Ukupepa kwa Cine Kwaikatanya Ulupwa

MARIA ali ne myaka 13 ilyo wene na Lucy, umwaice wakwe umwanakashi basambilile pali Yehova kuli lupwa lwabo. Lupwa abalondolwelele na pe subilo lya Paradaise pe sonde. Bafwaile ukwishibilapo ifingi, e co baile ku Ng’anda ya Bufumu iya Nte sha kwa Yehova. Maria alitemenwe ifyo balefundwa kulya ifyaumfwika. Kwalipusene sana na ku calici, ukwaleba fye ukwimba! Tapakokwele, aba bana batendeke ukusambilila Baibolo ne Nte ya kwa Yehova.

Hugo, umukalamba wabo umwaume atemenwe amano ya pano nse ne cisambilisho ca kusanguka kwa fintu. Atile ena ali ni mukanalesa. Lelo, ilyo alesambilila ubushilika, abelengele icitabo ca Life—How Did It Get Here? By Evolution or by Creation?  * Asangile ifyasuko ku fipusho ifyo kushali imipepele imbi iingasuka. Ilyo apwishishe amasambililo yakwe aya bushilika, atendeke ukukosha icitetekelo cakwe cipya muli Lesa pa kubelenga Baibolo no kusangwa ku kulongana pamo ne nkashi shakwe. Maria na Lucy babatishiwe mu 1992, imyaka ibili ukutula apo baumfwilile icine, e lyo ndume yabo abatishiwe imyaka ibili pa numa.

Pali iyo nshita, abafyashi babo abaipeeleshe sana ku kukonka ifishilano fya ciKatolika, tabaleangwa sana ku cine. Balemona kwati Inte sha kwa Yehova balakalifya abantu, nangu line balitemenwe imisango isuma ne mifwalile yayana iya baNte bacaice abo abana babo balelaalika mu ng’anda mu myabo. Kabili pa nshita ya ca kulya, abana nga balelanshanya pa fyo basambilile ku kulongana, abafyashi babo balefwaisha ukufishiba.

Na lyo line, abafyashi bonse babili balitemenwe ubuloshi. Bawishi bali ni bacakolwa abalepuma banyina. Ulupwa lwali mupepi no konaika. Lyene bawishi baikele mu cifungo pa milungu ibili pa mulandu wa kukolwa. Ilyo bali mu cifungo, batendeke ukubelenga Baibolo. Ilyo balebelenga, basangile amashiwi ya kwa Yesu ayalanda pa cishibilo ca nshiku sha kulekelesha. Bawishi na banyina bene balisungwike sana ica kuti baile ku Ng’anda ya Bufumu kabili basumine ukusambilila Baibolo mu mwabo. Ilyo basambilile icine, baonawile ifitabo fyabo fyonse ifya buloshi kabili balilubwikeko ku kusansa kwa fibanda pa kwita pe shina lya kwa Yehova. Batendeke ukwalula ubuntu bwabo.

Bushe kuti mwaelenganya ifyo caweme kuli Maria na Lucy ukumona abafyashi babo balebabatisha kuli Hugo pa kulongana kwa citungu mu Bolivia mu 1999? Ici cacitike pa numa ya myaka 9 ukutula apo Maria na Lucy basambilile pali Yehova na malayo yakwe pa muku wa kubalilapo. Maria na Lucy pamo na Hugo baba mu mulimo wa nshita yonse. Fintu baba ne nsansa ukuti ukupepa kwa cine kwalikatanya ulupwa lwabo!

[Futunoti]