Ifipusho Ukufuma ku Babelenga

Mu fyalo ifingi, caliseeka ukupeela ifya bupe ku baleupana. Fishinte nshi ifya mu Malembo ifyo tufwile ukutontonkanyapo ilyo tulepeela nelyo ukupokelela ifya bupe?

Baibolo yalisuminisha ukupeela ifya bupe nga fyapeelwa no mutima usuma kabili pa nshita isuma. Muli uyu mulandu wa kupeela, Baibolo ikoselesha Abena Kristu ba cine ukupashanya Yehova, Uubapeela sana. (Yakobo 1:17) Umutumwa Paulo acincishe Abena Kristu banankwe ati: “Mwilaba ukucita icisuma no kupeelana ifintu, pantu amalambo aya musango yu e yateemuna Lesa.” E co, Abena Kristu bakoseleshiwa ukuba bakapekape.—AbaHebere 13:16; Luka 6:38.

Mu fyalo fimo caliseeka ku baleupana ukuyalembesha kwi shitolo pa numa ya kubebeta ifipe filimo no kulemba ifyo bengatemwa ukupeelwa nge fya bupe. Balupwa ne fibusa fya baleupana balebwa ishitolo lya kuyashitamo icipe ukufuma pa fyo abaleupana balembele. Kwena ukulemba ifipe filefwaikwa no mwa kushita kuti kwacefeshako uuleshita inshita ya kulashinguluka ukufwaya ica bupe, e lyo abalepeelwa na bo cilabangukila ukubwekesha ifyo bashilefwaya mwi shitolo line lyo.

Cili ku baleupana ukusala nga kuti batemwa ukulemba ifyo balefwaya ukubashitila na muntu fifwilwe ukushitwa. Lelo, Umwina Kristu afwile ukushilimuka pa kuti ataluke kuli fimo ificitwa ifingatoba ifishinte fya Baibolo. Ku ca kumwenako, ni shani nga ca kuti abaleupana basala ifipe fya mutengo sana? Nga cabe fyo, abakwete indalama inono napamo kuti bafilwa ukupeela ica bupe, nelyo kuti batila cawama ukukanaya ku bwinga pa kuti beyaseebana nga batwala ica bupe ca mutengo unono. Umwanakashi umo Umwina Kristu alembele ati: “Cileba cisendo nomba. Nalyesha ukuba kapekape, lelo, muno nshiku nshakwata shilya nsansa nalekwata mu kupeela.” Fintu cingabipa nga ca kuti ubwinga bwalenga bamo ukufuupulwa!

Cine cine, tatufwile ukulenga abalepeela ukuyumfwa ukuti pa kuti ica bupe cabo cipokelelwe, bafwile ukushita mwi shitolo limo ifi nelyo cifwile ukushitwa pa mutengo umo fi. Na kabushe, Yesu Kristu atile icacindama sana mu menso ya kwa Lesa mibele ya mutima iya ulepeela, te mutengo wa ca bupe. (Luka 21:1-4) Umutumwa Paulo alembele na pa fya bupe fya kukumbusuka abalekabila, ati: “Onse acite umo apangile mu mutima wakwe, te kupeela na mutimako nangu mu kupatikishiwa, pantu Lesa atemwa uupeela ne nsansa.”—2 Abena Korinti 9:7.

Ukulingana na Baibolo, tacabipa ukwishibikwa ukuti ni we wapeela ica bupe cimo, napamo pa kubikapo ka kalata pa ca bupe. Lelo, mu fifulo fimo, caliseeka ukwishibisha uuletele ica bupe kuli bonse abasangilweko. Uyu musango kuti waleta amafya. Abalepeela ifya bupe kuti bafwaya ukukanaishibikwa pa kuti abantu tabacishishemo ukwangwa kuli bene. Aba musango yo bacita ifilanda ilembo lya kwa Mateo 6:3, apo Yesu atile: “Lelo iwe, ilyo ulepeela ifya bupe fyobe fya nkumbu, wileka ukuboko kobe ukwa ku kuso kwishibe ifyo ukwa kulyo kulecita.” Bamo kuti bayumfwa ukuti ukupeela cintu icifwilwe ukwishibikwa fye kuli bene na untu balepeela. Kabili ukulenga abasangilweko baishiba abapeele ifya bupe, kuti kwalenga paba ukulinganya ifya bupe, ‘icingasongelekanya ukucimfyanya.’ (Abena Galatia 5:26) Cine cine, Abena Kristu bakafwaya ukutaluka ku kulenga uuli onse ukuumfwe nsoni pa kulumbula amashina ya bapeele ifya bupe pa cintubwingi.—1 Petro 3:8.

Cine cine, nga twakonka ifishinte ifisangwa mu Cebo ca kwa Lesa, ukupeela ifya bupe kukatwalilila ukutuletela insansa.—Imilimo 20:35.