Ukwafwa Kwine Kwine ku Bapiina

ILYO Yesu Kristu, Umwana wa kwa Lesa ali pano isonde, alyangilweko icine cine ku kwafwa abapiina. Umo uwaliko alandile pa butumikishi bwa kwa Yesu ati: “Impofu shilemona na kabili, na balemana baleenda, aba fibashi balesangululwa na bankomamatwi baleumfwa, na bafwa balebuushiwa, na bapiina baleshimikilwa imbila nsuma.” (Mateo 11:5) Lelo, ni shani pa lwa mintapendwa ya bapiina pali lelo? Bushe kuliko imbila nsuma iya kubeba? Ee, kuli ubukombe bwe subilo!

Nangu line abapiina balasuulwa no kulabwa pano calo, Baibolo, Icebo ca kwa Lesa, yalaya ukuti: “Pantu umubusu takalabwe pe, ukulolela kwa balanda takwakalobe umuyayaya.” (Amalumbo 9:18) Aya mashiwi ya cisansamushi yakafishiwapo ilyo Ubufumu bwa kwa Lesa, ubuteko bwa cine cine ubwa ku muulu, bukapyana pa mitekele yonse iya bantunse. (Daniele 2:44) Nge Mfumu ya bulya buteko, Yesu ‘akalililo bulanda umulanda no mubusu, ne myeo ya babusu akapususha: akalubule myeo yabo mu kunyanyantilwa na mu kufyengwa; no mulopa wabo ukaba uwafinisha mu menso yakwe.’—Amalumbo 72:13, 14.

Bushe imikalile ikaba shani ilyo Kristu akalateka isonde? Abakalatekwa na Kristu ilyo akateka isonde lyonse bakaipakisha ifisabo fya milimo yabo. Pali Mika 4:3, 4, Baibolo itila: “Bakekalo muntu onse mwi samba lya mwangashi wakwe, kabili mwi samba lya mukunyu wakwe, tapakabe na wa kututumya; pantu akanwa ka kwa Yehova nakasosa.” Ubufumu bwa kwa Lesa bukapwisha na mafya ya kulwala ne mfwa. (Esaya 25:8) Mwandini ico cikaba calo capusanako! Kuti twacetekela aya malayo ya Baibolo pantu yalipuutwamo na Lesa umwine.

Ukulunda pa kutupeela ubukombe bwe subilo, Baibolo itwafwa ukubombela pa mafya ya cila bushiku. Itwafwa ukukanaimona uushacindama, ukwingabapo pa mulandu wa kuba umupiina. Umwina Kristu umupiina alishiba ukupitila mu kusambilila Baibolo ukuti alicindama mu menso ya kwa Lesa nga filya fine uwa fyuma acindama. Ibuuku lya mu Baibolo ilya kwa Yobo lisosa ati Lesa ‘taba na kapaatulula kuli bacilolo, nangu kubisho wacindama ukucilo mulanda, pantu bonse bene mulimo wa minwe yakwe.’ (Yobo 34:19) Lesa atemwa bonse bene cimo cine fye.—Imilimo 10:34, 35.