ukupimpa kwine kwine mu kufwaya wene.—Imilimo 15:17.

Abafwaile Yehova no Mukoosha

Amalembo yaisulamo ifya kumwenako fya bantu babombeshe ukufwaya Yehova. Umuntu umo pali abo ali ni Yakobo, uwashashele na malaika wali mu buntu mpaka amacaca yayanduluka. Ici calengele Yakobo apeelwe ishina lya kuti Israele (Uushomboka na Lesa) pantu “ashombweke” na Lesa, alishangile, ali no mukoosha, ashashele na Lesa. Malaika alimupaalile pa kubomba no mukoosha.—Ukutendeka 32:24-30.

Lyene kwali umwanakashi umwina Galili uushalumbulwa ishina uwalwele ubulwele bwa kufumo mulopa pa myaka 12, ubwamulengele “ukukalipwa apakalamba.” Talingile kukumya abantu bambi ifi alwele ubu bulwele. Lelo, alishipile no kuyakumanya Yesu. Aleti: “Nga nakumya fye ku mingila yakwe, nalapola.” Tontonkanyeni ifyo cali kuli wene ilyo alepeka mwi ‘bumba likalamba ilyalekonka [Yesu] no kumutitikisha.’ Ilyo akumishe umwingila wa kwa Yesu, alyumfwile ukuti “akamfukumfuku kakwe aka mulopa kalikamine”—ubulwele bwakwe ubwa mutatakuya bwalyundepwe! Ilyo Yesu aipwishe ati, “Nani akumya umwingila wandi?,” alyumfwile umwenso. Lelo, Yesu mu cikuuku amwebele ati: “We mwana, icitetekelo cobe nacikuposha. Kabiye umutende, kabili ube umutuntulu ku bulwele bobe ubwabipisha.” Ukubombesha kwakwe kwalilambwilwe.—Marko 5:24-34; Ubwina Lebi 15:25-27.

Pa nshita na imbi, umwanakashi umwina Foinike apaapeete Yesu no mukoosha ukuti ondape umwana wakwe umwanakashi. Yesu  ayaswike ati tacali icalinga ukupeela ifilyo fya bana ku tubwa. Aloseshe mu kuti tali na kusakamana abashali bena Israele mu cifulo ca kwangwa abaYuda abawaminwe co. Ilyo aumfwile umwalolele ici cilangililo, umwanakashi na lyo line alipaapeete ati: “Ca cine co, mwe Shikulu; lelo no tubwa twine tulalyako ubufungau ubupona kwi tebulo lya bashikulu ba tuko.” Icitetekelo cakwe icikalamba calengele Yesu ukusosa mu bufumacumi ati: “We mwanakashi, icitetekelo cobe cikalamba; nacibe kuli iwe umo ulefwaila.”—Mateo 15:22-28.

Cinshi cali no kucitika kuli aba bantu nga ca kuti tabali na mukoosha mu fyo balelomba? Bushe nga balipokelele amapaalo abaleka ilyo kwali ifya kubacilikila nelyo ukukaanya pa kubala? Iyo! Ifi fya kumwenako fyalangilila bwino bwino icishinka Yesu asambilishe, ica kuti “umupampamina” walilinga, kabili ulakabilwa pa kufwaya Yehova.—Luka 11:5-13.

Ukulingana no Kufwaya Kwakwe

Muli aya malyashi twalandapo aya baundepwe mu cisungusho, bushe umukoosha e walekabilwa fye pa kuti bondapwe? Iyo, ukulomba kwabo kwalekabila ukulingana no kufwaya kwa kwa Lesa. Yesu alipeelwe amaka ya kucita ifisungusho pa kuti apeele ubushininkisho mu nshila yaibela ubwa kuti ali Mwana wa kwa Lesa, Mesia walaiwe. (Yohane 6:14; 9:33; Imilimo 2:22) Na kabili, ifisungusho Yesu alecita fyalangile amapaalo yakalamba aya pe sonde ayo Yehova akapongolwela abantu mu Myaka Ikana Limo iya Kuteka kwa kwa Yesu.—Ukusokolola 21:4; 22:2.

Te kufwaya kwa kwa Lesa na pali nomba ukuti bakapepa ba cine balekwata amaka ya kucita ifisungusho, pamo nga amaka ya kundapa no kulandila mu ndimi. (1 Abena Korinti 13:8, 13) Ukufwaya kwakwe muno nshiku kusanshamo ukubila imbila nsuma iya Bufumu mu calo conse pa kuti ‘abantu ba misango yonse bengapusuka no kufika ku kwishiba bwino bwino icine.’ (1 Timote 2:4; Mateo 24:14; 28:19, 20) Ababomfi ba kwa Lesa kuti baenekela wene ukuumfwa no kupokelela amapepo yabo nga balebomba mu kufumaluka kabili ukulingana no kufwaya kwa kwa Lesa.

Bamo kuti baipusha ati, ‘Mulandu nshi uwa kubombesesha ilyo kuli pele pele ubufwayo bwa kwa Lesa bukafishiwapo nangu cibe shani?’ Nangu line ca cine ukuti Yehova akafishapo ubufwayo bwakwe, te mulandu ne mibombele ya bantunse, alatemwa ukubomfya abantu mu kucita ukufwaya kwakwe. Kuti twapalanya Yehova ku muntu uulekuula ing’anda. Uulekuula alakwata pulani ya bukuule bonse, lelo asala ifya kukuulila ukufuma pa fipe fisangwa uko alekuulila. Na Yehova alikwata umulimo wa kubomba pali lelo kabili alatemwa ukubomfya ababomfi bakwe,  abaipeela mu kuitemenwa.—Amalumbo 110:3; 1 Abena Korinti 9:16, 17.

