Inshita Ilyo Amalayo Yakalafishiwapo

UKUTULA ku kale kwaba amalayo ayengi ayashafishiwapo. Imiku iingi ifyalo fyalifilwa ukusunga ifipangano fya kukanalwishanya ifyo basainishanya, ne ci calenga abantu babo ukusangwa mu nkondo shabipisha. Inshita imo Napoleon atile: “Ubuteko busunga amalayo ilyo bwapatikishiwa nelyo nga buli no kumwenamo mu kucite co.”

Ni shani ulwa malayo ya bantu umo umo? Fintu cibipa umuntu nga afilwa ukufishapo ubulayo bwakwe! Maka maka nga muntu mwaishiba kabili uo mwacetekela. Kwena napamo abantu kuti bafilwa ukufishapo amalayo yabo, e lyo bamo tabengafwaya ukuyafishapo.

Mwandini paliba ubupusano pa malayo ya bantunse na ya kwa Lesa! Amalayo ya kwa Lesa kuti yacetekelwa kabili ya cishinka. Ubulayo bonse Yehova Lesa alaya bulafishiwapo. Bulafishiwapo nangu cafye shani. Ukusosa pa lwa cebo ca kwa Lesa icishifilwa, Esaya 55:11 itila: “E fyo cikabe cebo candi icifuma mu kanwa kandi: tacakabwelele ibusha kuli ine, kano cacite co natemwa, no kushuka muli ico nacitumina.”

E co, kanshi tufwile ukumona shani amalayo ya kwa Lesa ayalembwa mu Baibolo? Kuti twayacetekela. Ku ca kumwenako, umutumwa Yohane alembele ati: “Moneni! Ihema lya kwa Lesa lili pamo na bantunse, kabili akekala pamo na bo, kabili bakaba abantu bakwe. Na Lesa umwine akaba pamo na bo. Kabili akafuuta ifilamba fyonse ku menso yabo, ne mfwa tayakabeko kabili iyo, nangu kuloosha nangu kukuuta nangu kukalipwa tafyakabeko kabili iyo. Ifya ntanshi nafiya.” (Ukusokolola 21:3, 4) Kuti mwaipakisha amapaalo ya musango yu nga mwacita umwabela amashiwi ya kwa Yesu aya kuti: “Awe ubu e bumi bwa muyayaya, ukuti baleishiba imwe, mwe Lesa wa cine mweka, no yo mwatumine, Yesu Kristu.”—Yohane 17:3.