Moneni ica kumwenako ca kwa Toshio. Ilyo aile kwi sukulu lya ku sekondari, alefwaisha ukushimikisha apo engapesha muli ici cifulo caibela. Lyonse aleteyanishisha libela Baibolo wakwe kabili alebombesha ukuba Umwina Kristu musuma. Ku kupwa kwa mwaka wa kubalilapo uwe sukulu, ishuko lya kulanda ku bo alesambilila na bo lyalimoneke. Toshio apepele kuli Yehova ukuti amwafwe kabili alicankilwe ukumona aba mu kalasi yakwe bonse balekutikisha ku lyashi lyakwe ilyaleti “Ubuyo Bwandi Ubwa Kuba Painiya.” Alondolwele ati alefwaya ukuba umutumikishi wa nshita yonse uwa Nte sha kwa Yehova. Umusambi umo asumine ukusambilila Baibolo na wene kabili alilundulwike mpaka abatishiwa. Toshio alilambwilwe pa mukoosha wa kubombela pa fyo alepepela.

Bushe Cine Cine Mwaliba No Mukoosha?

Kuti mwalanga mu nshila ishingi ukuti mwaliba no mukoosha wa kufwaya Yehova na mapaalo yakwe. Intanshi kwaliba ifyacindama ifyo mwingacita, pamo nga ukupekanya bwino ukulongana kwa Bwina Kristu. Nga mulepekanya bwino ifyasuko, ukulanda amalyashi ya kucincimusha, no kucita ifilangililo fisuma kuti mwalangilila ukuti cine cine mulefwaya Yehova no mukoosha. Kuti mwalanga umukoosha wenu na pa kuwamyako imibombele yenu mu butumikishi. Kuti mwabombela na pa kuba aba bucibusa ilyo mwafika pa ng’anda e lyo no kubomfya imitendekele isuma iyayana mu cifulo cenu. (Abena Kolose 3:23) Umwina Kristu kuti apeelwa imilimo mu cilonganino, pamo nga ukuba umubomfi uutumikila nelyo eluda nga alebombesha. (1 Timote 3:1, 2, 12, 13) Nga muleitemenwa ukubomba, kuti mwaba ne nsansa shaba mu kupeela. Kuti mwaipusha ukubombelako pa bukuule bwa maofeshi ya Nte sha kwa Yehova nelyo ukubombela fye pa ofeshi lya Nte sha kwa Yehova. Nga ca kuti muli bashimbe kabili namufikapo, kuti mwafwaya ukusangwa kwi Sukulu lya Kukansha Ilya Butumikishi, ilipangasha abaume ba bumupashi ukuba bakacema basuma. Nga mwalyupa, umulimo wa bumishonari kuti waba ni nshila mwingalangilamo umukoosha wenu uwa kufwaisha ukubombela Yehova sana. Kuti mwaya no ko balekabila sana bakabila ba Bufumu.—1 Abena Korinti 16:9.

Icacindama sana ni fintu mulebomba imilimo yenu. Umulimo onse uo mwapeelwa, ubombeni no mukoosha, na maka kabili no  ‘mutima wafumaluka.’ (Imilimo 2:46; Abena Roma 12:8) Mufwile ukumona umulimo onse nge shuko lya kulangilamo umukoosha wenu uwa kuleeta ilumbo kuli Yehova. Mulepepa lyonse ukuti Yehova amwafwe, kabili bombeni na maka yenu yonse. Lyene mukalobolola icilambu cikalamba.

Ukulambulwa pa Kuba no Mukoosha

Bushe mulemwibukisha umwaume umwina Kristu uwapepele ukuti umwenso upwe pa kuti ashimikile ku bo aleendela na bo pamo mwi shitima? Yehova alipaalile ico alefwaisha ukufuma ku mutima. Munyina alibombeele pa kutununuka bwino abantu, alesala amalyashi yalekanalekana aya kutendekelapo ukulanshanya. Alibomfeshe Baibolo bwino ukushimikila umwaume uwasakamikwe pa kukanaumfwana kwa bantu. Ukushimikila ulya mwaume pa miku iingi ilyo bali mwi shitima kwafuminemo isambililo lya Baibolo. Cine cine, Yehova alimupaalile pa mukoosha wakwe!

Kuti mwapaalwa nge fi fine nga ca kuti mwatwalilila ukufwaya Yehova no mukoosha. Nga ca kuti mu kuicefya mwatwalilila ukubombesha no kubika umutima wenu onse pa milimo ya bulesa yonse iyo mulebomba, Yehova akamubomfya ukulingana no bufwayo bwakwe kabili akapongolwela pali imwe amapaalo yashaifulila.

[Icikope pe bula 26]

Cinshi cali no kucitika kuli uyu mwanakashi nga taali na mukoosha?

[Icikope pe bula 27]

Bushe mulaba no mukoosha ilyo mulelomba Yehova ukuti amupaale?

[Ifikope pe bula 28]

Kuti mwalanga shani ukuti mulefwaya Yehova no mukoosha?